मत्ती 14
14
यूहन्ना बपतिस्मा कोळावाळा अक कोनसुसोद
(मरकुस ६:१४-२९; लूका ९:७-९)
1आ समय दा चौथाई द्याश इन राजा हेरोदेस यीशु उन बारा दा चर्चा केळदुन, 2अदिक तान सेवकगोळ से अंदुन, “ईव यूहन्ना बपतिस्मा कोळावाळा हुन! आव सोत्तुर दा टु जित्ता आग्यान, इदुरसाटी आऊन से सामर्थ्य नव क्याल्सा प्रगट आगताव.”
3 #
लूका ३:१९,२० यतिकी हेरोदेस राजा तान वार्ट फिलिप्पुस उन हिंग्स हेरोदियास इन कारण, बपतिस्मा कोळावाळा यूहन्ना अक हुडुकु कटसुसदुन अदिक जयलखाना दा हाक्क बुट्टुन. 4यतिकी यूहन्ना आऊन से अंदिदुन कि तान स्यांळ्द वार्ट उन हिंग्स उक ईटोद नीन साठी उचित हैलेच. 5इदुरसाटी आव आऊक कोंद बुळोद चाहासोन, पर लॉकुर से अंजतोगोन यतिकी आंदुर बपतिस्मा कोळावाळा यूहन्ना अक भविष्यवक्ता मान्सतोगोर.
6लेकीन याग हेरोदेस उन जनम दिन बत्त, रा हेरोदियास इनोर पोर हाब्ब दा तान नाच तोर्सकु हेरोदेस उक खुश माळदुर. 7ईदुर मा आव किर्या तिनकु वचन कोट्टुन, “जो येनारा नी नानी बेळ्या, ना नीनी कोळाईन.”
8आक तान मोय इन भळकुसदुर देल ईद अंदुर, “यूहन्ना बपतिस्मा कोळावाळा अन्द ताल्ला टाटी दा ईटकु ईगल्या नानी ईल तंदकोळ.”
9राजा दुखी आदुन, लेकीन तान किर्या अन, अदिक सांगुळ कुरावाळेर कारण, आग्या कोट्टुन कि जो ई पोर अंदुर अद कोटकु आगुल. 10अदिक आव जयलखाना दा लॉकुरी कळुकु यूहन्ना अन्द ताल्ला कळसुस बुट्टुन; 11अदिक आऊन ताल्ला टाटी दा तनकु आत अदिक पोर इक कोटकु आत, अदरी आक तान मोय इन हात्ती ओतुर. 12आग यूहन्ना नोर चेलागोळ बंदुर अदिक आऊन लाश इक ओतकु नळ्सदुर, अदिक होगकु यीशु उक ईद समाचार कोट्टुर.
अईद हजार मंळसागोळी तिनसोद
(मरकुस ६:३०-४४; लूका ९:१०-१७; यूहन्ना ६:१-१४)
13याग यीशु यूहन्ना अन बारा दा केळदुन, रा आव ड्वांगा मा येरकु अल टु यातोदारा सुनसान जागा अक, आबना दा होटोदुन. लॉकुर ईद केळकु नगर-नगर टु पैदल अच आऊन हिंद आगेदुर. 14यीशु होटकु ऊंद धोळ्द भीळ नोळदुन अदिक आंदुर मा तरस तिंदुन, अदिक आंदुर्द बिमार मंळसागोळी चंगा माळदुन.
15याग द्याव आत रा आऊन चेलागोळ आऊन हात्ती बंदकु अंदुर, “ईद सुनसान जागा आद अदिक समय आगेग्याद; लॉकुरी विदा माळकु अन कि आंदुर मोहल्लागोळ दा होगकु तान साठी ऊमोद कोमुल.”
16पर यीशु आंदुर से अंदुन, “आंदुर्द होगोद जरूरी हैलेच! नीव अच इंदरी तिनली कोळी.”
17आंदुर आऊन से अंदुर, “ईल नाम हात्ती अईद रोट्टी अदिक येढ्ढ मेनगोळी बिटकु मात्त येनु हैलेच.”
