Habakuki 3
3
Nabii Habakuki kolomba
1Nabii Habakuki kolomba apfino,
2ghwe IMNDEWA Imulungu, nihulika tsimbuli tsako,
na nene nopfuka aghala ghautendile.
Ughatende keli mna imiyaka yetu,
ughatende ghamanyike keli mna imiyaka yetu.
Haughudubuka twokulomba utwonele libatsi!
3Imulungu katsa kulawa Temani,
Imulungu iyelile katsa kulawa ichidunda cha Parani.
Utunitso wake wenela kulanga, na iwanu wose wali mna isi womtunya yeye.
4Ghumng'alo ghwake ka ghwa tsuwa,
na milambi yakwaka kulawa mna ghumoko ghwake,
amwo mna ghumoko ghwake mpfisika ingupfu yake.
5Kotuma utamu wihile umlongolele hambele hake,
na ghamajanga ghamuwinzilitsa kuchughu.
6Yang'ema wima isi yohighisika,
yang'atsilola tsiisi, iwanu wali mumo woghudema.
Ipfidunda pfa ghumwande pfobeneka beneka,
ipfidunda pfidodo pfa ghumwande pfenama,
tsinzila tsake tsa tangiya ghumwande.
7Tsaniwona iwanu wa Kushani woghaya
na iwanu wa Midiani woghudema.
8Ghwe IMNDEWA, apfi tsakuyonela maya imito?
Angu tsakupfighudubukila ipfikolongo?
Apfi tsakuyonela maya ibahali haudiinile falasi wako iwang'ali wokwegha imituka yako ya ing'ondo uhume?
9Tsakuwika ghoya upinde wako, tsakwika ghoya imishale yako mna ilutsabi.
Na kuitenda imito ikang'ane isi.
10Ipfidunda hapfikwonile pfipfuka,
ghamatsi ighamemile ghabita, ighamwaghike kulawa kulanga,
ghamatsi ighaghendese hasi ha ibahali ghaduma,
na ghamawimbi ghake ghenuka mchanya.
11Litsuwa na ghumwetsi tsapfima ukutsunguluka kulanga,
hayonile imiyali ya mishale yako pfaighuluka,
ghumng'alo ghwa ghumgoha ghwako pfaghumeletseka.
12Kufosa mna isi kwa ukughudubuka,
na kwa imaya yako kuwabayugha iwanu wa isi yose.
13Kulawa kughenda kuwakombola iwanu wako,
na kumkombola ayula yumsaghule kwa ukubaka ghamapfuta.
Kumhonda ichilongotsi wa iwanu wehile,
kumtsula ghamaghwanda ghake kulawa kuna litwi mbaka kuna ghamaghulu.
14Kwa imishale yawo iwenyegho,
ghweghwe kughahoma ghamatwi gha wapfilongotsi wawo,
ahala hawatsile ka chipfulapfumbi watupwililise,
aku wotamba ka wowakoma iwanu wahingwa iwepfisile.
15Kufosa mna ibahali kwa falasi wako,
mna ibahali ina ighamawimbi ighatibuke.
16Hanihulike agho nene nighudema, imilomo yangu ihighisika,
imipate yangu itenyuka, na ghamaghulu ghangu ghaghudema.
Nobetetsa kwa ukududumila litsuwa alila lya ukukomighwa liwatsile awala iwatupfamile.
17Hata ka imibiki ya mitini ng'aisanula ghamaluwa baye,
wala iminzabibu ukweleka tsinzabibu,
hata ka minzeituni ng'aikweleka baye tsinzeituni,
wala ka imighunda ng'aimela ipfijo baye,
na hata ka kuduhu wang'olo mna ipfikwama, wala wang'ombe,
18nene nitsoghendelela kumdeng'ela Imulungu iyonikombola.
19IMNDEWA Imulungu yuyo ingupfu yangu,
koitenda mighulu yangu iwe na ngupfu ka ya dondolo,
konitenda nifose mchanya mna ipfidunda.
Voafantina amin'izao fotoana izao:
Habakuki 3: LBV
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra