Ruma 8
8
Miɗ Bizlaf ma kapəlahəji
1Anawatsə, kwa guma ata həji ma dzəv ta abə Yesu Kərist aagi akas. 2Ara ndə a ɗa, andza ala a ndza dzəv abə Yesu Kərist ya, ma ma garagar tə ci, a ɗa Miɗ ma ghwaɗeɗe ma kavəla miɗ. Ma ma garagar watsa ci, tapəlaka bəza a ma ma garagar ataa mpət abə ataa mci. 3Ma ma garagar ataa Musa kula a ɗal səkən watsa səku, ara ndə a ɗa, ŋkulaf ataa həji ma dəgnak tatak ka a ɗalə. Ama Bizlaf ci, a ɗal bəza: tazlənha Mbə tə abə zli zlikusəm ma kasaɓ abə ataa həji mpət aagi, aska a pəlata bəza a mpət. Gwara a sha abə Bizlaf a tsak mpət ma kaɗal zlən a zlikusəm həji ma dəgnak aagi ka. 4A ɗal ikwa aska həji a ɗa kula a ɗalə andza ndə ma ma garagar a kaɗiwi. Ikwa ci, tavaŋ andza landa həji ma dəgnak səku, ama a ɗa landza Miɗ ma ghwaɗeɗe. 5Ara ndə a ɗa ya, həji ma kandza andza may ataa həji ma dəgnak aagi ya, aa ɗal səkən ndə həji ma dəgnak aagi aa kamayə. Azha həji ma kandza andza may ataa Miɗ ma ghwaɗeɗe aagi ya, aa ɗal səkən ndə Miɗ ma ghwaɗeɗe a kamayə. 6Zli zlikusəm a jaɓahəji a mci, ama Miɗ ma ghwaɗeɗe, aŋtə, a jaɓahəji a miɗ abə landza ma təwah. 7Ara ndə a ɗa, səkən ndə zli zlikusəm a kaɗalə, a ɗa jaga abə Bizlaf, aa kahawanə a ma ma garagar Bizlaf aka səku, ataa aŋta, a kaɗal ara təmta tep səku. 8Azha həji ma kanjin shiŋ səkən watsa aagi, zlən ta a kadəkanə a Bizlaf səku. 9Ama huni, may səkən ma gamak ma marahuni səku, ama Miɗ ma ghwaɗeɗe, ara ndə a ɗa, Miɗ Bizlaf a kandza a huni. Ala ma ŋkula ndza abə Miɗ Kərist ci, a ɗa ala Kərist səku. 10Andza Kərist a huni, azha huni amca dawna mpət, ama Miɗ ma ghwaɗeɗe ana ma ɗa miɗ kuni dawna ndza kuni ma dəlili. 11Azha andza Miɗ ma ghwaɗeɗe ataa ala ma garhazə Yesu a wəzəm a taba həji ma bazl ta aagi a zlikusəm kuni ci, Bizlaf ma garhazə Yesu a wəzəm a taba həji ma bazl ta aagi watsa, a avəlanə miɗ a zlikusəm kuni ma kaabazl ta aagi yəm, gwara ara Miɗ tə ma ghwaɗeɗe ma ndza a huni.
12Azha ikwa zlina aagi, dəwa aska ŋkwa, ama a ndza a zli zlikusəm, a ɗalə andza ndə zli zlikusəm a mayə səku. 13Andza huni ndza andza ndə zlikusəm a kamayə ci, huni abazl kuni. Ama andza huni ndza a lam ataa Miɗ ma ghwaɗeɗe, watsa ci, huni fəcak may ataa zlikusəm bəza, a tsutsa ci, huni andza abə nja. 14Ara ndə a ɗa, həji ndə Miɗ Bizlaf a kalahata aagi tiwtiw, aa ɗa wəzhi Bizlaf aagi. 15Azha Miɗ ma ghwaɗeɗe ndə huni lima watsa a kabəwahuni a mava ma ɗal ŋzliŋ aagi səku, ama tabəwahuni ka huni wəzhi Bizlaf aagi. Azha gwara ara Miɗ ma ghwaɗeɗe watsa, həji dzanə wəla a Bizlaf abə zlapanə, həji iŋgaya: Abba, ma ɗa Vava. 16Miɗ ma ghwaɗeɗe watsa abə ha tə ana ma kaghal ci, həji ɗa wəzhi Bizlaf aagi. 17Azha, andza həji ɗa wəzhi Bizlaf aagi, həji alima mavəy ɓizh takwa a səkən ndə Bizlaf a ghalatana ka a vəla a həji tə aagi, azha səkən watsa, həji alima abə Kərist. Ayəw, andza həji taji a sa yaka tə ndə a sə aagi, həji alima mavəy ɓizh takwa a sləf tə yəm.
Sləf ma kaaɓin a ndaha
18Deŋ naka ci, sləf ndə Bizlaf a kaaɓin a ghalahəji a saɓ abə yaka ndə həji kasə akacihwa səku. 19Ara ndə a ɗa ya, kala səkən ndə Bizlaf a baata aagi, aa kateh vah ndə a kaaghalha sləf ataa wəzhi tə aagi a heɗe abə kalkal. 20Manahayak watsə, tandəv tə aska ra ɓərɓər səkən ma ŋkula kat, sha ma mayə abə ha tə səku, ama Bizlaf ma ɗal ka ikwa, avəli manahayak ndza tə abə deŋ tə kwagwa. 21Sha tə yəm ci, a aɗa reh ara mava ataa ɓərɓər səkən ma kaghurəm la abə ma kabəw həji aagi aska a ɗa mava, azha a alima pəl tə abə sləf ataa wəzhi Bizlaf aagi.
