Populāri Bībeles panti no Domano Ma̧ȩ 12

Dalīties

Quëna̧dëji̧ri̧ judiro̧ cjo̧ro̧mi̧ dari̧ cjo̧ro̧dëtäreji̧ri̧rea̧rȩ jabo jabechji̧, ibëa̧ tjo oa jëdano̧rea̧ yürütäreji̧ri̧rea̧ro̧jo̧ȩ Ütë tjamo̧ ju̧i̧, a̧ro̧rȩ jo̧rȩtarea̧ peaja̧ra̧ ano̧ mire jo̧rȩtarea̧mi̧ dari̧. Ado jo̧rȩtarea̧ peaja̧ra̧ jo̧rȩta̧ oaiä, jabechji̧ tjaoëpai̧ dari̧ cjo̧ro̧rea̧ daparea̧rȩ. Ado tjaoëpai̧ dari̧ cjo̧ro̧rea̧ daea̧ oaiä, jabechji̧ na̧e chiape järea̧ daparea̧rȩ Ütë tjamo̧ judi tjamo̧ri̧ ea̧ pio ju̧i̧ chjiari. 'Aja̧, ja̧di dari̧ cjo̧ro̧tä eadicoada, ja̧di dari̧ japatä eadicoada, cja̧rȩmȩ coëma cjiadiäa̧mȩ pio ju̧i̧ japatä eadicoada, pio jȩaiä goae tjamo̧ pio ju̧i̧ japatä eadicoada' quëna̧ jo̧rȩtarea̧ daparea̧rȩ.

Ja̧di tara ca̧ oti̧, Ütë tjamo̧ judi ibë cjäri̧ri̧ cjia da tara, jabechji̧ yo̧tarequededibe dibëa̧ icjara codë oa goe gu̧rori̧ yürümi̧ dari̧ yürütä Ütë tjamo̧ pio ju̧i̧iäpȩmo̧. China̧chjari̧, goaeri̧ pjea̧ cjitëmi̧ dari̧ tutitä yo̧tarequededibe, Ütë tjamo̧ pio ju̧i̧ ma̧ chiadëri̧ cjiaparȩrea̧mi̧ dari̧. Aja̧, ja̧di dari̧ yürütäreji̧ri̧rea̧ro̧jo̧ȩ chjacjiamȩ tjamo̧ri̧.

Ado danȩrȩ, a̧ro̧rȩ jidatarea̧ chia tara, jabechji̧ ma̧ chiadëri cjiaji̧ri̧rȩ cjo̧ro̧chji̧vä. Ado a̧ro̧rȩ chjai̧dëri̧ chjätäräbo, jabechji̧ ma̧ chjua cjo̧ro̧chji̧vä. Ado ji̧dë ma ni̧bächji̧jo̧ȩ ibëa̧ Amai̧ ju̧i̧.

Pio ju̧i̧iä yo̧requededibe. Danȩrȩ, eami̧ pumȩ üdë pio ibëiäpȩmo̧ chjai̧dëri̧ japarä judi, jabechji̧ chjai̧dë pio ju̧i̧iä boadäräa̧ oa cjiami̧ dari̧ cjiadë matäreji̧ri̧rea̧rȩ. Chjai̧dë pio ju̧i̧iä järidëpe bagadëtäreji̧ri̧rea̧rȩ jabo jabechji̧, chjadëra̧ pio ju̧ri̧ra̧ ba dëbë jape chjaotäreji̧ri̧rea̧ro̧jo̧ȩ. Judi chjai̧dëri̧ japea̧ pio ju̧i̧ boadärämi̧ dari̧ japatäreji̧ri̧rea̧rȩ chjadëri̧ japea̧ pio ju̧i̧iä.

Dibëa̧ dëbëti̧ra̧ chia tjamo̧ri̧ eachji̧jȩrȩ, pio ji̧ri̧ ba chiaparȩmi̧ dari̧ japaji̧ri̧rȩ. Jabechji̧ järi tjamo̧chji̧vä pio ji̧ri̧iäpȩmo̧ ba chia dapea̧ oa. Ado ibëa̧ pumȩ judiro̧ eami̧ oa chjadëri̧ japea̧ oaiä, jabechji̧ chjaodëri̧ ni̧bätäreji̧ri̧rea̧ro̧jȩrȩ ma̧ȩ chjadëra̧, nȩmȩparea̧ decjiari̧.

Danȩrȩ ca̧ oti̧, dibëa̧ dëbëti̧ra̧ chia eacji̧ quëna̧ japadëchji̧vä jabo tjamo̧ri̧ eachji̧vä dibëa̧ yadë maeara̧. Ado chjai̧dë pio ju̧i̧ eadë eadë dachji̧jo̧ȩ, jabo chjadë pio ju̧i̧ acji mitëmi̧ dari̧ ba chia dachji̧jo̧ȩ.

O judiro̧, dëdë, goae tjamo̧dëri̧ dëbë ni̧bätadirȩ goëdëri̧ cjiape bagaji̧ri̧rȩ. Jabo cjäri̧ ma ca̧ oti̧, ja̧di dari̧ cjo̧ro̧dëtäreji̧ri̧rea̧rȩ. Jabechji̧ a̧ro̧rȩ nö̧tarä yuro chjadëri̧ ëba cjo̧ro̧täreji̧ri̧rea̧ro̧jȩrȩ ibëa̧ pumȩ ji̧ri̧, chjarapë tai̧rea̧mi̧dëri̧.

Ado danȩrȩ ca̧ oti̧, ado yo̧requededibe. Eami̧ pumȩ üdë pio ibëiäpȩmo̧ chjai̧dëri̧ japarä judi, jabechji̧ ba dëbë japadëtäreji̧ri̧rea̧ro̧jo̧ȩ jabo jabechji̧, ma̧ chjua jo̧rȩtaji̧ri̧rȩ cjo̧ro̧täreji̧ri̧rea̧rȩ, ibëa̧ Ütë pio ju̧i̧iäpȩmo̧ chjuari̧ quëna̧ji̧ri̧rȩ. Jabechji̧ Ütë tjamo̧ pio judide tjamo̧ bape chjaomȩ judi, a̧ro̧rȩdë. Chja ja̧di, pio judi jo̧rȩtami̧ bape chjaotädejȩ. Peaja̧di ta̧rëri̧ go̧ȩpea̧ oa cjiade ma̧ȩ üdë, Ütërë yo̧rërea̧ ma̧ȩ üdë. Ta̧rëchji̧vä: "Aja̧, pio cüdërequede tjamo̧ bape chjaomȩ judi. Pio cüdë chjai̧dëri̧ japaji̧ri̧ pio ji̧ri̧ bape chjaoparequedejȩrȩ" yo̧diibe Ano̧mȩ judi. Aja̧, ja̧di ta̧rëri̧ go̧ȩparëremȩde no̧mȩ go̧ȩparëremȩ judi.

Ado danȩrȩ, to̧bari̧ ja̧bepachji̧vä. Ji̧dë ma järiji̧ri̧rȩ ja̧bepachji̧vä chumi̧dëri̧ cjiarea̧ decjiari̧. Jabechji̧ Tjo tjamo̧ pio ju̧i̧iä järiji̧ri̧rȩ ja̧bepachji̧vä ibëa̧ Ano̧mȩ ja̧ oa, cjo̧dërë goae tarari̧ gäri cjitëmi̧ dari̧.

Ütë tjamo̧ judi, pio judirimȩ marë pio coaiäpȩmo̧ cjäri̧ri̧ cjiamȩrȩ yürürëremȩdique ca̧ ja̧beparea̧ oa, cüdë chjadëri̧ japadëa̧ ba oa. Ado pio ju̧i̧iä yo̧requededibe ca̧ oti̧. Uëmo̧ uëmo̧ jo̧rȩtarea̧ decjiari̧ urëdi tjamo̧ oa jo̧rȩtatäreji̧ri̧rea̧rȩ ibëa̧ ja̧beparea̧ pio ju̧i̧ chjiari. Danȩrȩ, Jechu ja̧ icjararä cara̧ oa cjiami̧ dari̧ cjiarea̧rȩ. Ado pio judiri ja̧ji̧ri̧ oa yürürëremȩdiibe ibëa̧ ja̧beparea̧ oa cja̧rȩmȩ oa a̧dë chiquirea̧ decjiari̧. Ado pio ju̧i̧iä oëra̧ jo̧rȩtadëtäreji̧ri̧rea̧rȩ ca̧ pumȩ. 'O ji̧ri̧ u̧i̧ ba chiaquëda, ca̧ ja̧beparea̧ üdë ji̧dë u̧i̧ ba chia jirodida' quëna̧dë matäreji̧ri̧rea̧rȩ. Jabechji̧ Ütë tjamo̧ judi ibë yürüa̧ pio ju̧i̧ chjiari, a̧ro̧rȩ quëna̧ji̧ri̧ oa yürüa̧ pio ji̧ri̧ chjiari coëma cjiari̧ jo̧rȩtatäreji̧ri̧rea̧rȩ a̧ro̧rȩ pio ju̧i̧ ja̧ oa chjadëri̧ ja̧bepë yürüpea̧ oa.

Ibëiäpȩmo̧ chjai̧dëri̧ japamȩ pio ju̧i̧ ba dëbë japadëtäreji̧ri̧rea̧ro̧jo̧ȩ. Jabechji̧ a̧ro̧rȩ japea̧ chjö̧na̧i̧rȩ chjadë matäremȩde. Ado ja̧di dari̧ cjo̧ro̧a̧ oaiä, 'Aja̧, chjadëri̧ cjo̧ro̧diro̧da, jibë eadëmȩ pio ju̧i̧iäpȩmo̧bo chjadëri̧ japadiroju̧i̧da' quëna̧padirȩ pio ibë chjiari.

Ado danȩrȩ, cja̧rȩmȩ chji̧ chiami̧ dari̧ jo̧rȩtaji̧ri̧rȩ cjo̧ro̧täreji̧ri̧rea̧rȩ, jadüchiami̧ bubami̧ dadëri̧. Jabechji̧ cja̧rȩmȩ ba chiara̧ da matäreji̧ri̧rea̧ro̧jȩrȩ pumȩ ütëbo oa, 'o ji̧ri̧ u̧i̧ ba chiaquëda' quëna̧rea̧ decjiari̧. Jabechji̧ orë badë daea̧ pumȩ pio ji̧ri̧bo ba chia datäreji̧ri̧rea̧ro̧jȩrȩ. Jabechji̧ ibëa̧ chji̧rämo̧ jo̧rȩtatadëtäreji̧ri̧rea̧rȩ.

Pio ju̧i̧iä yo̧requededibe ca̧ oti̧. Pio ibëiäpȩmo̧ chjai̧dëri̧ japaji̧ri̧ pio ji̧ri̧ ba dëbë bape chjaodë matäreji̧ri̧rea̧ro̧jȩrȩ. Jabechji̧ bape japadëpea̧de. Peaja̧di dari̧ japatä yo̧diibe ma̧ȩ üdë. Ta̧rëchji̧vä: "Jabechji̧ judiro̧ ibë chjai̧dëri̧ japarä judi, chjadëri̧ japatäreji̧ri̧rea̧ro̧jȩrȩ. Ado judiro̧ ta̧mȩcho̧ ja̧borä judi, jurarea̧ oa yürütäreji̧ri̧rea̧ro̧jȩrȩ. Ado judiro̧ ui ja̧borä judi, peaja̧di ui yürütäreji̧ri̧rea̧ro̧jȩrȩ chjadëri̧. Ado a̧ro̧rȩ ja̧di dari̧ japea̧ oaiä, jabechji̧ idëri̧ cjiape bagaji̧ri̧rȩ ano̧ mire jo̧rȩtapai̧ dadirȩ pio ibë chjiari." Aja̧, ja̧di ta̧rëri̧ yo̧diibe.

Danȩrȩ, eami̧ pumȩ üdë pio ibëiäpȩmo̧ conȩdarä judi, jabechji̧ pio ju̧i̧ chjiari goë cjo̧dëtäreji̧ri̧rea̧rȩ. Tjamo̧ davä. Pio ju̧i̧ chjiari goë cjo̧dëtäreji̧ri̧rea̧rȩ Ütë tjamo̧ judi pio ju̧i̧iäpȩmo̧ cjäri̧ri̧ cjia dapea̧ oa. Aja̧, ja̧di dari̧ japapea̧de. Ütë ja̧ ërecjia̧ üdë pio ju̧i̧iäpȩmo̧ acji cjatätä goë cjo̧dëtärea̧ ji̧, cjäri̧ marea̧rȩ, chjadëri̧ goë cjo̧dëtäreji̧ri̧rea̧rȩ. Ado danȩrȩ, eami̧ pumȩ üdë ma̧ chiadëri̧ cjiarä judi, jabechji̧ ëba ma̧ chiadëri̧ cjiatäreji̧ri̧rea̧rȩ pio ju̧i̧ nö̧ta. Ado eami̧ pumȩ üdë gito ana̧ri̧ jo̧rȩtarä judi, peaja̧di gito ana̧ri̧ ëba jo̧rȩtatäreji̧ri̧rea̧ro̧jo̧ȩ.

Ado ibëa̧ oti̧ judiro̧ tjamo̧ cjäri̧ ja̧borä judi, jabechji̧ chjadëri̧ a̧dotäreji̧ri̧rea̧ro̧jȩrȩ judiro̧ jabëdiächea oa. Ado eami̧ pumȩ üdë tjaoëri jana̧rä judi, jabechji̧ ibëa̧ bëräpȩ ëba cjo̧ro̧täreji̧ri̧rea̧ro̧jo̧ȩ chjadëri̧.

Danȩrȩ, pumȩ icjara üdë ji̧ra̧ri̧ chiade. Cja̧rȩmȩ codërë no̧i̧dëri̧ chiade, jabo tjaoëti̧ chia ja̧beparea̧ chiade. Ado peaja̧dimi̧ dari̧ cjiade Quiricho ja̧ icjarami̧ da üdë. Danȩrȩ, quëna̧ji̧ri̧ judiro̧ ji̧ra̧rea̧rȩ, jabo cja̧rȩmȩ codërë cara̧ oa cjiarea̧rȩ Jechu pio ju̧i̧ nö̧ta. Aja̧, ji̧mo̧ ja̧ marea̧rȩ, cja̧rȩmȩ codërë cjiaji̧ri̧rȩ.