Japarea̧ 10
10
Ütë tjamo̧ judi darämi̧ cjia tänȩa̧dejȩ Corenerio ju̧i̧
1Ado cja̧rȩmȩrȩ, Corenerio quȩmȩ pio judi cjo̧ro̧rëremȩde Checharea quȩmȩ bë ma̧ri̧räpȩ. Domano guadia ütëmȩrȩ cjo̧ro̧rëremȩde. Itariano quȩmȩ guadia buba pio ju̧i̧ tjamo̧ yo̧mȩrȩ cjo̧ro̧rëremȩde. 2Ado Coronerio judi Ütë tjamo̧ pio ju̧i̧ jo̧rȩtamȩrȩ cjo̧ro̧rëremȩde, jibëa̧ pumȩ pio judiro̧borë. Jabechji̧ pio ju̧i̧ uapaji̧ri̧rȩ ba chia jo̧rȩtarëreji̧ri̧diro̧jo̧ȩ. Ado Corenerio judi tjamo̧ri̧ yürütämi̧ cjiamȩrȩ ji̧dë ma yürürëremȩdejȩrȩ judio ji̧ri̧ pio ji̧ri̧ chjadëri̧ a̧dopea̧ oa. Aja̧, pumȩ chjamȩrȩ yürüriärëremȩdejȩrȩ chëre oa cjäri̧ ja̧boji̧ri̧ pio ji̧ri̧iäpȩmo̧. Ado peaja̧di babui̧ra̧ ni̧bärëremȩdejȩ Ütë tjamo̧ ju̧i̧. Aja̧, ja̧di dari̧ japamȩrȩ cjo̧ro̧rëremȩde Corenerio judi, judi judiodërë.
3Ado cja̧rȩmo̧ doremȩrä, do üdë chjiaräpȩmo̧diäa̧rä, Ütë tjamo̧ judi tänȩa̧ oa darämi̧ cjiarëremȩdejȩ Corenerio judi. Aja̧, pio jȩaiäpȩ jana̧mȩ oa darämi̧ cjiarëremȩdejȩ Ütërë chjadüa̧ mu̧i̧tjoi̧ pio ju̧i̧. Ado ja̧di ta̧rëri̧ yo̧mȩ oa ta̧rërämi̧ cjia̧dejȩ:
—Danȩ Corenerio.
4Ado Corenerio judi mu̧i̧tjoi̧ pio ju̧i̧ daea̧ oaiä, cjoai̧tä damȩrȩ oë ja̧bo tjamo̧pea̧de. Ado uapa tjamo̧mȩrȩ dëbë yo̧a̧dejȩ:
—¿Tjana̧ japera̧pea̧renȩ Ano̧mȩ? —iëno̧ë ta̧rëa̧dejȩ.
Ado a̧dërimȩ mu̧i̧tjoi̧ pio judi dëbë yo̧mȩrȩ yo̧a̧dejȩ:
—Danȩ, Ütë tjamo̧ pio judi ba chia ta̧rëa̧dimȩ mȩnȩ pio ju̧i̧iäpȩmo̧ ni̧bäriäa̧ pio ju̧i̧. Ado mȩnȩ cjäri̧ ja̧boji̧ri̧ pio ji̧ri̧iäpȩmo̧ yürüriäa̧ pio ju̧i̧bo daea̧dimȩ —yo̧a̧dejȩ—. Jabechji̧ ma̧ chiadëri̧ cjiamȩrȩ dadimȩ Corenerio. 5Ja̧di tara yo̧requedemȩ. Chjadüjȩrȩ oari ji̧ri̧ Jope quȩmȩ bë ma̧ri̧räpȩmo̧, Chimo̧ Pedro quȩmȩ pio ju̧i̧ ëba ma̧na̧pea̧ oa. 6Danȩ, Chimo̧ quȩmȩ pio ju̧i̧ ja̧ bëräpȩde. Ira̧ ja̧bepamȩ pio ju̧i̧ ja̧ bëräpȩ cjiadiäde ui ana̧ yuroro. Ja̧dira̧ jäpea̧ oa chjadüjȩrȩ —yo̧a̧dejȩ.