22Həji kasənə, kala səkən ndə Bizlaf a baata ka aagi, aa kadərish, zhana aa kasa yaka kwagwa anawatsə, andza wala ma kaɗiw a mbəw tə. 23Ama dək manahayak gagagha səku: həji tə yəm, həji kadərish a ꞌunəf takwa, ara ndə həji kateh a həji a ɗa ŋter wəzhi Bizlaf aagi, azha həji abəw takwa həji ma pəlaya aagi, avəli ci, həji talima Miɗ tə ma ghwaɗeɗe andza mavəy səkən ma ma ɓəlaakaka ndə ndə Bizlaf a ghal ka a vəlahəji. 24Ara ndə a ɗa, həji tareh takwa, ama abə tsa deŋ gagagha. Andza həji kagəra səkən ndə həji katsa deŋ a heɗe ya, watsa a ɗa deŋ zhana səku: Səkən ndə həji kagərata aagi ya, həji kadeŋ deŋ zhana vəw? 25Ama tsa deŋ ata səkən ndə həji ŋkula gəra meni, a ɗa teh tə abə ŋkwaɓ. 26Zhana, ikwa yəm, Miɗ ma ghwaɗeɗe, a ndaha a lamzaŋkwa ara ŋkulaf takwa yəm, ara ndə həji ŋkula sən tar tə andza ndə a kaɗiwi. A tsutsa Miɗ ma ghwaɗeɗe a katar Bizlaf aska ŋkwa abə ŋguzŋguz ma ndza a ꞌunəf ndə madedizh ma a ŋkula a zlapazə bəza. 27Ama, Bizlaf a kagəra səkən ma ndza a ꞌunəf, a kasən səkən ndə Miɗ ma ghwaɗeɗe a kamay a ɗiwi: Ara ndə a ɗa Miɗ ma ghwaɗeɗe watsa a katarha andza ndə Bizlaf a kamayə aska həji tə aagi.
28Həji kasənə ci: Bizlaf a ɗal səkən aagi tiwtiw dawna təwah həji ma kamayə aagi, həji ndə a yaata watsa aagi ci, a yaata andza zlən tə ndə a gar ka a ɗalə. 29Həji ndə Bizlaf a va a dəmata mampər watsa aagi, taji deŋ tə bəza aska a bəwata ka a həji ma kasaɓ abə Mbə tə aagi ambəɗa tə, azha Mbə tə a aɗa gwanji mbə ma ndza a taba wəzhi vərəm. 30Həji ndə Bizlaf a diw a dəmata aagi, tayazata yəm, həji ndə a yazata aagi ya, tabəwata ka a həji ma dəlili aagi, həji ndə a bəwata ka dəlili aagi ya, tavəlatana sləf yəm.
Kwa səkən ma kaaɓizhaŋkwa abə mayha Bizlaf akas
31Anawatsə ya, ma finaŋkwa zhana a zlap veme? Andza Bizlaf abə ŋkwa ya, ala ma kaaŋkalzə nja takwa vaya? 32Kwa Mbə tə abə ha tə, Bizlaf tapəreh a bəza abəra yaka aka səku, ama tavələ ka a mci aska ŋkwa tiwtiw. Azha gwara ara Mbə tə, a avəlaŋkwa səkən aagi tiwtiw ɓəlaakaka. 33Ala ma kaaɗa kula a tək ma ata həji ndə Bizlaf a dəmata aagi vaya? Bizlaf ana ma bəwata ka a həji ma dəlili aagi! 34Ma kaaɗa kula a dzawata vaya? Kwa ala akas! Ara ndə a ɗa, Yesu Kərist tamca tə, zhana tagara tə a wəzəm a jiɓ: tandza tə ka ata guva zəm Bizlaf, a katar Bizlaf aska ŋkwa! 35Ma kaaɗa kula a ɓizhahəji ka abə mayha Kərist vaya? Dadawər vəw, ŋzliŋ vəw, yaka ndə həji kasə aagi vəw, mintish vəw, titikw vəw, bay ma vəw, aka səku, mci vəw? 36Andza ma ma ŋtir aka a Ɗerewal ma ghwaɗeɗe, iŋgaya: Dawna hwa, aa kagas a bazlani ka pal, aa tabəwani ka andza ŋcimi ndə aa kajaɓa ta a fatata aagi. 37Ama abə səkən ma pew ata ŋkwa tiwtiw ci, həji taɓasata bəza gwara ara ala ma mayahəji. 38Ayəw, sa kasənə, a ɗa ŋter, kwa səkən ma kaaɓizhahəji bəza abə mayha tə akas: Kwa mci, kwa miɗ, kwa matəf Bizlaf aagi, kwa dagal ma ndza a wəzlaf aagi, kwa səkən ma kaɗal anawatsə aagi abə ma kaaɓin a ndaha aagi, 39kwa ɓərɓər ma ndza a wəzlaf abə ma ndza ata hayak, kwa səkən minja ndə Bizlaf a baazə, kwa səkən ma kaaɓizhaŋkwa tep abə mayha Bizlaf ndə a ghalaŋkwa gwara ara Yesu Kərist, Bay Madagal takwa akas.
Šiuo metu pasirinkta:
Ruma 8: GOU
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės