Populāri Bībeles panti no Domano Ma̧ȩ 10

Dalīties

Ado danȩrȩ, mȩnȩro̧ dibëa̧ chji̧ra̧ pio jiro ma̧ȩ oa quëna̧rä judi chjätärea̧ dapanȩrȩ. Tjamo̧ davä. Mȩnȩro̧ Jechu pio ju̧i̧ chjiari quëna̧rä judi, Ütë tjamo̧ judi Jechu pio ju̧i̧, ja̧boa̧remȩ pio ju̧i̧ bëdü tänȩa̧ pio ju̧i̧ chjiari quëna̧rä judi, ado dibëa̧ yara̧ pio ju̧ri̧ra̧ yo̧rä judi, “Aja̧, Jechu judi Ano̧mȩde” yo̧rä judi, jabechji̧ chjätärea̧ dapanȩrȩ.

Tjamo̧ davä. Jibëa̧ chji̧ra̧ quëna̧ji̧ri̧ pumȩ pio judiro̧, jibëa̧ yara̧ yo̧ji̧ri̧ pio judiro̧, jabechji̧ Ütë tjamo̧ pio judi tänȩa̧ oa jabechji̧parȩa̧ oa cjiadirȩ chjätärea̧mi̧ dari̧.

Jabo jabechji̧, eami̧ pumȩ üdë Ütë tjamo̧ ja̧ ma̧ȩ oa ta̧rërea̧ dadërä judi, quëna̧rea̧ dadëpade. Jabo chjadëri̧ ta̧rërea̧ darä judi, dëdë, quëna̧rea̧ dapade. Aja̧, Quiricho pio ju̧i̧ chjiari ma̧ȩ chjadëi̧ oa a̧ra̧ano̧mȩ pio ju̧i̧ ta̧rëa̧ oaiä quëna̧rea̧ dapade. Jabechji̧ ta̧rëa̧ pio ju̧i̧iämo̧i̧ cjitëde quëna̧rea̧ üdë.

Ado ja̧di ta̧rëri̧ go̧ȩpea̧ oa cjiade ma̧ȩ üdë ca̧ oti̧. Jabechji̧ eami̧ pumȩ üdë Jechu pio ju̧i̧iäpȩmo̧ quëna̧mȩ pio judi, jabechji̧ chjätärea̧ dapade idëri̧ cjiarea̧ decjiari̧, ma̧diä cjiarea̧ decjiari̧. Jabechji̧ pumȩ ütëbodärä ja̧ tjamo̧de. O ji̧ri̧ ja̧dë maeade jabo ütëbo ja̧de. Ado ju̧i̧iä yo̧requededibe, eami̧ judio üdë, eami̧ judiodë üdë quëna̧rä judi, jabechji̧ chjätärea̧ dapade. Jabechji̧ cja̧rȩmȩ ba chiara̧ da madejȩrȩ pumȩ ütëbodärä oa Ano̧mȩ judi. Aja̧, cja̧rȩmȩde judi. Ütëbodärä ja̧ Ano̧mȩde. Ado pumȩ ütëbodärä oa cja̧rȩmȩ ba chiara̧ da tara, jabechji̧ a̧dë chjäte chjadëri̧ japa madejȩrȩ pio jȩaiäpȩmo̧ quëna̧mȩ pio ju̧i̧. Peaja̧di ta̧rëri̧ yo̧diibe ma̧ȩ üdë. Eami̧ pumȩ üdë Ano̧mȩ pio ju̧i̧iä cjo̧dërä judi, jȩa a̧dotä cjo̧dërä judi, jabechji̧ chjadëri̧ a̧dopadejȩ chjätä tänȩrea̧mi̧ dari̧.

Ado a̧ra̧ano̧ji̧ri̧ pio ji̧ri̧ chjadüa̧ oa cjiadërä judi, Ütë tjamo̧ ja̧ ma̧ȩ pio ju̧i̧ a̧ra̧ano̧pea̧ oa chjadüa̧ oa cjiadërä judi, ¿yö̧ta dari̧ a̧ra̧ano̧a̧ oa cjiapade ma̧ȩ üdë? ¿Yö̧ta dari̧ ta̧rërea̧ dapadirȩ dabadëji̧ri̧ judiro̧? Danȩrȩ, Ütë tjamo̧ ja̧ ma̧ȩ oa a̧ra̧ano̧e jäji̧ri̧ pio ji̧ri̧ chjiari go̧ȩpea̧ oa cjiade ma̧ȩ üdë peadëri ja̧. Ta̧rëchji̧vä: "Aja̧, ma̧ȩ chjadëi̧ pio ju̧i̧ a̧de jäji̧ri̧ pio judiro̧ eami̧räpȩ go̧düdärärä, goae tjamo̧de. Tjamo̧ davä. Pio jiro ma̧ȩ chjadëi̧ pio ju̧i̧ goa jämȩ pio judi eami̧räpȩ järä, jabechji̧ a̧dë chjäte goae tjamo̧de pumȩ pio ji̧ri̧iä." Aja̧, ja̧di ta̧rëri̧ go̧ȩpea̧ oa cjiade ma̧ȩ üdë a̧ra̧ano̧e jäji̧ri̧ pio ji̧ri̧ chjiari.

Jabo danȩrȩ, pumȩ judiro̧ pio ju̧i̧ chjiari dabadërä judi, ¿yö̧ta dari̧ cjo̧dëpadiro̧jo̧ȩ? Pio ju̧i̧ iëno̧ë ta̧rërequededibe. Pumȩ judiro̧ orë dabadërä judi, 'Aja̧ Ano̧mȩ Jechu pio judidida' quëna̧ dabadërä judi, ¿yö̧ta dari̧ cjo̧dëpadiro̧jo̧ȩ pio jibëiäpȩmo̧ a̧dopea̧ oa? Aja̧ ca̧ oti̧, judiro̧ cja̧rȩmo̧ co ma̧ȩ oa ta̧rëdëa̧rä judi, ¿yö̧ta dari̧ quëna̧rea̧ dapadirȩ? Judiro̧ eami̧ a̧ra̧ano̧mȩ oa dadërä judi, judiro̧ eami̧ a̧ra̧ano̧mȩ oa ta̧rë charea̧ dadërä judi, ¿yö̧ta dari̧ ta̧rërea̧ dapadirȩ?

'Aja̧, Moicherë go̧ȩparërea̧ ma̧ȩ pio ju̧i̧iä jabechji̧parȩa̧ oa cjiapai̧ daa̧ro̧da' quëna̧ jo̧rȩtadirȩ. Jabo cjäri̧ madirȩ ca̧ oti̧, pio jiro ma̧ȩ oaiä jabechji̧parȩa̧ oa cjiarea̧mi̧dëde. Quiricho pio ju̧i̧iämo̧ jabechji̧parȩrea̧mi̧ dade. Pio judimo̧de Moicherë go̧ȩparërea̧ ma̧ȩ oa nö̧tadäräri̧ ta̧rȩdiäa̧mȩ judi. Pio ju̧i̧iä eami̧ pumȩ üdë pio ju̧i̧iäpȩmo̧ quëna̧rä judi, jabechji̧ Ütë tjamo̧ judi jabechji̧parȩpadejȩ.