Matt 26
26
wuḏeyen smuḏen af tmenγiwt n yesuwƹ
1mniyn ykemmel yesuwƹ ayuh n dwiy lkul, yuwa y tlamḏes: 2«kennim tessennem lliy beƹd ača d tfeṣka n uƹeddi. aḏ diyes talucen neči lliy yeḏwel d bnaḏem bac atweṣelbeγ.» 3lweqt ḏḏin mleymen imeqqaren n lkuhhan aḏ iwessaren n cceƹb g tzaqqa n qayafa rreys n lkuhhan. 4aḏ mfehmen bac aṭfen yesuwƹ s lḥileṯ we atenγen. 5uwan: «yexs wintegc ayuh g tfeṣka naγ adekkeren midden g uḏemewenneγ.»
nγal n ifuḥan af iγef n yesuwƹ
6mniyn yusi yesuwƹ g beyt ƹenya al simƹan mejdum. 7tusesd temeṭṭuṯ tqam tebuqqelt n ifuḥan aγlan. tenγelliṯ af ixfis aḏ netta yeḏka itet. 8yaxy γecceccen tlamḏ fellas uwan: «maγer ayuh n umermeḏ? 9muc xiyr lukan tezenza ayuh n ifuḥan s ggeṯ d iflusen aḏ tucin y lliy d izeweliyen?» 10mniyn yesla yesuwƹ s ayuh n dwiy yuwayasen:
«maγer diyes tetqelqem g ayuh n tmeṭṭuṯ? rahiy teggiḏ ḥaja teṣbiḥt. 11aḏ izeweliyen llan iḏuwem diyma amma neči witγimixc iḏuwem diyma. 12nettaṯ mniyn tenγel ifuḥan af ixfiw, tegga aydin bac altejra y nbal. 13lḥeq afenemleγ: mani abceren s linjiyl g tammurt lkul yexs aḏuflayem af lliy tegga ayuh n tmeṭṭuṯ bac adesmitan midden diyma matta tegga.»
lexyeneṯ n yehuwḏa
14lweqt ḏḏin ireḥ yjen seg ṯnac ismis yehuwḏa lesxeryuwṭiyi al imeqqaren n lkuhhan. 15yuwa: «mennit altucem bac afentiḏuceγ.» yaxy uzennas 30 d lmeḥbub n lfejreṯ. 16aḏ seg lweqt ḏḏin yuḏel yehuwḏa yesugum lemmi ayweta bac asentiḏyuc.
messi n tfeṣka n uƹeddi yid tlamḏes
17g as mezwar n ussan n qursetin, reḥḥen tlamḏa al yesuwƹ sestunen: «mani texseḏ afneg messi n tfeṣka n uƹeddi.»
18yuwayasen: «ƹeddaṯ al tmura, treḥḥem al flan, temmelmas: < lmuƹelemneγ yuwayaḵ: «ssaƹtiw tused aḏ γareḵ taggeγ tfeṣka n uƹeddi neči yid tlamḏew.»> » 19reḥḥen ggen mammeḵ yuwayasen yesuwƹ. aḏ jren messi n tfeṣka n uƹeddi dinet.
20temeddiṯ yeḏka netta aḏ aydin n ṯnac bac ayeč. 21mniyn wsiyn tetten, yuwa: «lḥeq afenemleγ: yjen siwem talyezenz.»
22yaxy ḥzennen ggeṯ aḏ yuḏel kul yjen sisen yesestun diyes: «mahu muc d neči, ayya siydneγ.»
23yaxy yerrasen: «lliy yenqeƹ fusis iḏiy g tḥedduqt d netta lliy talyezenz. 24rahiy neči lliy yeḏwel d bnaḏem taliṣar lliy yetweriyiḏ. lekenti y ḥlilu weddin lliy s fusis talyezenz neči lliy yeḏwel d bnaḏem y ttenyaṯ. lukan widdilulc xiras.»
25yaxy issestni yehuwḏa lliy tatyezenz: «mahu muc d neči, ayya lmuƹellem.» yerras: «cek tewiḏ amyuh.»
messi n tfeṣka n uƹeddi
26mniyn tteten, iqam yesuwƹ tqurset inumriṯ. yerza siyes, yuca y lliy yiḏes. yuwa: «lqeṯ čeṯ ayuh d ysumiw.»
