FankatoavanaSantionany

Efa niaina toy izao ve ianao hoe misy zavatra tianao aleha sy vitaina dia atanao daholo ny fomba rehetra mety ahatanterahin’izay? Ny tena mandiso fanantenana sy mahavala ketraka dia ilay hoe efa vonona be ianao no hoe tsia, miova daholo indray ny programa fa tsy any indray…..

Indrindra moa raha hoe fikasana tsara no tao anaty nefa tsy afaka notanterahina…..Toy izay no nahazo an’i Paoly ao amin’i Asan’ny Apostoly 16:6 manao hoe : “Ary rehefa noraran'ny Fanahy Masina tsy hitory ny teny tany Asia izy, dia nandeha namaky ny tany Frygia sy Galatia” Fikasana tsara ny hoe handeha hitory teny. Mety efa nisy fiomanana maro nialoha an’io fa rehefa niteny ny Fanahy Masina hoe tsy makany dia tsy nanisy olana i Paoly sy ny ekipany fa dia lasa tany amin’ny toeran-kafa indray.

Impiry moa isika no mandray “Tsia” ho tsy fitiavana? Fantaro anefa fa raha Tomponao tokoa Andriamanitra, ao amin’ilay vavaka fanoloran-tena hoe “raisiko Ianao ho Tompoko sy Mpamonjy ahy…” dia Izy no misafidy amin’ny toeranao, ny alehanao, ny tokony ataonao, ny olona tokony hiarahanao, ny asa tokony tanterahinao sns sns…. Satria Izy no Tomponao.

Anatin’ny asa fanompoana angamba ianao na mikasa hanao izany. Ho anao ity teny ity: avelao Andriamanitra no Tomponao ary ianao dia mila mankató Azy, tsy misy fisalasalana. Ny fandavany tsy handehanan’i Paoly ho any Asia dia tsy hoe mandrakizay, fa tafiditra anaty stratejia izay amin’ny maha-Tompo Azy dia Tsitoha Izy. Mila toe-po manaiky tarihina sy mametraka Azy ho Tompon’ny asa, dia ho hitanao fa fahagagana isan’andro ny hiainanao.

Tahiana manokana ianao