थरप्या तका का काम 20

मकिदुनिया अन युनान में पोलुस

1जद्याँ वटे हुल्‍लड़ ठम ग्यो, तो पोलुस चेला ने नके बलान धिजो बन्दातो तको वाँकाऊँ हिक लिदी, अन पछे मकिदुनिया में परोग्यो। 2वीं हंगळा इलाका में वेन अन चेला ने धिजो बन्दातो तको वो युनान में आयो। 3वो तीन मिना वटे रियो। ईंका केड़े जाँज में सिरिया के आड़ी जाणो हो, तो वणी हुण्यो के यहूदियाँ वींका वाते जाळ बिछारिया हे, ईं वाते वणी मकिदुनिया वेन जाबा वाते धारियो। 4बिरिया के पुरूस को छोरा सोपतरुस अन थिस्सुलुनिक्यों मेंऊँ अरिस्तखुस अन सिकन्दुस, अन दिरबे को गयुस अन आसिया का तुखिकुस अन तुरकियुस अन तिमुतियुस वींका हाते ग्या हा। 5वीं आगे जान त्रोआस में माकाँ वाते बाट नाळरिया हा। 6अन माँ बना हाज्या की रोटी का तेवाराँ का दनाँ केड़े फिल्‍लिपीऊँ जाँज में बेन पाँच दन में त्रोआस ग्या अन हात दन तईं वटे रिया।

त्रोआस में पोलुस की आकरी जातरा

7हपता का पेले दन जद्याँ परबू ने आद करबा का जीमणा वाते भेळा व्या तो पोलुस वाँऊँ बात-बच्यार करतो रियो अन दूजे दन जाणो हो, ईं वाते आदी रात तईं बाताँ करतो रियो। 8जणी घर का उपरला ओवरा पे माँ हंगळा भेळा व्या हा, वटे दिवाण्या लगा मेल्या हा, 9अन युतुखुस नाम को एक मोट्यार छोरो खड़की में बेटो हो। जद्याँ पोलुस आदी रात तईं बाताँ कररियो हो तो वो मोट्यार नींद में ऊंगरियो हो अन गेरी नींद में तीसरा माळाऊँ हेठे पड़ग्यो। जद्याँ लोगाँ वींने तोक्यो तो मरियो तको देक्यो। 10पण पोलुस रेटे आन वींने बाँत में लिदो अन क्यो, “घबरावो मती, काँके ईंको जीव ने निकळ्यो हे” 11अन पोलुस पाछो ऊपरे जान रोटी तोड़ी अन खादी। वो अतरी देर तईं बाताँ करतो रियो के, भाग-फाट्याँ की टेम वेगी, पछे वो परोग्यो। 12वीं मोट्यार छोरा ने जीवतो वे घरे लेन आया अन वणा संतोक पायो।

त्रोआसऊँ मितुलेन की जातरा

13माँ पोलुसऊँ पेल्याई जाँज में बेन अरसुस आया, काँके माँने वटूऊँ वींने हाते लेणो हो, काँके वणी माँकाऊँ क्यो हो के वो गेले-गेले जाणो छारियो हे। 14जद्याँ वीं असुस में माँने मल्यो तो माँ वींने जाँज में मितुलेन लाया। 15वटूऊँ माँ जाँजऊँ वेन दूजे दन खियुस नके पोंच्या, अन आगले दन सामुस पार करन तीजे दन मिलेतुस में आया। 16पोलुस इपिसुस का नके वेन जाणो छायो, काँके कटे अस्यान ने वे के आसिया में मोड़ो वेजा। वो ईं वाते आगत कररियो हो, के वे सके तो पिन्तेकुस के तेंवार के दन यरूसलेम में रेवे।

इपिसुस का बुड़ा-ठाड़ा ने उपदेस

17पोलुस मिलेतुसऊँ इपिसुस में संदेसो खन्दायो के, मण्डली में बुड़ा-ठाड़ा ने बलावो। 18जद्याँ वे वींका नके आया, तो वणी क्यो, “थाँ जाणो हो के मूँ वीं पेलाई दनऊँ पूरो टेम थाँका हण्डे कस्यान बितायो, जीं दनऊँ मूँ आसिया में आयो। 19नमरताऊँ अन आसूऊँ अन जद्याँ यहूदियाँ को जाळ भी मारा पे आ पड़्यो, तो भी मूँ ईं परक में परबू की सेवा करतो रियो। 20अन जी जी बाताँ थाँके भलई की ही वणीने में हंगळा के हामे अन हरेक का घरे जा-जान हिकाबाऊँ कदी ने हपई। 21यहूदियाँ अन युनानियाँ के हामे गवई देतो रियो, के पापाऊँ मन फरान परमेसर का आड़ी आवो अन परबू ईसू मसी पे विस्वास करो। 22अबे देको, मूँ पुवितर आत्मा की आग्याऊँ यरूसलेम जारियो हूँ, मूँ ने जाणूँ के वटे मारा पे कई बीती। 23बेस ओ के पुवितर आत्मा हरेक नगर में गवई देन मने केवे हे के, हतकड़ी अन दक-तकलिप मारा वाते वेबावाळी हे, 24#2 तिमु 4:7पण मूँ आपणाँ जीव ने कई ने हमजूँ। मूँ तो बेस वीं दोड़ अन सेवा का काम ने पूरो करणो छारियो हूँ, जिंने में परबू ईसुऊँ पाई हे, जो परमेसर की करपा का हव हमच्यार की गवई देणो हे।”

25अबे देको, मूँ जाणूँ हूँ के, थाँका बचमें में परमेसर का राज को परच्यार किदो हे, पण अबे थाँकामूँ कुई भी अन कदी भी मने ने देक सकी। 26ईं वाते मूँ आज थाँने गवई देन केरियो हूँ, यद्याँ ईंका केड़े भी थाँको नास वे जावे तो मूँ जिमेदार ने हूँ। 27काँके मूँ परमेसर की हारी मरजी ने थाँने बताबा वाते कदी आगो-पाछो ने व्यो। 28ईं वाते थाँ आपणो अन आपणी हाराई गारा को ध्यान राको जिंने पुवितर आत्मा थाँका हात में हुप्याँ हे के, थाँ परमेसर की मण्डली की रुकाळी करो, ज्याँने परमेसर आपणाँ बेटा का लुईऊँ मोल लिदी हे। 29मूँ जाणूँ हे के, मारा जाबा के केड़े उगड्याँ तका बरगड़ा थाँका गाबे अई, जो थाँका गारा ने, ने छोड़ी। 30अस्यो टेम आई जद्याँ थाँका मेंऊँस थोड़ाक मनक विस्वास्याँ ने जूट बोलन आपणाँ हाते लेई, 31ईं वाते हूँस्यार रेवो, अन ओ ध्यान राको के, में तीन वर तईं रात-दन आसूँ का हाते थाँ हाराई ने हिकाया।

32अबे मूँ थाँने परमेसर अन वींकी करपा का संदेसा में थाँने हूँप दूँ हूँ। वोईस थाँने बणाई अन वींका मनकाँ ज्याँने पुवितर किदा हे वाँका हण्डे थाँने भी बापोती देई। 33में कणी भी मनक की चाँदी अन होना अन गाबा को लाळच ने किदो। 34थाँ जाणो हो के, अणा हाताँईस मारी अन मारा हण्डाळ्याँ की जरुरत ने पुरी किदी ही। 35में थाँने हंगळो करन दिकायो के अस्यान मेनत करता तका गरीबा ने हमाळो अन परबू का बचन ने रोज याद राकज्यो, जो वणी क्यो हो के, “लेबाऊँ देणो हव हे।”

36ओ केन वणी गोडा टेकन हंगळा के लारे परातना किदी। 37तद्याँ वीं हंगळा घणा रोया अन पोलुस के गळे मलबा लाग्या। 38वे खासकर ईं बातऊँ दकी हा के, पोलुस वाँने क्यो हो के, थाँ अबे मने कदी ने देको। तद्याँ वीं हंगळा पोलुस ने जाँज में बेटावाने ग्या।

Pašlaik izvēlēts:

थरप्या तका का काम 20: एम टी आर

Izceltais

Dalīties

Kopēt