18यीशु अंदुन, “अवरी नान हात्ती ईल तरी.” 19आग यीशु लॉकुरी काड्डा मा कुरली हेळदुन, अदिक आ अईद रोट्टीगोळी अदिक येढ्ढ मेनगोळी हुळदुन; अदिक स्वर्ग दी नोळकु धन्यवाद माळदुन अदिक रोट्टीगोळी मुरू मुरूकु चेलागोळी कोट्टुन, अदिक चेलागोळ लॉकुरी कोट्टुर. 20याग सप्पा लॉकुर तिनकु संतुष्ट आगेदुर, रा चेलागोळ मिक्कु तुकळागोळ दा टु तुमकु हन्नेळ फुट्टीगोळी नेगदुर. 21अदिक तिनावाळेर आर्तेर अदिक चिकोरगोळी बिटकु, अईद हजार मंळसागोळ हात्तीपास ईरोर.
यीशु उन नीर मा नळोद
(मरकुस ६:४५-५२; यूहन्ना ६:१५-२१)
22आग आव तुरन्त तान चेलागोळी ड्वांगा मा येरोरसाटी मजबुर माळदुन कि आंदुर आऊन से पयला आप्पाटी होटोगुल, आगासताका आव लॉकुरी सार माळ्यान. 23यीशु लॉकुरी सार माळकु, प्रार्थना माळली अलग पहाळ मा होटोदुन; अदिक द्यावगा आव अल आबना ईरोन. 24आ समय ड्वांगा किनारा टु दुर ईरोद अदिक झील इन न्याड्या दा नीर इन लयर देल लयरगोळ देल ईत्त आत्त आलगाळोद, यतिकी आँधी ड्वांगा अन्द ऊलट ईरोद.
25अदिक यीशु हुंजकुका अन मुर टु आर मुरा अन दरम्यान झील मा नळुतेला आंदुर हात्ती बंदुन. 26चेला आऊक झील मा नळुतेला नोळकु घबरूसेदुर. अदिक अनली कुरतुर, “ईव भूत हुन!” अदिक अंज्क इन मारा देल चिल्ळास कुरतुर.
27आग यीशु तुरन्त आंदुर से मातगोळी माळदुन अदिक अंदुन, “हिम्मत ईटी! ना हुईन, अंजबाळी!”
28पतरस आऊक उत्तर कोट्टुन, “हे प्रभु, अगर नीच हुय, रा नानी तान हात्ती नीर मा नळुकु बरोद आग्या कोळ.”
29आव अंदुन, “बा!” आग पतरस ड्वांगा मा टु ईळुकु यीशु उन हात्ती होगली नीर मा नळुली कुरतुन. 30पर हवा अक नोळकु अंजेदुन, अदिक याग मुळ्कली कुरतुन रा चिळ्लासकु अंदुन, “हे प्रभु, नानी ऊळ्स!”
31यीशु तुरन्त कय वाढ़ुस्कु आऊक हुडुकोंडुन अदिक आऊन से अंदुन, “हे अल्पविश्वासी, नी येती शंका माळ्द?”
32याग आंदुर ड्वांगा मा येरदुर, रा हवा रूकसेत. 33ईदुर मा आंदुर जो ड्वांगा मा ईरोर, आऊक दण्डवत माळकु अंदुर, “खराखुरा, नी परमेश्वर उन पार हुय.”
गन्नेसरत दा रोगीगोळी चंगा माळोद
(मरकुस ६:५३-५६)
34आंदुर आप्पाटी ईळुकु गन्नेसरत इन भूमी मा पोहचुसदुर. 35अलेर लॉकुर आऊक अर्त कोंडुर अदिक आस-पास इन पुरा प्रदेश दा समाचार कळुदुर, अदिक सब बिमार मंळसागोळी आऊन हात्ती तंदुर, 36अदिक आऊन से विनती माळली कुरतुर कि आव आंदरी तान कपळा अन्द पल्लाक अच मुट गोळुल; अदिक यास मुंदुर आऊक मुटदुर, आंदुर चंगा आगेदुर.
Pašlaik izvēlēts:
मत्ती 14: Haa25
Izceltais
Kopēt
Salīdzināt
Dalīties
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
The Holiya Bible © The Word for the World International and Holiya Translation Samithi, Kudwa, Gondia, Maharashtra 2025