27wembeƹd iqam lkas. yeḥmeḏ rebbiy. aḏ yucesen. yuwa: «sweṯ siyes lkulkum. 28ayuh d iḏemniw lliy n lƹehd jdiḏ aḏ lliy tawezzeƹen bac atweγfren ibekkaḍn n ggeṯ d midden. 29lekenti afenemleγ. neči wissesexc beƹd as wuh seg aman n ayuh n tzuriṯ almiy atenseweγ iḏewem d ijdiḏen g lmelekuwt n baba.» 30wembeƹd qesden aḏ ffaγen al jbel n uzemmur.
yesuwƹ yemmal lliy buṭrus tatyenker
31lweqt ḏḏin yuwayasen yesuwƹ: «yiḍ wuh tadjem siyi lkulkum mammeḵ yetweri:
<tawetteγ lliy yesefraḏ
we arulen izmeren n treslit. >
32lekenti beƹd man kreγ tafensebqeγ al ljeliyl.» 33yaxy yuweyas buṭrus: «neči witedjixc siyeḵ ḥetta lukan adjen siyeḵ midden lkul.» 34yerras yesuwƹ: «lḥeq afemleγ. yiḍ diyn qebbel man ayedden yeziḍ, cek taltnekreḏ 3 merrat.» 35yuwa buṭrus: «ḥetta lukan amuṯeγ iḏeḵ, wifnekrexc xlaṣ.» yaxy uwan tlamḏes lkulhum am idin.
tẓalliṯ n yesuwƹ g jeṯimani
36wembeƹd ireḥ yesuwƹ netta yid tlamḏes al ijenni mmelnas jeṯimani. yaxy yuwayasen: «geƹemzeṯ deh jeresd man areḥeγ al γaḍih aẓelleγ.»
37aḏ yewya yiḏes buṭrus yid ṭarwa n zebediy aḏ yuḏellas xemmem aḏ leḥzen. 38yaxy yuwa: «neči lḥisis tametteγ s lḥezen. qimeṯ shreṯ iḏiy.»
39yebƹeḏ fellesen fercu yesjeḏ. yetẓella aḏ yemmal: «ay baba kan witḥireḏ sebƹeḏ fella leƹḏeb n ayuh n lkas, lekenti mammeḵ texseḏ muc mammeḵ xseγ neči.»
40aḏ yeḏwel al tlamḏes yufin tṭeṣen. yaxy yuwa y buṭrus: «turuh amyuh, witquddemc asehrem iḏiy ḥetta ssaƹeṯ ijeṯ. 41sehreṯ teẓellem bac wifenyeγlebc cciyḍan. texsem lxiyr amma witetquddumc aṭfem imanuwem af ccer.»
42aḏ ireḥ yeẓẓal tijekkelt iḍen. yuwa: «ay baba kan lazem asweγ ayuh n lkas, adj ayṣar lliy texseḏ.»
43iƹaweḏ yeḏwel al tlamḏes yufin ṭṭesen zada afelxaḍert yeγlebin iḍeṣ. 44yedjin, yeḏwel yetẓella tijekkelt ti 3 aḏ yetƹaweḏ g dwiy lliy yuwat.
45wembeƹd yeḏwel al tlamḏes yuwa: «ṭseṯ ṭuruh aḏ reyḥeṯ. tused ssaƹtiw aḏ qa talzenzen neči lliy yeḏwel d bnaḏem y weribekkaḍen. 46kkreṯ anreḥ. qa yused lliy talyezenz y nihnin.»
iṭṭaf n yesuwƹ
47mniyn netta ydugga, yehuwḏa lliy netta d yjen seg ṯnac yexleḍed aḏ yiḏes ggeṯ d midden γarsen lesyuf aḏ igeḍman, nkiyyenten imeqqaren n lkuhhan aḏ iwessaren n midden. 48yusi lliy tasentiḏyezenz yucesen lemereṯ. yuwayasen: «lliy tatbeḥbiγ, d netta, ṭfet.»
49yeqreb al yesuwƹ ƹlewleh, yuwa: «fislamtiḵ ay yelmuƹellem.» aḏ ibeḥbayi.
50yaxy yuwayas yesuwƹ: «ayya ṣṣeḥbiw y ma tusid.» yaxy qrebben midden tṭefen yesuwƹ. 51yaxy yjen seg indin lliy wsiyn yid yesuwƹ, yezzel fusis, yenzeγ ssiyfis, iwet xdim n rreys n lkuhhan yeqdeƹas temezuγtis.