7Ado a̧dërimȩ mu̧i̧tjoi̧ judi, Corenerio pio ju̧i̧ nö̧ta ni̧bäremȩ pio judi a̧dë cjarapea̧rä, chjaodëri̧ ëna̧diäa̧dejȩrȩ jibëa̧ mu̧i̧tjoi̧ yo̧a̧ri̧ oa. Cja̧rȩmȩ guadia oa peaja̧di ëna̧diäa̧dejȩ, pio jȩa chjadëri̧ ta̧rëdiämȩ pio ju̧i̧, Ütë tjamo̧ ju̧i̧iäpȩmo̧ jo̧rȩtamȩ ju̧i̧. 8Ado judi darämi̧ cjia̧ pio ju̧i̧ chjiari ma̧ȩ ütëbo oa yo̧ ëte, chjadürëremȩdejȩrȩ Jope quȩmȩ bë ma̧ri̧räpȩmo̧.
9Ado dopea̧rä, dorë tjomo̧pea̧rä, judiro̧ Jope quȩri̧räpȩ go̧düdäräa̧rä, Pedro judi jënȩ cjo̧ro̧mȩ jo̧ uëräpȩ buarëremȩde, pjatëri̧ a̧rüa̧ oa cjiamȩ jo̧räpȩ. Pio ju̧ri̧pȩ buarëremȩde Ütë tjamo̧ pio ju̧i̧iäpȩmo̧ ni̧bäpea̧ oa. 10Ado japamitë chjätä ëte, ta̧mȩcho̧ ja̧bopea̧de. Jurarea̧ oa juratämi̧ cjiamȩpea̧de. Jabechji̧ chjo̧eapaji̧ri̧ pio judiro̧ jabë japadëa̧ oaiä, jabechji̧ jurarea̧ dadëa̧de. Ado judiro̧ jurarea̧ chjo̧eapea̧ nö̧ta, jabechji̧ Ütë tjamo̧ judi darämi̧ cjia tänȩa̧dejȩ. 11A̧dë üdë cjürë chiape bagamȩ oa, are ië baämȩ oa darämi̧ cjiarëremȩdejȩ. Ja̧dëa ji̧ cjürëri pio judiri biramȩ oa darämi̧ cjia̧dejȩ chjabana ana̧mi̧ da oa, daburäpȩmo̧ biramȩ oa. Buri pio judiri mu̧i̧ gatë bira tänȩmi̧ dari̧ biramȩ oa darämi̧ cjia̧dejȩ. 12Chirirä cjo̧ro̧ji̧ri̧ pio ji̧ri̧ chia oa, jadüchiami̧ ta chiaji̧ri̧ pio ji̧ri̧ chia oa, chia biramȩ oa darämi̧ cjia̧dejȩ. Ado coë jäji̧ri̧ pio ji̧ri̧bo chia oa, dami̧ti̧ pua chia oa darämi̧ cjia̧dejȩ chia biramȩ oa. Tjamo̧ davä. No̧i̧dë oa darämi̧ cjia̧dejȩ. 13Ado jëa̧iäpȩmo̧ ni̧bämȩ ju̧i̧ ta̧rërämi̧ cjia̧dejȩ ja̧di ta̧rëri̧ yo̧mȩ oa:
—Pedro, cjitëvä. Jaevä. Guna̧ ëte juravä —yo̧a̧dejȩ.
14Jabo Pedro judi dëbë yo̧mȩrȩ yo̧a̧dejȩ:
—Jabo cjäri̧ marequede ca̧ Ano̧mȩ. Cüdë Moicherë go̧ȩparërea̧ ma̧ȩ pio ju̧i̧iä, jabechji̧ cja̧rȩmȩ co jurarea̧ china̧chja oa juradëa̧requede —dëbë yo̧a̧dejȩ.
15Jabo pio jȩaiäpȩmo̧ ni̧bämȩ pio ju̧i̧ ado chjereno̧ ta̧rërämi̧ cjia̧dejȩ, ja̧di ta̧rëri̧ yo̧mȩ oa:
—Danȩ, Ütë tjamo̧ judi pio jiro jurarea̧ oa jabechji̧parȩa̧dejȩ. China̧chjadëparȩa̧dejȩ. Pio ju̧i̧iä ano mire jo̧rȩtatäremȩrenȩ. Jabechji̧ mȩnȩ, 'Aja̧, jurarea̧dëdida, juradëpea̧dida, pio jiro jurarea̧ üdë jabechji̧ china̧chjadida' quëna̧rërea̧ ji̧, ja̧di dari̧ quëna̧ jo̧rȩtadëtäremȩrenȩ yaba̧ —yo̧mȩrȩ dëbë yo̧a̧dejȩ.
