If you would like a copy of this version please contact info@davaraudiobibles.org

Lhomi New Testament

ॱसीम् च्‍यङ्‌जो़त् झ्‍यीन दो़च्‍च्‍यीत्। खीत्‍रङ्‌गी छ्‌यो़सीम् ॱसम्‍बे लेमु घयेत् दी मी ॱयोङ्‌म घयेक्‍की थोङ्‌ज्‍येगी ढीक्‍ल मत् झ्‍यीज्‍यीत्। हुन्‍दुक् झ्‍यीन ॱनी, तेङ् यी़न स्‍युगेन् खीत्‍रङ्‌गी यप् च्‍यानी खीत्‍रङ्‌ल ॱल घन्‍ड अक् मीत् युङ्‌गेन् बेत्। हीगो झ्‍यीनी खीत्‍रङ्‌गी टङ्‌बुल ज्‍यीम्‍ब तोङे यङ्‌ल छ्‌यीलेल नङ् मत् लेबे मी हुब डस्‍सी कुरीक्‍की ॱह घोस्‍सल तम्‍दो़क्‍की कङ्‌लीङ् भी़ब डस्‍सी मत् झ्‍यीज्‍यीत्। हुबे रोरङ्‌सोल मी घयेत् च्‍यानी तो़प्‍प युङ्‌ज्‍येल छ्‌यो़गी छोगङ्‌दु धङ् ॱसट्‌टक्‍तु उक् हुन्‍दुक् झ्‍यीन झ्‍यीक्‍केन् बेत्। ङे खीत्‍रङ्‌ल गन्‍दीय ॱस्‍येत् योङ्। हुबल उजो़त् च्‍यीक्‍रङ् बेत्। हुले ॱल्‍हक्‍मी़ ॱल हुबल ॱमीत् थोप्‍केन् बेत्। खीत्‍रङ्‌गी ज्‍यीम्‍ब तोङे यङ्‌ल लक्‍प ॱयेबे तीर दी लक्‍प ॱयेम्‍मे ॱह मत् घोव झ्‍यीज्‍यीत्। हुन्‍दुक् झ्‍यीन मी ॱयोङ्‌मागी ॱमत् ॱस्‍यीबाल ज्‍यीम्‍ब तोङ्‌ज्‍यीत्। मी ॱयोङ्‌गी ॱमत् थोङ्‌न आक्, खीत्‍रङ्‌गी यप्‍की थोङ्‌गेन् बेत्। हुनी खोङ्‌गी खीत्‍रङ्‌ल हुगी केत्‍मीत्‍ल झ्‍यीबे ॱल दी ॱनङ्‌गेन् बेत्।