52yuwayas yesuwƹ: «arr ssiyfiḵ al umkanis. lliy yetcerreƹ g ccif tayemunγ siyes. 53naγ teḥsabeḏ neči witqudduxc aḍelbeγ baba bac alyenkiy iṭer n ṯnac d lejyuc seg lmleyka? 54lekenti mammeḵ tayentem lliy yetweri g lkitab. lliy tzarrem diyes ṭuruh lazem ayṣar.»
55wembeƹd yuflay yesuwƹ y midden yuwa: «amellaḵ taṭfem ssareq, teffaγem s lesyuf aḏ igeḍman bac alteṭfem. ussan diyn lkul usiγ jarewem sseḥfaḍeγ g lheykel aḏ wilteṭifemc. 56laken iṣar ayuh bac ayentem lliy uriyent lenbiya.»
lweqt ḏḏin rwellen tlamḏes lkulhum djent.
lmuḥekmeṯ zzaṯ imeqqaren n wuḏeyen
57lliy ṭṭefen yesuwƹ awyent al qayafa rreys n lkuhhan lliy mleymen γares iwessaren aḏ lliy seḥfeḍen g cceriyƹeṯ. 58aḏ yeḏbeƹi buṭrus al tzaqqa n rreys n lkuhhan s yebƹeḏ. wembeƹd yuḏef al jaj, ygeƹmez jar lliy tƹussun bac ayḥekker man ayṣar. 59imeqqaren n lkuhhan aḏ iwessaren lkulhum ḥderren g lmejles ruzzun af mam ayecheḏ s lbaṭel af yesuwƹ bac aḥekmen fellas s tmettant. 60lekenti jar indin lliy usend acehden s lbaṭel wiḏufinc mam ayecheḏ mammeḵ xsen. aḏ g laxer qrebben sen sisen. 61uwan: «wuhnit yuwa: < neči tqudduγ ahedmeγ lheykel n rebbiy we atebniγ g 3 d ussanaṯ. > »
62yaxy yebbed rreys n lkuhhan ysesetn yesuwƹ: «man mleḏ g ayuh n dwiy.» 63lekenti yesuwƹ isusem. yaxy rreys n lkuhhan ysesetni: «afjehiγ s rebbiy lliy yedder mleneγ: cek d lmesiyḥ memmis n rebbiy naγ aha?»
64yerras yesuwƹ: «ayuh ṣḥiḥ. amma afenemleγ zada,
s ṭuruh taltezrem neči lliy yeḏwel d bnaḏem
af limin n rebbiy bab n lqudreṯ.
taltezrem tteseγd af sḥab n ujenna.»
65yaxy yeskeṣ rreys n lkuhhan leḥweyjis yuwa: «yeṯƹedda af rebbiy. muc lazem lechuḏ. aḏ qa kennim teslim mammeḵ yeṯƹedda af rebbiy. 66matta lquluwem.» uwan: «yestahel temettent.» 67yaxy skufsen af uḏmis. wettent aḏ lbeƹḍ n midden selfeqnas. 68aḏ nihnin mmalen: «tagzaneγ ayya lmesiyḥ; mam iwettaḵ.»
yenker buṭrus temesniwt n yesuwƹ
69lweqt ḏḏin yusi buṭrus ygeƹmez g tesqift. yaxy tusesd texdimt tuwa: «ḥetta cek tusid yid yesuwƹ lliy seg ljeliyl.» 70yaxy yenker buṭrus zzaṯ midden yuwa: «wisinnexc af matta teddugiḏ.» 71wembeƹd yeffeγ al imi n lḥuc. tezri texdimt iḍen. tuwa y midden lliy tmas: «ḥetta wuh yusi yid yesuwƹ lliy seg nnaṣira.» 72yaxy yenker buṭrus tijekkelt iḍen, yedjul: «aydin n argaz witsineγ.» 73wembeƹd reḥḥen lliy bbedden diyn al buṭrus uwanas: «rahiy cek nembelḥeq d yjen sisen. nesenaḵ seg leγutiḵ.» 74yuḏel buṭrus ileƹen. yedjella, yemmal: «neči witsineγ.» yaxy ƹlewleh yedden yaziḍ. 75aḏ yesmited buṭrus tufleyt n yesuwƹ lliy yuwa: «qebbel man ayedden yeziḍ taltnekreḏ 3 merrat.» yaxy yeffeγ al barra iƹeyyeḍ ƹeyyeḍ s tnixsist.
Šiuo metu pasirinkta:
Matt 26: IGJ
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2025 Chutney Media Agency Ltd for the audio recording and for the text upon which the recording is based. The audio recording and the text are both released under a Creative Commons 4.0 CC BY-NC-ND license (Attribution - No-Commercial - No Derivatives).