16Ado ja̧di dari̧ darämi̧ cjiarëremȩde Pedro judi tjarari co. Tjarari̧ co ja̧di ta̧rëri̧ ni̧bämȩ oa ta̧rërämi̧ cjiarëremȩdejȩ. Ado ja̧dëa ji̧ chjaodëri̧ ado chjereno̧ buarëremȩde chjabana ana̧mi̧ darë a̧dëräpȩmo̧.
17Ado Pedro judi, '¿tjana̧pea̧ oa darämi̧ cjia tänȩa̧cjivadicoa? ¿tjana̧ yo̧rea̧ chiacjivadi' quëna̧ jo̧rȩtamȩrȩ cjiadiärëremȩde, ana̧ri̧ jo̧rȩtamȩrȩ. Ado judi ja̧di dari̧ jo̧rȩta̧ nö̧ta, Corenerio judi chjadüa̧ pumȩ pio judiro̧ go̧düdärärëreji̧ri̧dirȩ Chimo̧ ja̧ bëräpȩ. Pio ju̧ri̧pȩ cjo̧ro̧ji̧ri̧ pio ji̧ri̧iä, Joperäpȩ cjo̧ro̧ji̧ri̧ pio ji̧ri̧iä chjadëri̧ ta̧rëa̧ oaiä, “Aja̧, Chimo̧ ja̧ bë üdë, pio judide” yo̧a̧ oa ta̧rëa̧ oaiä, jabechji̧ chjadëri̧ go̧düdäräa̧dirȩ yu̧a̧rea̧ joë ya cotoi̧räpȩ ju̧ri̧. 18Ado goae tarari̧ ëna̧diäji̧ri̧rȩ iëno̧ë ta̧rëa̧dirȩ:
—Aja̧, Chimo̧ Pedro quȩmȩbearȩ ¿pio yidëde? —iëno̧ë ta̧rëa̧.
19Ado Pedro judi, jënȩ darämi̧ cjia̧ pio ju̧i̧ ana̧ri̧ jo̧rȩtamȩ oa yo̧a̧dejȩ Tjo tjamo̧ judi:
—Danȩ, tjarari̧ pumȩrȩ goëdaera̧pea̧diro̧mȩ. 20Jaevä. Cjitëno̧vä. Biravä. Pio ji̧ri̧ nö̧ta jätä earequedemȩ. Jabechji̧ nae chia cjiari̧ jo̧rȩtadëvä. Pio cüdë chjadüa̧ oa jana̧diro̧mȩ. Pio ji̧ri̧ nö̧ta jävä —yo̧a̧dejȩ.
21Pio ju̧i̧iä Pedro judi bireno̧a̧de. Ado pio jȩaiäpȩmo̧ jana̧reji̧ri̧ pio ji̧ri̧iäpȩmo̧ jea ëte yo̧a̧dejȩrȩ:
—Danȩrȩ, mȩnȩro̧ na̧era̧pea̧ pio judirequede cüdë. Jabo yo̧chji̧coe. ¿Tjana̧ japera̧pea̧nȩrȩ?
22Ado Pedro pio ju̧i̧ dëbë yo̧ji̧ri̧rȩ ja̧di ta̧rëri̧ yo̧a̧diro̧jo̧ȩ:
—Danȩ, Corenerio quȩmȩ judi, guadia ütë pio judi chjadüa̧ oa jana̧rea̧rȩ —yo̧a̧diro̧jo̧ȩ—. Aja̧, Ütë tjamo̧ pio ju̧i̧ quëna̧mȩrȩ cjo̧ro̧de, pio ju̧i̧iäpȩmo̧ jo̧rȩtamȩrȩ. Ado judio pio judiro̧ ba chia da maeadiro̧jo̧ȩ. Jabechji̧ pio jibëiäpȩmo̧ chjadëri̧ a̧doa̧ oaiä, ba chia dadiro̧jo̧ȩ. Ado danȩ, a̧dërimȩ mu̧i̧tjoi̧ pio judi Corenerio pio ju̧i̧iäpȩmo̧ yo̧a̧ oaiä jana̧rea̧rȩ. Aja̧, pio judi yo̧a̧ oaiä, mȩnȩ jibëa̧ bëräpȩ jätä yo̧a̧ oaiä, Corenerio judi pio mȩaiä chjadëri̧ ta̧rëpea̧ oa jätä yo̧a̧ oaiä, jabechji̧ pio ibë chjadüa̧diibe pio mȩa ëba baäpea̧ oa. Pio ju̧i̧iä jana̧rea̧ro̧mȩ —yo̧ji̧ri̧rȩ dëbë yo̧a̧diro̧jo̧ȩ Pedro ju̧i̧.
