Habakuki 2
2
Imulungu komwidika Habakuki
1Nene nitsakwima kuchanya kuna ghumnala ghwa ukubetetsa, nitsokala meso ili mbone yatsonilongela choni, na yatsonyidika choni mna aghala ghaniloloma.
2Kuya IMNDEWA kanyidika apfino, “Ughandike aghano ghanikulangusa: ughandike ghoneke mwatsi mwatsi mna ghamabamba gha ghamabwe, ili imunu yofosa hanu aho yadahe kughasoma. 3Aghala ghanikulangusa ghobeta kulawila mna ghamatsuwa ighakutsa, nagho ghosumkila kulawila kuna ukutsigha kwa ghamatsuwa agho, na ng'aghoghutsuka baye. Ka ghokawa kulawila, ughabete, ghatsolawila ghendo wala ng'aghokawa baye. 4Lola, ‘Awala iwali na ichidandali watsokomighwa, lekeni yana ihaki katsokala mgima kwa ukutoghola kwake.’”
Iwehile watsokomighwa
5Ona ghendo, idipfai yakwaghisa, imunu yana ichidandali ng'atsokala baye akaye yake yabwihile. Kakala kwa kuwametsa iwanu wangi ka kutsimu, ng'odaha kwighuta baye. Koweka hamwe iwanu wa isi tsingi, na iwanu wose kowatenda wawe wake. 6Imunu ka ayo chila munu katsombetsa, na katsomtungila malonga gha ukumbetsa, watsolonga, “Kutsochona ghweghwe yuwilundikitsila ipfinu ipfili si pfako baye, na kwika poni tsimali tsa iwanu lekeni ng'uliha baye. Kutsoghendelela kutenda apfo mbaka tsuwachi?” 7Angu awala iwokudai ng'awatsokutsila kwa kwidukitsa baye? Apfi ng'awatsolamka baye na wakutende ughudeme? Baho watsokughogha na kutsakuwa munu wawo. 8Kwaapfila ghweghwe tsakuboka ipfinu pfa iwanu wa isi tsingi, apfo awala iwalekighwe wagima nawo watsokughogha ghweghwe. Watsotenda apfo kwaapfila ghweghwe tsakuwakoma, na tsakuwadununza iwanu iwokala mna isi yose, na mna imiji yake. 9Kutsochona ghweghwe yutsenga ing'anda ng'ulu kwa kubunza iwanu, ing'anda ayo yutsengile kuchanya ghendo ka chibali cha chideghe, aku kwepfikitsa ka kuduhu yehile iyodaha kuchihinya. 10Lekeni ghweghwe kuighela chinyala ing'anda yako, kwa ukuwakoma iwanu wengi, naghwe ghumwenyegho kutsokomighwa. 11Mana hata ghamabwe ighali mna ubanda ghatsokulilil, na tsiboriti tsa ing'anda ayo natso tsitsokulila pfipfio. 12Kutsochona ghweghwe yutsenga ghumji kwa ukuwakoma iwanu, yukwimisa ghumji kwa kutenda ighehile. 13Angu si IMNDEWA yana tsingupfu baye, iyotenda tsingupfu tsa iwanu tsaghile mna ghumoto, na iwanu wa isi tsingi wepfe kwa kusang'ana ng'onde tsa hela? 14Kwaapfila isi itsomema wanu iwatsomanya ukulu wa IMNDEWA ka apfila ibahali pfaimemile ghamatsi. 15Katsochona yeye yomnwesa imbwali imunu wake wa habehi, iyomtenda yapatike ghendo kwa kumghidila imbwali yake ng'ali mna isupa, ili yadahe kwona pfayokala chidako. 16Kutsakona chinyala, na iwanu ng'awatsokuheshimu baye. Ghweghwe ghumwenyegho kutsakunwa na kutsenzeuka. Imulungu imwenyegho katsokutenda upatike na ichinyala chitsoghubika iheshima yako. 17Aghala ighehile ghauwatendele iwanu wa Lebanoni ghatsokupfamila ghweghwe. Ukukoma kwauwakomile iwanyama kutsokutenda upfuke. Agho ghose ghatsokupata ghweghwe, kwaapfila kuwakoma na kuwadununza iwanu iwokala muisi na wose iwokala mna imiji yake. 18Ichinyagho ichitendighwe na imunu china sang'ano yachi? Ichinyagho cholawa mna ghamabwe ghalubulighwe, nacho ng'ambe chakwenetsa ughutsu. Awala iwatendile ichinyagho wehuwila ichinyagho chawatendile iwenyegho, ichinyagho chenyegho hata ukulonga ng'achidaha baye. 19Katsoghaya ayula yoghulongela ghumbiki “Lamka,” au libwe ling'alilonga baye, “Winuke!” Angu ichinyagho chodaha kumlangulitsa imunu? Lola chibakighwa nzahabu na shaba lekeni chahela ugima wowose. 20Lekeni IMNDEWA Imulungu kamna ing'anda yake iyelile, iwanu wose wa isi wakale tulu hambele hake.
Voafantina amin'izao fotoana izao:
Habakuki 2: LBV
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra