Populāri Bībeles panti no Romans 1

Dalīties

Kayngukigatanka Pinilghiit Ungipat: Kiyaghneghem aghtughyaghqaanghilqii yugulilleghmun tamaghhaanun ugpeqilghiinun. Sivukluteng ungipaqegkaagut Jews‑enun taagken Gentile‑enun.

Taakut Pinilghiit Ungipat liigikestiinkut naten Kiyaghneghem nallghusaghaqutangi yuget elqughutngalleghminun. Ugpeqillghiniitgun Kiyaghneq tawaten piiquq. Katam Akuzitni Igaqegkani igaqngaaq, “Nallghughqegkaq Kiyaghneghem elqughutngallghanun kiyaghllequq neghyukluku ellnga.”

Kiyaghneghem ulimatanganeng nuna, yuget liigikngwaaghaqaat aghtughyaghqaanghillgha aghuliighigalnguq, ipallu Kiyaghneghutanga. Qaywa yuget esghaghpagningiteghngaaghmegtekek taakuk, paninang liisimakagket Kiyaghneghem ulimaaghakun. Enkaam yuget apalliitut whaten pilleghqameng, Nallukaghput Kiyaghnelgutanga.

Liisimakeghngaaghmegteggu Kiyaghneq, quulviigataat Kiyaghneghuluku, iqamsiqayugvikigataatlu. Yeghlegi sumeghtaghallghit Kiyaghneghmeng satngunaniqaagut, umyugiitlu liigiknaniqaagut.

qayughllak ipapilleq Kiyaghneghmeng ayuqelghii naavghusimaat iqlengamun. Enkaangam manigughaqiitlu, qepghaataqiitlu Kiyaghneghem ulimaaghi, avelghaghluku Ulimaghista ellnga katam. Ellnganguuq usuqsaghqaq quunperugllak kenlengunaan! Amen.

Qilagmeng Kiyaghneghem yuget liigikestii sakritutnguniluki, aghyuughlleqnilukillu seghleghqellghitnun, seghletunllu pillghitnun. Seghletun pillghita liigiknanightestiit Kiyaghneghem ipapillghaneng.

Tamaaken apalluqluku Kiyaghneghem pegtii atuqesqelluki seghleghqellghet piyukeghllakiit. Aghnat sex‑eyugnanighiit yuget, yeghlegi sex‑eyagutut aghnaalgutmeggneng. Tawateghpigaq yugetlu sex‑eyugnanighiit aghnat, yeghlegi sex‑eyaguteghllagtut yulgutmeggneng. Tawaten pikaatangitneng Kiyaghneghem aghyuughii yugusiitgun apalluqluki anaggutelleghllagit. Tamaakut yuget sumeghmeggni satngunghinniiqaat liisimakipiilleq Kiyaghneghmeng ayuqelghii. Enkaam Kiyaghneghem pegtii satngunghilngughnun sumeghtaghallghitnun, atughqaqenghisaqangitnunllu.

Peghqinghuniiqut iwernga nalluughtaqut. Enkaam manigughpenaan Kiyaghneq tuquyaghqaghhaanghilnguq, yeghlegi manigughaqiit kiyaghnengllaqateng yugsugnilnguut, qawaagsugnilnguut, teghikusaghsugnilnguut, nalighmeng nemeghyaghsugnilnguut.