23Pio ju̧i̧ ta̧rëa̧ oaiä, Pedro judi yu̧a̧ tänȩrëremȩdejȩrȩ jënȩ cjo̧ro̧mȩ bëräpȩ. Judiro̧ chjadëri̧ jurapea̧ oa, chjadëri̧ mo̧a̧pea̧ oa, yu̧a̧ tänȩa̧dejȩrȩ.
Pedro judi järëremȩde Corenerio ja̧ bëräpȩ
Ado dopea̧rä, Pedro judi järëremȩde pio ji̧ri̧ nö̧ta. Ado Joperäpȩ quëna̧ji̧ri̧ pio judiro̧ yo̧a̧ri̧rȩ peaja̧di cho̧rë jäa̧diro̧jo̧ȩ. 24Ado judiro̧ go̧düa̧ dopea̧rä Checharea quȩmȩ bë ma̧ri̧räpȩ go̧düdäräa̧dirȩ, Coreneriorë cjo̧ro̧mȩräpȩ. Ado Coronerio judi jibëa̧ pumȩ pio ji̧ri̧ nö̧ta a̧dopea̧ oa cjiarëremȩde. Ado o ji̧ri̧iäpȩmo̧ ma̧ȩ chjadüa̧ oaiä, peaja̧di a̧dopea̧ oa cjiarëreji̧ri̧dirȩ. Jabechji̧ Pedro pio ju̧i̧ jidataji̧ri̧rȩ a̧dopea̧ oa cjiarëreji̧ri̧dirȩ. 25Ado Pedro judi jo̧räpȩ yu̧a̧däräa̧ ji̧, chjaodëri̧ ju chatura̧ dae chadäräa̧dejȩ Corenerio judi, ütë ju̧i̧iäpȩmo̧ japarëmi̧ cjiari̧.
26Jabo Pedro judi chjaodëri̧ mu̧i̧ cjitë tänȩmȩrȩ yo̧a̧dejȩ:
—Jabo cjäri̧ marenȩ. Ja̧di dari̧ japarea̧mi̧dëde. Cjitëvä. Pio mȩnȩmi̧ darequede. Pumȩ marequede. Pio ju̧i̧iä ütë oa japami̧ dari̧ japadëcoe. Jauëchjadërequede cüdë —yo̧a̧dejȩ.
27Ado Pedro judi Corenerio pio ju̧i̧ nö̧ta ni̧bä chjaomȩrȩ yu̧a̧de jo̧ tjo ana̧räpȩ, pumȩ no̧i̧dërë a̧dopamȩräpȩ. 28Ja̧dëa ji̧ Pedro judi yo̧a̧dejȩrȩ:
—Danȩrȩ, Abaraa̧ pio judiri ja̧dëmȩ pio ju̧i̧ ja̧ bëräpȩ yu̧a̧pea̧ üdë china̧chjade judio pio ji̧ri̧iä. Abaraa̧ pio judiri ja̧mȩ judi Abaraa̧ pio judiri ja̧dëmȩ pio ju̧i̧ nö̧ta ëba cjiarea̧mi̧dëde. China̧chjade ibëiä. Pio ju̧i̧ chjadëri̧ dabanȩrȩ peadëri ja̧. Jabo danȩrȩ, Ütë tjamo̧ judi chjadëri̧ dabapa tänȩa̧dique. 'Jabechji̧ pio jiro pumȩ judiro̧ china̧chjadëdiro̧da jabo ëba cjiarea̧mi̧diro̧da, pio ji̧ri̧ ja̧ bëräpȩ yu̧a̧rea̧mi̧dida' quëna̧pea̧ oa chjadëri̧ dabapa tänȩa̧dique Ütë tjamo̧ judi. 29Pio ju̧i̧iä chjaodëri̧ jana̧requede jauëräpȩmo̧ cjiadiärea̧ decjiari̧. Jabo danȩrȩ, chjadëri̧ yo̧chji̧coe yaba̧. ¿Tjana̧ ju̧i̧iä jana̧tä ma̧ȩ chjadüa̧renȩro̧que? Chjadëri̧ yo̧chji̧coe —yo̧mȩrȩ yo̧a̧dejȩrȩ Pedro judi.
