1 कुरन्थीयो 10
10
मूरत्या क खिलाप चेताबो
1मेरा लाडला बिस्वास्यो, म ओ चाऊँ हूँ क थे ओ जाणल्यो की आपणा बडका जखा मूसा की मान्या करता हा बे परबु का बादळ की छाया म लाल समदर क पार राजी-खुसी गया हा। 2बा सगळानै बादळ क तळै अर समदर क मांयनै मूसा की मानबाळा क रूप म बतिस्मो दिओ गयो हो। 3अर सगळा जणा एकई जंय्यां को आत्मिक खाणो खाया, 4अर सगळा एकई जंय्यांको आत्मिक पाणी पीआ, अर बे बि आत्मिक ढाडऊँ पीता हा जखी बाकै सागै चालती ही; अर बा ढाड मसी ह। 5पण बामैऊँ घणकराऊँ परमेसर राजी कोनी होयो अर बे मिनख उजाड़ मई मर'र ढेर होगा।
6अर अ बाता आपणा ताँई सीख ह क आपा बुरी बाता की इंछ्या नइ करां, जंय्यांकी बे कर्या हा, 7अर नइ मूरती धोकबाळा बणो जंय्यांकी बामैऊँ बण्गा हा, अर जंय्यां पबितर सास्तर म मांडेड़ो ह क, “बे मिनख खाबा-पीबा अर मूरती क सामै नाचा-कूदि अर एक दुसरा क सागै मोज-मस्ति करबा लाग्या।” 8अर नइ आपा कुकरम करां, जंय्यांकी बामैऊँ कई मिनख कर्या हा, अर एकई दिन म तेईस झार मिनख मरगा। 9अर नइ आपा मसीनै#10:9 मसीनै परबु बिचासां, जंय्यांकी बामैऊँ कई कर्या अर बे साप क डसबाऊँ मरगा। 10अर नइ सिकायत करो, जंय्यांकी बामैऊँ बोळाजणा कर्या करता हा अर बे नास करबाळा क हाता मार्या गया।
11अर अ बाता बामै इ हिसाबऊँ होई जिऊँ बे दुसरा मिनखा ताँई सीख होई, अर आपानै चिताबा ताँई पबितर सास्तर म मांडी गई। क्युं क आपा अंय्यां का जुग म जिर्या हां जिमै अंत सांकड़ोई ह। 12इ ताँई जखो अंय्यां सोचै क, “म बिस्वास म मजबूत हूँ,” बो ध्यानऊँ रेह्वै क कदै अंय्यां नइ होज्या क बो बिस्वासऊँ गुड़ जावै। 13अर थे कदै बी अंय्यां कोनी बिचास्या गया। जखो मिनखा क सेह्बाऊँ बारनै हो। अर परमेसर तो बिस्वास जोगो ह बो थानै थारी सक्तिऊँ बेत्ती बिचासबा कोनी दे, पण जद थे बिचास्या जाओ हो जणा बो बिचासबा क सागै-सागै थानै बचाव ताँई उपाय बी बतावै ह।
मूरती पूजा मना करज्यो
14ओ लाडलो मूरती पूजा मना करज्यो। 15अर आ बात म थानै स्याणा जा'णर खेऊँ हूँ। अर जखो म थानै खेर्यो हूँ इनै थेई परख ल्यो। 16#मत्त 26:26–28; मर 14:22–24; लूक 22:19,20जि प्याला मऊँ आपा परबुभोज क रूप म धनेवाद देर पिवां हां, बो दरसावै ह क आपा मसी का लोय मऊँ पिवां हां। अर बा रोटी जखी आपा परबुभोज म तोड़र खावां हां बा दरसावै ह क आपा मसी की काया मऊँ खावां हां। 17क्युं क जंय्यां रोटी एक ह बंय्यांई आपा बी बोळा होर एक की काया हां, क्युं क आपा सगळा बि एक रोटी मऊँ खावां हां।
18थे बा इजरायल का मिनखा क बारां म सोचो जखा बेदी प चढाईड़ी चिजानै खावीं हीं, के बे बेदी का पाँतीवाळ कोनी? 19अर मेरो इ बातनै खेबा को काँई मतबल ह की मूरती प चढाईड़ो क्युं ह अर मूरती क्युं ह? 20नइ, पण मेरो खेबा को ओ मतबल ह क परमेसरनै नइ ध्यारबाळा परमेसर की झघा ओपरी बलायानै बलि चढावै ह। अर म कोनी चाऊँ क थे ओपरी बलाया का साती बणो। 21जणा थे परबु अर ओपरी बलाय मऊँ एक कोई खा अर पी सको हो। 22के आपा परबुनै चिड़ाबो चावां हां? के आपा परबुऊँ बेत्ती सक्तिसाली होगा?
सक्यु परबु की मेमा ताँई
23 #
1 कुरन्थी 6:12
आपा सक्यु करबा ताँई अजाद हां। पण सक्यु भलाई ताँई कोनी ह। आपा सक्यु करबा ताँई अजाद तो हां पण सगळी बाताऊँ बिस्वास मजबूत कोनी होवै ह। 24थारै मऊँ सगळा जणा खुदको मतबलई नइ देखै पण दुसरा को ध्यान बी करै। 25अर गोस बजार म जोक्यु बिकै बिनै अन्तर-आत्मा क खया गेल खायो अर बिका बारां म कोई सुवाल मना उठायो। 26क्युं क सास्तर म मांडेड़ो ह, “आ धरती अर इ धरती प जोक्यु बी ह बो सक्यु परबु को ह।”
27ज कोई बिस्वास नइ करबाळा मिनख थानै रोटी खाबा ताँई बुलावै जणा थारै सामै जखो बी परूस्यो जावै जणा थारी अन्तर-आत्मा की बजेऊँ बिनै कोई सुवाल बुज्या बिना बिनै खाल्यो। 28पण ज कोई थानै बतावै क, “ओ देवता क चढाईड़ो चढावो ह,” जणा थानै बताबाळा अर अन्तर-आत्मा ताँई मना खाज्यो। 29अर मेरै खेबा को मतबल थारी अन्तर-आत्माऊँ कोनी ह पण बी दुसरा मिनखऊँ ह। क्युं क मेरी अजादि दुसरा मिनख की अन्तर-आत्माऊँ क्युं परखी जावै? 30अर ज म परबुनै धनेवाद देर रोटी म पाँती पताऊँ हूँ जणा बि ताँई मेरी बुराई नइ करबो चाए।
31इ ताँई थे चाए खायो, चाए पीयो, सक्यु परमेसर की मेमा ताँई करो। 32थे इ हिसाबऊँ जीओ जिऊँ थे नइ यहूदि मिनखा ताँई, नइ यूनानी मिनखा ताँई अर नइ परमेसर की बिस्वासी मंडळी का मिनखा ताँई आखळी बणो। 33मेरी जंय्यां बिना आ सोच्या की मनै काँई फाईदो होसी म दुसरा को फाईदो देखूँ हूँ अर सगळानै राजी राखूँ हूँ बंय्यांई करो, जिऊँ बे बचा लिआ जावै।
Pašlaik izvēlēts:
1 कुरन्थीयो 10: एस डब्लु वी
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
(c) 2010-2017, New Life Computer Institute. All rights reserved