खीत्‍रङ् ॱसुव तोबे यङ्‌ल छ्‌यीलेल नङ् मत् लेबे मी हुब डस्‍सी मत् झ्‍यीज्‍यीत्। हुबे रोरङ्‌सो मी घयेत्‍ल तो़न्‍ज्‍ये ॱनो़बे ॱसीम् खुर्न छ्‌यो़गी छोगङ्‌दु धङ् ज्‍यलम् ॱसुम्‍जोम्‍दु उक् टङ् टङ्‌ल लोङ्‌न ॱसुव तोप्‍केन् बेत्। खीत्‍रङ्‌ल ङे गन्‍दीय ॱस्‍येत् योङ्। हुबल थोब दी उजो़त् च्‍यीक्‍रङ् बेत्। हुले ॱल्‍हक्‍मी़ ॱल हुबल ॱमीत् थोप्‍केन् बेत्। हीगो डस्‍सी मेम्‍ब, ॱसुव तोबे यङ्‌ल रङ् खीम्‍ल स्‍युन गोच्‍च थम् च्‍येत्‍न, हुनी ॱमीक्‍की ॱमीत् थोङ्‌सल स्‍युगेन् रङ्‌गी यप्‍ल ॱसुव तोप्‍च्‍यीत्। ढुज्‍युक्‍नी ॱसुव तब दी रङ्‌गी यप्‍की थोङ्‌न खोङ्‌गी हुगी लेन् दी रङ्‌ल ॱनङ्‌गेन् बेत्। खीत्‍रङ्‌गी ॱसुव तोबे यङ्‌ल को़न्‍ज्‍योक् ॱस्‍यो़च्‍च्‍ये मीप्‍पे ज्‍यी़त् ॱयोङ् ॱयोङ्‌गी मी डस्‍सी धो़म्‍मीक्‍की यो़न्‍दो़न् ॱमत् च्‍योर्च्‍यीत्। गज्‍येन् च्‍योर्न ॱनी, हुबे ॱसीम्‍ल को़न्‍ज्‍योक्‍की ॱसेङ्‌गो़ट्‌टो ॱनो़ब खुर्केन् बेत्। हुगो डस्‍सी मत् झ्‍यीज्‍यीत्। खीत्‍रङ्‌ल घन्‍डे गो़बे तोक्‍प दुक्‍क हुगी ढीक्‍ल खीत्‍रङ्‌गी स्‍युव ज्‍यक् ज्‍यक्‍ले एल्‍ला खीत्‍रङ्‌गी यप्‍ल हुगो ॱस्‍यो़च्‍च्‍ये युङ्‌गेन् बेत्। खीत्‍रङ्‌गी ॱसुव दी हीन्‍दुक् सीन्‍न तोप्‍च्‍यीत्।
तेङ् यी़न स्‍युगेन् ङीक्‍की यप् नीज्‍यरङ्‌गी चङ्‌म हीम्‍बे छेल्‍ल तो़प्‍प युङ्‌ज्‍ये यो़प्‍प स्‍योक्‍च्‍यीत्। नीज्‍यरङ्‌गी ज्‍यागक् हीदु छुज्‍ये यो़प्‍प स्‍योक्‍च्‍यीत्। नीज्‍यरङ्‌गी थुल यो़प्‍पे ढो़ घयेत् इगी तेङ् यी़दु झ्‍युङ डस्‍सी हीदु जम्‍बुलीङ्‌दु उक् युङ्‌ज्‍ये यो़प्‍प स्‍योक्‍च्‍यीत्। हरीङ् ङीत्‍ल ङीन् रीदङ् रील गो़बे सम ॱनङ्‌रो झ्‍यी। ङीत्‍ल ॱसी़ ङीब झ्‍यी यो़दङ् हुगो ङीक्‍की धक्‍तु ची़प्‍प डस्‍सी ङीक्‍की ङीब अक् नीज्‍यरङ्‌गी धक्‍तु ची़त्‍रो झ्‍यी। नीज्‍यरङ्‌गी ङीत्‍ल छो़त्‍लीन् तरो ॱमत् ॱनङ, बोर दी़त्‍ङेन् हुगी लक्‍ल ॱस्‍योर्तु ॱमत् ची़प्‍प, छ्‌यीरो झ्‍यी।
खीत्‍रङ्‌गी ॱयोङ्‌गी ङीब धक्‍तु ची़त्‍न ॱनी, तेङ् यी़न स्‍युगेन् खीत्‍रङ्‌गी यप्‍की इक् खीत्‍रङ्‌गी ङीब धक्‍तु ची़क्‍केन् बेत्। ॱनी यङ् खीत्‍रङ्‌गी ॱयोङ्‌गी ङीब धक्‍तु ॱमत् ची़त्‍न ॱनी, खीत्‍रङ्‌गी यप्‍की इक् खीत्‍रङ्‌गी ङीब धक्‍तु ॱमीत् ची़क्‍केन् बेत्।