30Ado Corenerio judi dëbë yo̧mȩrȩ yo̧rëremȩdejȩ:
—Tjana̧ ju̧i̧iädë, jabechji̧ a̧dërimȩ mu̧i̧tjoi̧ pio judi coa ma̧ȩ yürüa̧ oaiä, jana̧tä yo̧ chjadüa̧requedemȩ. Danȩ, jadüchiami̧ dori ja̧ pio yaba̧mi̧rä, dorë chjiaräpȩmo̧diäa̧rä, jabechji̧ Ütë pio ju̧i̧ ni̧bäremȩreconȩ Ütë tjamo̧ pio ju̧i̧iäpȩmo̧ ni̧bärea̧ japamitërä. Ca̧ bëräpȩmȩrȩ ni̧bäremȩreconȩ. Ado chjaodëri̧ idëpea̧dique üi̧ judi. A̧dë chjäte tatari̧ cjiamȩ chjibo oa ina̧mȩrȩ idëpea̧dique. 31Ado yo̧a̧dique: "Danȩ Corenerio, Ütë tjamo̧ judi ta̧rë ja̧boa̧de mȩnȩ ju̧i̧iäpȩmo̧ ni̧bäriäa̧ pio ju̧i̧” yo̧a̧dique. “Mȩnȩ tjamo̧ cjäri̧ ja̧boji̧ri̧ pio ji̧ri̧iäpȩmo̧ yürüriäa̧ pio ju̧i̧ daba daea̧de peaja̧di" yo̧a̧dique. 32"Ja̧di tara Jope quȩmȩräpȩ chjadüjȩrȩ pumȩ ji̧ri̧ Chimo̧ Pedro pio ju̧i̧ ëba ma̧na̧pea̧ oa. Ui ana̧ yuroro cjiadiäde, ado cja̧rȩmo̧ Chimo̧ quȩmȩ pio ju̧i̧ ja̧ bëräpȩ, ira̧ ja̧bepamȩ pio ju̧i̧ ja̧ bëräpȩ cjiadiäde.” yo̧a̧dique.
33Ado cüdë pio jiro ma̧ȩ oa ta̧rëa̧ oaiä, jo̧ȩra̧pe chjadüa̧requedejȩrȩ ca̧ pumȩ ji̧ri̧ pio mȩa ëba ma̧na̧pea̧ oa. Ado mȩnȩ chjadëri̧ japea̧renȩibe. Chjadëri̧ jana̧nȩ cüdë ma̧ȩ yürüa̧ oaiä. Ado yaba̧, pio yi a̧dopë cjiarea̧rȩ Ütë tjamo̧ ja̧ dacharo. Jabechji̧ ta̧rëtämi̧ cjiarea̧rȩ davä ma̧ȩ oa, Ütërë pio mȩaiäpȩmo̧ yürüa̧ ma̧ȩ oa. Ano̧mȩ judi pio ibëiäpȩmo̧ yürüpea̧ ma̧ȩ pio ju̧i̧ tjamo̧ri̧ ta̧rëtämi̧ cjiarea̧rȩ —yo̧mȩrȩ yo̧rëremȩdejȩ Corenerio judi Pedro ju̧i̧iäpȩmo̧.
Pedro judi a̧ra̧ano̧rëremȩdejȩrȩ Corenerio ja̧ bëräpȩji̧ri̧ oa.
34Ado pio ju̧i̧ ta̧rëa̧ oaiä, Pedro judi taruparëremȩde pumȩ pio ji̧ri̧iäpȩmo̧ ni̧bä chjaopea̧ ji̧. Ja̧di ta̧rëri̧ yo̧mȩrȩ yo̧a̧dejȩrȩ:
—Pio yaba̧ tjamo̧i̧ cjiari̧ dabamȩpea̧requede cüdë chjadëri̧ dabadërërea̧ ji̧ —yo̧a̧dejȩrȩ—. Danȩrȩ, Ütë tjamo̧ judi cja̧rȩmȩ codë ba chia maeara̧ da madejȩrȩ pumȩ ütëbodärä oa. 'Aja̧, o judiro̧ ji̧dë u̧i̧ ba chiadiro̧da' quëna̧rea̧ decjiari̧ jo̧rȩtamȩrȩ dadiibe ütëbo oa. Judio pio ji̧ri̧mo̧i̧ oa eadëmȩde jabo judiodë pio ji̧ri̧bo eamȩrȩ dadejȩrȩ, cja̧rȩmȩ ba chiara̧ —yo̧a̧dejȩrȩ—. 35Ado eami̧ pumȩ judi Ütë tjamo̧ pio ju̧i̧iäpȩmo̧ ba chia jo̧rȩtamȩrȩ ta̧rëdiärä judi, 'Aja̧, jabechji̧dica̧da' quëna̧ jo̧rȩtamȩrȩ dapadejȩ. Tjamo̧ davä. Eami̧ pumȩ judi, eami̧ chiriräpȩ cjo̧ro̧mȩ judi, eami̧ ma̧ȩ oa ni̧bämȩ judi Ütë tjamo̧ pio ju̧i̧iäpȩmo̧ ba chia jo̧rȩtamȩrȩ ta̧rëdiärä judi, 'Aja̧, jabechji̧dica̧da' quëna̧ jo̧rȩtamȩrȩ dapadejȩ —yo̧a̧dejȩrȩ—. 36Danȩrȩ ca̧ oti̧, Ütë tjamo̧ judi Icharai pio judiri ja̧ji̧ri̧ pio ji̧ri̧iäpȩmo̧ yürüa̧ ma̧ȩ pio ju̧i̧ chjiari daba jironȩrȩ. Aja̧, Jechu pio ju̧i̧ chjiari ma̧ȩ chjadëi̧ pio judide. Ado Jechu pio ju̧i̧iämo̧i̧ ori̧ bagari̧ ëba cjiarea̧ darea̧rȩ Ütë tjamo̧ pio ju̧i̧ nö̧ta. Jabechji̧ a̧ro̧rȩ jachi cjiami̧ dari̧ cjiarërea̧ ji̧, Jechu pio ju̧i̧iä ori̧ bagari̧ ëba cjiarea̧ darea̧rȩ pio ju̧i̧ nö̧ta. Tjamo̧ davä. Pumȩ ütëbodärä ja̧ Ano̧mȩ pio ju̧i̧iämo̧i̧ ori̧ bagari̧ ëba cjiarea̧ darea̧rȩ, judiodë pio judiro̧borë. Aja̧, pio ju̧i̧ chjiari daba jironȩrȩ peaja̧di. 37Ado danȩrȩ, Jechu judi Judea quȩmȩ chiri nö̧tai̧ oa japarërea̧ pio ju̧i̧ chjiari, judi Garirearäpȩ tarupë japarërea̧ pio ju̧i̧ chjiari peaja̧di daba jironȩrȩ. Jabechji̧ Juan judi a̧ra̧ano̧e cjiadiäa̧rä, uirä go̧e cjaeä chudapea̧ pio ju̧i̧ chjiari a̧ra̧ano̧e cjiadiäa̧rä, taruparëremȩde Jechu judi dami̧ti̧ oa japapea̧ ji̧. Aja̧, pio ju̧i̧ chjiari peaja̧di daba jironȩrȩ. 38Ado Ütë tjamo̧ judi Jechu ju̧i̧ mitëa̧ pio ju̧i̧ chjiari, Nacharerimȩ pio ju̧i̧ mitëa̧ pio ju̧i̧ chjiaribo peaja̧di daba jironȩrȩ. Ado Ütë tjamo̧ judi mitëa̧ pio ju̧i̧ yürüa̧dejȩ Tjo tjamo̧ pio ju̧i̧, jauëchjarea̧bo. Ado pio ju̧i̧iä judi oëra̧ti̧ oa tai̧a̧ ji̧, jabechji̧ chjadëri̧ japariämȩrȩ tai̧rëremȩde, yaröca chiaji̧ri̧ pio ji̧ri̧ chjadëri̧ chjaparȩmȩrȩ, yaröca pio ji̧ri̧iä conȩda̧ oa cjiaji̧ri̧ pio ji̧ri̧ chjadëri̧ a̧domȩrȩ. Jabechji̧ Ütë tjamo̧ pio judi ji̧dë ma ëba cjiarëremȩdejȩ. Ado pio ju̧i̧bo daba jironȩrȩ —yo̧a̧dejȩrȩ Pedro judi.
