‪This work is made available under the Creative Commons Attribution-ShareAlike 4‪.0 International License (CC BY-SA). To view a copy of this license, visit http://creativecommons.org/licenses/by-sa/4‪.0 or send a letter to Creative Commons, PO Box 1866, Mountain View, CA 94042, USA. ‪If this work is desired as a source text for modification, alternative dialect translation or other derivative work, permission must be sought from Strategic Resource Group. All such derivative work must indicate what changes have been made and attribute the work as follows: “The original work by Strategic Resource Group is available for free on YouVersion and www.Bible.com." ‪You must also make your derivative work available under the same license (CC BY-SA). Strategic Resource Group may be contacted at info@srginc.org.

کِتابِ مُقدّس سرائیکی ترجمہ

Modern Central Saraiki Bible © 2024 Strategic Resource Group

اُوں ویلے یسُوع بِھیڑ تے آپنڑے شاگرداں کُوں آکھیا جو ”شریعت دے عالم تے فریسی مُوسیٰ دی گدّی اُتے بیٹھے ہِن۔ بس جیہڑا کُجھ او تُہاکُوں سِکھاوݨ او سبھ منّو تے اُوندے اُتے عمل کرو۔ پر اُنہاں وانگُوں کم نہ کرو کیوں جو او آدھے تاں ہِن پر عمل نئیں کریندے۔ او ایجھے بھاری وزن جِنہاں کُوں چاوݨ اوکھا ہے، بَدھ تے لوکاں دے مونڈھیاں اُتے رکھیندے ہِن، پر آپ اُنہاں کُوں انگل وی نئیں لیندے۔ او آپنڑے سبھ کم لوکاں کُوں ڈِکھاوݨ کیتے کریندے ہِن۔ او وڈے تعوِیذ پیندے ہِن، تے آپنڑی پُشاک دے گھیرے چوڑے رکھیندے ہِن۔ او دعوتاں تے عبادت خانیاں ءچ اُچے درجے دیاں کُرسیاں، بازاراں ءچ سلام تے آدمیاں کنُوں ربّی اکھواوݨ پسند کریندے ہِن۔
پر تُساں ربّی نہ اکھواؤ کیوں جو تُہاڈا اُستاد ہِکو ہے یعنی مسیح، تے تُساں سبھ بِھرا ہیوے۔ زمین اُتے کہیں کُوں آپنڑا باپ نہ آکھو کیوں جو تُہاڈا باپ ہِکو ہے جیہڑا اسمان اُتے ہے۔ نہ تُساں ہادی اکھواؤ کیوں جو تُہاڈا ہِکو ہادی ہے یعنی المسیح۔ پر جیہڑا تُہاڈے ءچوں وڈا ہے او تُہاڈا خادم بنڑے۔ کیوں جو جیہڑا کوئی آپنڑے آپ کُوں وڈا بنڑیسی او چھوٹا کیتا ویسی تے جیہڑا آپنڑے آپ کُوں چھوٹا بنڑیسی او وڈا کیتا ویسی۔