खीत्‍रङ् ॱनुक्‍नेल स्‍युक्‍पे यङ्‌ल छ्‌यीलेल नङ् मत् लेबे मी हुब डस्‍सीगी ङो नक्‍पु झ्‍यीन ॱमत् तो़न्‍ज्‍यीत्। हुबे रोरङ्‌सो ॱनुक्‍नेल स्‍युब दी मील तो़न्‍ज्‍येल फोप्‍नेत् छ्‌याब डस्‍सी झ्‍यीन गीर्केन् बेत्। खीत्‍रङ्‌ल ङे गन्‍दीय ॱस्‍येत् योङ्। हुबल थोबे ॱल दी उजो़त् च्‍यीक्‍रङ् बेत्। रङ् ॱनुक्‍नेल स्‍युक्‍पे यङ्‌ल झ्‍येत्‍ङे टी़न गोल ॱनुम् ॱही़न्‍न ॱङच्‍च्‍यी़न् तबु पम्‍बोक्‍म झ्‍यीज्‍यीत्। हुनी क रङ्‌गी ॱनुक्‍नेल देप्‍प दी मी ॱयोङ्‌गी ॱह मत् घोन अक्, रङ्‌गी यप्‍की थोङ्‌गेन् बेत्। हुनी रङ्‌गी ढुज्‍युक्‍तु ॱनुक्‍नेल देप्‍पे ॱल दी खोङ्‌गी ॱनङ्‌गेन् बेत्।

खीत्‍रङ्‌गी जम्‍बुलीङ् हीदु नोर् ॱमत् ॱसक्‍च्‍यीत्। हीदु मुक्‍प छ्‌येक्‍केन्, च छ्‌यागेन्, ॱनी की़न्‍नक्‍प ॱस्‍योर्केन् बेत्। बोर खीत्‍रङ्‌गी नोर् दी तेङ् यी़दु ॱसोज्‍यीत्। इगीदु मुक्‍प अक् ॱमीत् छ्‌येक्‍केन् बेत्। च आक् ॱमीत् छ्‌यागेन् बेत्। ॱनी की़न्‍नक्‍प आक् ॱमीत् ॱस्‍योर्केन् बेत्। रङ्‌गी नोर् दी घदु यो़दङ् हुदु रङ्‌गी ॱसीम् दी इक् डोगेन् बेत्।
ली़गी बत्‍ती दी ॱमीक् बेत्। ॱनी रङ्‌गी ॱमीक् दी ॱसेबोक्‍म यो़त्‍न ॱनी, ली़बु छङ्‌मल मेङ्‌ग युङ्‌गेन् बेत्। ॱनी यङ् रङ्‌गी ॱमीक् दी ङेम्‍बोक्‍म यो़त्‍न ॱनी, ली़बु दी इक् छङ्‌म मेन्‍नक् ॱनक् थीङीय युङ्‌गेन् बेत्। हीगो डस्‍सी रङ्‌गी ली़गी मेङ्‌ग दी मेन्‍नक्‍ल ॱसोङ्‌न ॱनी, हरुङ् हुगी मेन्‍नक् दी ॱसुम्‍ब ॱनक् थीङीय युङ्‌गेन् बेत्।
मी ॱसी़ इक् ज्‍यीन्‍दक् ॱङील स्‍यप्‍च्‍यी़ ज्‍युक् ॱमीत् छुगेन् बेत्। हुगी च्‍यीक्‍ल मीत् गुव झ्‍यीक्‍केन् बेत्। च्‍यीक्‍ल धेस्‍सी झ्‍यीक्‍केन् बेत्। च्‍यीक्‍तङ् ज्‍यर्केन् बेत्। च्‍यीक्‍तङ् मीत् ज्‍यर्केन् बेत्। खीत्‍रङ्‌गी को़न्‍ज्‍योक् धङ् नोर् ज्‍यीन्‍दक् ॱङील स्‍यप्‍च्‍यी़ ज्‍युक् ॱमीत् छुगेन् बेत्।

हीगी ढीक्‍ल ङे खीत्‍रङ्‌ल ॱस्‍येत् योङ्। खीत्‍रङ्‌गी मीजील घन्‍ड सज्‍ये ब अक्? घन्‍ड थुङ्‌ज्‍ये ब अक्? घन्‍ड घो़न्‍ज्‍ये ब अक् ॱनो़बे च्‍युगा ॱमत् खुर्च्‍यीत्। समले ॱसीम् चा छ्‌यीया मेम्‍बेक्‍क ॱनी? घो़ले सी़बु चा छ्‌यीया मेम्‍बेक्‍क ॱनी? ॱनम्‍गी झ्‍यज्‍युङ्‌म घयेत्‍ल तेन नम् च्‍यो़त्। हुबे ॱसो़न् तोप्‍च्‍ये न, न तो़न्‍दोक् दी़च्‍च्‍ये न, न जो़त्‍ल ॱलुक्‍च्‍ये। ॱनी हुन्‍दुक् झ्‍यीबल अक् त तेङ् यी़न स्‍युगेन् खीत्‍रङ्‌गी यप्‍की सम ॱनङ्‌गेल्‍ल, ॱनी हुबले त खीत्‍रङ् चा छ्‌यीया मेम्‍बेक्‍क ॱनी? च्‍युगा खुर्नी खीत् ॱसु दीगी रोरङ्‌गी छी दी ठु घङ्‌गी ची ज्‍योङ् छुगो़त् सीक्‍केन्? ॱनी यङ् घो़गी ढीक्‍ल घन्‍डल च्‍युगा खुर्केन्? पक्‍कल ॱङोमक्‍की मीन्‍दोक् घन्‍दुक् झ्‍यीन ॱस्‍यर्कुक्‍क हुल तेन नम् च्‍यो़त्। हुबे कले च्‍यो़च्‍च्‍ये न, न की़त्‍तोक् खेज्‍ये। हीगी ढीक्‍ल ङे ॱस्‍येत् योङ्। ज्‍याबु सोलोमन्‍गी तो़प्‍प च्‍येम्‍मे नम्‍सा ज्‍येम्‍बे यङ्‌गी तेक्‍मुले त ॱङोमक् च्‍यीक्‍ल को़म्‍बे हुगी घो़ हुगो लेबा युङ्‌गेन् बेत्। ॱवे छ्‌य गन्‍दीक्‍म मीत् स्‍योक्‍केन्‍सो। हरीङ् कीनी, नेम्‍बेत् मील ॱहे तोङ्‌गेङ्‌गी ॱङोमक्‍ल आक् त को़न्‍ज्‍योक्‍की नुक्‍मे घो़ को़ङ्‌गुक् सीन्‍न ॱनी, हुले ॱसुम्‍ब खीत्‍रङ् चा छ्‌यीया ॱसम्‍न को़ङ्‌गेन् मेम्‍बेक्‍क ॱनी? हुगो झ्‍यीनी खीत्‍रङ्‌गी घन्‍ड सज्‍ये ब अक्? घन्‍ड थुङ्‌ज्‍ये ब अक्? घन्‍ड घी़न्‍ज्‍ये ब अक् ॱनो़बे च्‍युगा ॱमत् खुर्च्‍यीत्। ज्‍यी़त् ॱयोङ् ॱयोङ्‌गी मी घयेक्‍कीरङ् हुन्‍दुक् झ्‍यीबे ॱसम्‍ल तोङ्‌गेन् बेत्। हुगो डस्‍सी मेम्‍ब, खीत्‍रङ्‌ल घङ् गो़बे खोज्‍येत् घयेत् तेङ् यी़न स्‍युगेन् खीत्‍रङ्‌गी यप्‍ल कुरीक् ॱस्‍यो़च्‍च्‍ये युङ्‌गेन् बेत्। ॱअल म दी धो़न् ङोम दी खोङ्‌गी ढुङ्‌दु ढङ्‌बु थो़म्‍बे लेमु दी धङ् को़न्‍ज्‍योक्‍की ज्‍यागक् दी खीत्‍रङ्‌गी चा छ्‌यीस्‍स्‍यो हीम्‍ब ॱसम्‍न हुगी ॱवङ्‌ल ॱसीम्‍ब तोङ्‌ज्‍यीत्। हुनी क हुन्‍दुक् झ्‍यीबे गो़ज्‍येत् घयेत् दी इक् खीत्‍रङ्‌ल थोप्‍केन् बेत्। हीगो झ्‍यीनी, नेम्‍बेक्‍की ढीक्‍ल खीत्‍रङ् च्‍युगा ॱमत् खुर्च्‍यीत्। नेम्‍बेक्‍की ढीक्‍ल नेम्‍बेत् दीरङ् युङ्‌गेन् बेत्। ङीन् री रील युङे दुक्‍स्‍यी दी मेन्‍द, हुले ॱल्‍हक्‍मु च्‍युगा ॱमत् खुर्च्‍यीत्।

Klausīties मत्‍ती 6