39—Ado danȩrȩ —yo̧a̧dejȩrȩ —pio a̧ro̧rȩ irä dae chjaorëreji̧ri̧rea̧ro̧jo̧ȩ. Tjamo̧ davä. Pio a̧ro̧rȩ, Jechurë chjadüa̧ pio judiro̧, irä dae chjaorëreji̧ri̧rearo̧jo̧ȩ Jechu judi ja̧di dari̧ japariä cjo̧ro̧rëremȩ oa. Judi Judiorë cjo̧ro̧mȩ chiriräpȩ jape chjaomȩ oa, judi Jerucharȩ bë ma̧ri̧räpȩ ju̧ri̧ jape chjaomȩ oa irä dae chjaorëreji̧ri̧rea̧ro̧jo̧ȩ davä ibëa̧ dachora̧. Jabo cjäri̧ madiro̧jo̧ȩ, toro cji̧de ja̧bo tänȩa̧diro̧jo̧ȩ. 40Jabo Ütë tjamo̧ judi tjarari̧ do chjätä ëte bëdü tänȩrëremȩdejȩ. Ado bëdüa̧ oa cjo̧ro̧mȩ pio ju̧i̧ da tänȩa̧diibe Ütë tjamo̧ judi. 41Jabo pumȩ ütëbodärä oa da tänȩdëa̧dejȩrȩ jabo pio ibëiäpȩmo̧ ma da tänȩa̧diibe, jënȩ pearä mitëa̧ pio ji̧ri̧iäpȩmo̧ ma. Ado danȩrȩ, ja̧boa̧remȩrȩ bëdüa̧ oa cjiamȩ pio ju̧i̧ nö̧ta ëba jura̧rea̧rȩ. Ado ëba jara̧rea̧ro̧jo̧ȩ peaja̧di. 42Ado pio judi to̧bari̧ yo̧a̧diibe davä, a̧ro̧rȩ pio jȩa chjiari ma̧ȩ chjadëi̧ pio ju̧i̧ a̧ra̧ano̧tä pumȩ pio ji̧ri̧iäpȩmo̧. Ado peaja̧di jënȩ ütarë bape chjaopea̧ pio ju̧i̧ chjiaribo a̧ra̧ano̧tä yo̧a̧diibe. Tjamo̧ davä. Ütë tjamo̧ judi pio jȩa mitëa̧ pio ju̧i̧ chjiari, pumȩ ütëbodärä oa ütarë bape chjaopea̧ pio ju̧i̧ chjiari, cjo̧ro̧ji̧ri̧ pio ji̧ri̧, ja̧boa̧ji̧ri̧ pio ji̧ri̧bo ütarë bape chjaopea̧ pio ju̧i̧ chjiari a̧ra̧ano̧tä yo̧rëremȩdiibe peaja̧di. 43Ado pio ju̧i̧ chjiari ütëborë ni̧bä marëreji̧ri̧dirȩ Ütërë ea jana̧ chjadüa̧ oa ni̧bäji̧ri̧ pio judiro̧, cja̧rȩmȩrȩ cjiadiädëri̧. "Aja̧, eami̧ pumȩ üdë, Jechu pio ju̧i̧ quëna̧mȩ pio judi, jabechji̧ jënȩ chjai̧dëri̧ japea̧ üdë duridëparȩa̧ oa cjiapade Ütë tjamo̧ pio judi tänȩa̧ oaiä” yo̧mȩ ma̧ȩ pio ju̧i̧ go̧ȩparëreji̧ri̧dirȩ jabërä. “Aja̧, Jechu judi pio ji̧ri̧ chjiari tuti japea̧ pio oaiä, duridëparȩa̧ oa cjiapadirȩ” yo̧mȩ ma̧ȩ pio ju̧i̧ go̧ȩparëreji̧ri̧dirȩ jabërä —yo̧mȩrȩ ni̧bä chjaorëremȩdejȩrȩ Pedro judi Corenerio ja̧ bëräpȩ a̧dopaji̧ri̧ pio ji̧ri̧.
