Filipiɛ́ŋ 2
2
Kupiseli
1Índɛ numaátáp ɔmbílíkínɛ́n ú Kilíis, iŋɔyɔ yɛɛyɛ́ áánúfáan ilúndɛ, kiliínditíe kíɛ́yɛ́ núlata, kínúwóónyosi na makánákana nɛ niɛ́nɔsúkɛ, 2akáánɛ́ óónuwóónyí anyamɔ́ wáámɛ núsɔ́tɔn ekelú ómoómí. Núpian iŋɔyɔ imoómí, ɔtɛ́m ómoómí nuamba nipílat; 3Nutiɛlɛ puandá kí imbimísan tɛ pɛɛnd núyíkina, maná núpíseli, núɛ́nɛn pɔsɔ́k ɛ́ɛ́ pányɛ peseé kunúkányɛn. 4Nutikɔ́lɔn kisikɛl kɔ́ɔ́m naanɔ́, maná nɔ pɔsɔ́k kɔ́kɔ́ɔ́p. 5Ɔ́nusɔ́tɔn anakáánɛ́ káánɔ́ ɛ́ kikɛtɛ́kɛtɛ́ɛ ɛlɛɛ́ pɛɛnd pɛ́nyɛɛ́ palatán é Yésus Kilíis: 6Wúú unyɛɛ́ sɔ́k ɛtúɛ u Támbák, utimáámbɛ́t ɛ́ɛ́ úpá etényí ómoómí na Támbák. 7Umayapá puandá kitikit, wɔkɔl etényí wúú eŋelípuólí, wɛɛkɛɛ́yi mɔɔnd, páakaátap wúú ɛlɛɛ́ mɔɔnd. 8Weepiseli, woond iŋɔ́pinɔ kuam é niku, weekú ó kolóse. 9púúpú Támbák maányálɛ́k wɔ, weeki wúú kisiɛ́n kínyɛɛ́ ɔkɔ́n u pisiɛ́n. 10Ɛ́ɛ́ ɛ́ kisiɛ́n kí Yésus mɔɔnd kitikit unyɛɛ́ mɛnɛ́mɛnɛ́ɛ, ne e kúúsí ekue ni iŋúsíkúsíe i kúúsí, suku tunúú, 11wóond úkémit ɛ́ɛ́ Yésus Kilíis nyɛ Ɔkɔ́n ó kiómoko kí Támbákɛ́ɛ Síí.
Pusɔ́m pú peétépí
12Akáánɛ́ paandimán páámɛ pí iŋɔyɔ, panɔ́ nunyɛɛ́ ni iŋɔpinɔ i teenik, ánusuŋúná nɔ tɛ aká inyɛɛ́ kɔ́ɔk, maná andíkɛ́k na pukaaka aká indiányípá; Maná ɔ́nukɔtɔ́ káánɔ́ ó kisótio na puwaá nɛ nutɛɛtinɛ, 13É kémuémue Támbák ɔ́ɔ́kɔtɔ káánɔ́ ɛ́ɛ́ nupia kilɔ́ɔ́ŋɛ́t núond núɛlɛ epú upilɔ́ɔ́ŋɔnɛ́ɛ yá aná nuketi núɛ́yɛ́ ɔ́ɔ́yɔɔnɛ́ɛ. 14Ɛ́nuɛlɛ́ puum tɛ embííŋunye, tɛ kupekenyikenyi, 15Ɛ́ɛ́ núpá kati kipalalá pɛtɛfítɛ́n, paán pá Támbák tɛ kinyik ɛ́ kikɛtɛ́kɛtɛ́ɛ kí pifólí pí pɛɛnd na pasupúsɔp, akáánɛ́ nukasunɔk ɛlɛɛ́ tuúyu tú kisie e kúúsí 16Panɔ́ nusɛmbɛnɛ́ɛ nukál nú kusɔ́t, púányípá anyamɔ́ wáámɛ ɔ́ puɔ́s pú Kilíis, á kiákí ɛ́ɛ́ indimetínít ɛ́ɛ́ sɛ́kísɛ́k kúnyáánɛ kuɛ́n muyú mú sɛ́kísɛ́k. 17Ɛɛlɛ piíŋɔn, manɔ́ŋ máámɛ anakáánɛ́ kunyɛɛ́ kusɔ́t kúámɛ, píɔ́yikɛn ɛlɛɛ́ nupoo á kifunɔ́ no puólí púánɔ́, pipíóndínyí ɔtɛ́m píánɔ́ éékenyée Támbákɛ́ɛ. Púákimfáan ipali yoond iyayaapa naanɔ́. 18Tɛ panúɛ ánupá kí iyayɔ́ núond núyayaapa naamɛ.
Pusɔ́m pú Timoté ne Epafotite
19Yɔɔ́pilɔ́ɔ́ŋɔ ɛ́ɛ́ kisiɛ́n kí Ɔkɔ́n Yésuse, ɛ́ɛ́ iŋɛɛ́kɛt ínútúmɛ́n Timoté, ɛ́ɛ́ iŋúɛ kákáámɛ imbia ilúndɛ ni insɔ́m síkoónyóólinon kuánɔ́. 20Unyɛ wééŋényí tupianɛ́ɛ imbítáákítɛ́n imoómí naamɛ nɛɛyɛ́ é púúpú púnúyoosonée. 21Peem áákaamba peseé wɔɔpɔ́, pátipá páamba u Yésus Kilíis. 22Maná wúú, nuemenyene ɛ́ɛ́ waámaná etíínyi pulinsí, ɛlɛɛ́ muɔ́nɔ́ masíá ne síí, woond naamɛ ó puólí pú insɔ́m yi indámb. 23Wúú yaambanɛ́ɛ kunútúmɛn aká iŋɛɛ́nyɛ́n etényí wáámɛ peseé 24Yaápian pipíóndínyí ɔtɛ́m kɔ Ɔkɔ́n ɛ́ɛ́ iŋúɛ kákáámɛ iŋɛɛ́kɛt yóól. 25Ɛ́ɛ́nɛ́n yɛɛ́n pú peseé ɛ́ɛ́ ínútúmɛn Epafotite, andimán áámɛ, ekúlíkuli waamɛ u puólí ni insália, numíindúmɛ́n ɛ́ɛ́ woond ó puólí naamɛ aká imɔɔ́pílɔ́ɔ́ŋɔ, 26á kiákí waápian kiandákáand kí insana ɛ́ɛ́ únúɛn woond útúmen á kiákí numɔɔ́p kunuma kúɛ́yɛ́. 27Ɛ́ɛ́ waápá upítáyan, masía ne niku; maná Támbákɛ́ɛ wɛɛ́n wúú ɔsɔ́k, kútimapá kɔ́ɔ́m wɔ maná naamɛ kákáámɛ ɛ́ɛ́ indiɛlɛ́ á kiandákáand kí insíkíl. 28Imánútúmɛ́n wɔ́ pɛkɛtɛpɛkɛt, ɛ́ɛ́ núɛ́n wɔ núand ayayaapa, niŋúɛ indiandá osol apá kí insíkíl. 29Ɛ́nunɛkín wúú iŋólio yi iyayɔ kɔ Ɔkɔ́n núond nukɔ́lɔn ɔ́ niɔlɔ́ pɛɛnd ɛlɛɛ́ wɔ, 30á kiákí weépi niku ó pusíó pú Kilíis, wɛɛl wááyɛn kusɔ́t kúɛ́yɛ́ ó kuŋolin kí iŋɔ́yikinɔ é púúpú nutiányípá kuŋɛlin panú muɛt.
Šiuo metu pasirinkta:
Filipiɛ́ŋ 2: yav
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2026, CABTAL