شریعت دے منافق عالمو تے فریسیو، تُہاڈے اُتے افسوس! تُساں اسمان دی بادشاہی لوکاں کیتے بند کریندے ہیوے۔ تُساں نہ تاں آپ داخل تھیندے ہیوے تے نہ اُنہاں کُوں جیہڑے داخل تھیوݨ چاہندے ہِن داخل تھیوݨ ڈیندے ہیوے۔ [شریعت دے منافق عالمو تے فریسیو، تُہاڈے اُتے افسوس! تُساں بیوہ عورتاں دے گھراں اُتے قبضہ کر گِھندے ہیوے تے ڈِکھاوے کیتے لمبیاں لمبیاں دُعاواں کریندے ہیوے۔ تُہاکُوں زیادہ سزا مِلسی۔]
شریعت دے منافق عالمو تے فریسیو، تُہاڈے اُتے افسوس! تُساں ہِک مُرید بنڑاوݨ کیتے تری تے خشکی دا سفر کریندے ہیوے تے جِیں ویلے بنڑا گِھندے ہیوے تاں اُونکُوں آپنڑے کنُوں ڈُونڑا جہنم دا حقدار بنڑا ڈیندے ہیوے۔
اندھے راہنماؤ، تُہاڈے اُتے افسوس! تُساں آدھے ہیوے جو جے کوئی ہیکلدی قَسم کھاوے تاں کوئی ہرج نئیں، پر جے ہیکل دے سونے دی قَسم کھاوے تاں اُوندا پابند ہوسی۔ اندھے بیوقُوفو، وڈا کیا ہے سونا یا ہیکل جئیں سونے کُوں پاک کیتے؟ تے وَل آدھے ہیوے جو جے کوئی قُربان گاہ دی قَسم کھاوے تاں کوئی ہرج نئیں پر جیہڑی نذر اُوندے اُتے پیش کیتی ویندی ہے جے اُوندی قَسم کھاوے تاں اُوندا پابند ہوسی۔ اندھیو! وڈی چیز کیہڑی ہے نذر یا قُربان گاہ جیہڑی نذر کُوں پاک کریندی ہے؟ بس جیہڑا کوئی قُربان گاہ دی قَسم کھاندے او اُوندی تے اُوندے اُتے پیش کیتی ونجنڑ آلیاں سبھ چیزاں دی قَسم کھاندے۔ تے جیہڑا کوئی ہیکل دی قَسم کھاندے او اُوندی تے اُوندے ءچ راہنڑ آلے دی قَسم کھاندے۔ تے جیہڑا کوئی اسمان دی قَسم کھاندے او خُدا دے تخت دی تے اُوندے اُتے بَہنڑ آلے دی قَسم کھاندے۔
شریعت دے منافق عالمو تے فریسیو، تُہاڈے اُتے افسوس! تُساں پُودینے، سونف تے زِیرے دا ڈاہواں حصہ تاں نذر دے طور تے ڈیندے ہیوے پر شریعت دے زیادہ وزنی گالھیں یعنی اِنصاف، رحم تے اِیمان کُوں تُساں چھوڑ ڈِتے۔ لازم ہا جو ایہ وی کریندے تے او وی نہ چھوڑیندے۔ اندھے راہنماؤ! تُساں مچھر کُوں تاں چھنڑیندے ہیوے پر اُوٹھ کُوں نِگل ویندے ہیوے۔
شریعت دے منافق عالمو تے فریسیو، تُہاڈے اُتے افسوس! تُساں پیالے تے تھالی کُوں باہر کنُوں تاں صاف کریندے ہیوے پر اُنہاں ءچ لُٹ دا مال تے بُرائی بھری پئی ہے۔ اندھے فریسی! پہلے پیالے تے تھالی کُوں اندر کنُوں صاف کر تاں جو او باہر کنُوں وی صاف تھی ونجنڑ۔
شریعت دے منافق عالمو تے فریسیو، تُہاڈے اُتے افسوس! تُساں سفیدی تھیّاں ہوئیاں قبراں وانگُوں ہیوے جیہڑیاں باہر کنُوں تاں سوہنڑیاں نظر آندیاں ہِن پر اندرُوں مُردیاں دیاں ہڈیاں تے ہر طرحاں دی پلیتی نال بھریاں ہِن۔ اِینویں ای تُساں وی باہر کنُوں تاں لوکاں کُوں نیک نظر آندے ہیوے پر اندرُوں منافقت تے بے دینی نال بھرے پئے ہیوے۔

شریعت دے منافق عالمو تے فریسیو، تُہاڈے اُتے افسوس! تُساں نبیاں دیاں قبراں بنڑیندے تے ولِیاں دے مقبرے سَجیندے ہیوے۔ تے آدھے ہیوے جو جے اساں آپنڑے پِیُو ڈاڈے دے زمانے ءچ ہوندے تاں نبیاں دے قتل کرݨ ءچ اُنہاں دا ساتھ نہ ڈیندے۔ اِینویں تُساں آپ ای منیندے ہیوے جو تُساں نبیاں دے قاتلاں دی نسل ہیوے۔ بس آپنڑے پِیُو ڈاڈے دیاں حرکتاں دی کمی تُساں پُوری کر ڈیؤ۔ سَپو! نانگ دے بالو! تُساں دوزخ دی سزا کنُوں کِینویں بچسو؟
اِیں واسطے ڈیکھو، مَیں نبیاں تے داناواں تے شریعت دے عالماں کُوں تُہاڈے کولھ بھجیندا ہاں۔ تُساں اُنہاں ءچوں کُجھ کُوں قتل کر تے صلیب اُتے چڑھیسو تے کُجھ کُوں آپنڑے عبادت خانیاں ءچ کوڑے مریسو تے ہر شہر ءچ سَتیندے راہسو۔ اِینویں سارے نیک لوکاں دا خون جیہڑا زمین اُتے وہایا گِیا ہا، تُہاڈے اُتے آسی یعنی راستباز ہابل دے خون تُوں گِھن تے برکیاہ دے پوتر زکریاہ دے خون تئیں جِینکُوں تُساں ہیکل تے قُربان گاہ دے وچال قتل کیتا۔ مَیں تُہاکُوں سچ آدھا ہاں جو اِیں زمانے دے لوکاں کُوں اِنہاں سارے گالھیں دا ذمہ دار کھڑایا ویسی۔

یروشلیم! یروشلیم! تُوں جیہڑا نبیاں کُوں قتل کریندیں تے جیہڑے تیڈے کولھ بھیجے گئے اُنہاں کُوں سنگسار کریندیں۔ مَیں کِتی پھیری ایہ چاہیا جو تیڈے بالاں کُوں اِینویں جمع کر گِھناں جِینویں مُرغی آپنڑے چُوچیاں کُوں آپنڑے پراں تلے جمع کر گِھندی ہے پر تُوں راضی نہ تھیّا۔ ڈیکھو تُہاڈا گھر تُہاڈے کیتے ویران چھوڑیا ویندے۔ کیوں جو مَیں تُہاکُوں آدھا ہاں جو تُساں میکُوں ہُنڑ کنُوں اُوں ویلے تئیں وَل نہ ڈیکھسو جئیں تئیں ایہ نہ اکھیسو جو ’مُبارک ہے او جیہڑا رب العالمین دے ناں تُوں آندے‘۔“

Klausīties متّی 23