44Ado Pedro judi jabë ni̧bä chjaoa̧ nö̧ta, chjaodëri̧ bëpera̧pea̧dejȩrȩ Tjo tjamo̧ judi. Ütë tjamo̧ ja̧ ma̧ȩ oa ta̧rëji̧ri̧ pio ji̧ri̧iäpȩmo̧ chjaodëri̧ bëpera̧pea̧dejȩrȩ. 45Ado Pedro pio ju̧i̧ nö̧ta jana̧reji̧ri̧ judio judiro̧ pio ju̧i̧ daea̧ oaiä, Jope bë ma̧ri̧ri pio judiri jana̧reji̧ri̧ judio pio judiro̧ pio ju̧i̧ daea̧ oaiä, jabechji̧ ana̧ri̧ jo̧rȩtaji̧ri̧pea̧dirȩ, gürü toboe cjiaji̧ri̧rȩ. Jabechji̧ pio judiro̧borë quëna̧ji̧ri̧pea̧räbo, 'Chia chia, Ütë tjamo̧ judi judiodë pio ji̧ri̧iäpȩmo̧bo yürüa̧diji̧ri̧da, Tjo tjamo̧ pio ju̧i̧ yürüa̧diji̧ri̧da, budoa̧ oa cjiadëji̧ri̧ pio ji̧ri̧iäpȩmo̧bo yürüa̧diji̧ri̧da, jibëa̧ icjararä bëpapea̧ oa yürüa̧diji̧ri̧da' quëna̧ jo̧rȩtaji̧ri̧rȩ coai̧tä coai̧tä dae cjiarëreji̧ri̧diro̧jȩrȩ. 46Jabechji̧ tjaoëpai̧ dari̧ ni̧bäji̧ri̧ oa ta̧rërëreji̧ri̧diro̧jȩrȩ, jënȩro̧ dabapadëa̧ ma̧ȩra̧ ni̧bäji̧ri̧ oa. Ütë tjamo̧ pio ju̧i̧iäpȩmo̧ chjacjiamȩri̧ ni̧bäji̧ri̧ oa ta̧rërëreji̧ri̧diro̧jȩrȩ.
Ado Pedro judi pio ji̧ri̧ daea̧ oaiä yo̧a̧dejȩrȩ jibëa̧ jadü pio ji̧ri̧iäpȩmo̧:
47—Danȩrȩ, pio yodëro̧je Tjo tjamo̧ pio ju̧i̧ chiaji̧ri̧pea̧diro̧jo̧ȩ. Ibëa̧ icjararä bëpera̧pea̧mi̧ bëpera̧pea̧dejȩrȩ peaja̧di. Pio ju̧i̧iä uirä go̧e cjaeä chuda̧ oa cjiatäreji̧ri̧dirȩ. 'Chudarea̧mi̧dëdiro̧da' quëna̧rea̧mi̧dëde. Jabechji̧ chudapea̧ maeadirȩ.
48Ado Pedro judi ja̧di ta̧rëri̧ yo̧ ëte, Jechu Quiricho pio ju̧i̧ ja̧ quȩrä go̧e cjaeä chuda̧ oa cjiatä yo̧rëremȩdejȩrȩ. Ado pio ju̧i̧iä Corenerio ja̧ bëräpȩ a̧dopea̧ oa cjiaji̧ri̧ pio judiro̧ uirä chuda̧ oa cjiaji̧ri̧pea̧dirȩ. Ado pumȩ judiro̧ chuda̧ oa cjia ëte, jabechji̧ tjarari̧ do cjiadiätä yo̧a̧diro̧jo̧ȩ Pedro ju̧i̧ pio jibë nö̧ta.
Pašlaik izvēlēts:
Japarea̧ 10: Pume
Izceltais
Kopēt
Salīdzināt
Dalīties
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
©2021 Global Partners, All Rights Reserved