Rom 13
13
Mala leghuza gaumane
1Ghotolu te hui mala leghura hatimare mae funei ka gaumane re, eigna the'o kahe nanoni te au noilaghi te mala funei frunira nanonire jame te theome sakrera God ie. Mae funei teure God au teke fafatera ni na'ira ka sape te mala funei frunira hatimare nanonire. 2Eume, ihei te huhughuza mae funei ka gaumane ie, magne huhughuza hna teke ei haghe God ie. Euwateuwe, ihei te eiza igne ie, hatimare kaina fateza magne. 3Ihei te eiza hna te kohlo ie, hatimare theome thokagna te mala hmauza mae funei ka gaumane ie. Ni ihei te eira puhi te di'are, te thokagna te mala hmau ie. Eume, te mala theome hmaura mae funei ka gaumane teu ghotolu ie, ghotolu mala eira lana hna te keli re, malani lepo fakelighamu hatimare euwa. 4Eigna mae funei ka gaumane teuwae noa mae gloku God, mala eira puhi te keli re harighamu ghotolu. Ni jame te eira ghotolu puhi te di'are, ghotolu thokami te mala hmauza mae funei teuwae, eigna magne theome mala fite atha noilaghi lana. Magne noa mae gloku God mala fatera nanoni te eira puhi te di'are. 5Eume ghotolu mala leghura mae funei ka gaumane re. Ni theome mala leghura lana hatimare eigna te hmauza ghotolu fate ie euwa, ni eigna ghotolu laseza teuwae puhi te keli te mala eiza ie.
6Eume tufuni keli lui te foli takisi ghotolu ie, eigna mae funei ka gaumane re ngagura lanauwa nanugra igne mala loku hariza God mala toghora nanonire. 7Ghotolu mala foli sopagna nafnata takisi leghuza hna te lepoza ka vetula ie. Euwateuwe, ghotolu mala ghatho bohera mae funeire ni broabronara hatimare.
Hna te mala ei harira keha nanonire
8Tovi kaoni kahe goifata ka ihei, kaoni te mala eiza ghotolu ie te farinahmai gne lana, eigna ihei te nahmara keha nanonire, magne tufuni leghuza noa vetula God ie. 9Vetula ie lepo eu'ani, “Tovi toilaghi pedo, tovi faleme noni, tovi chiko, tovi mamagnaza noa goifata ihei ie.”#13:9 Eksodas 20:13-15,17; Diutronomi 5:17-19,21. Vetula ire ni baludi lanauwa keha vetulare, loku faudu lana ka kahe vetula, te lepo eu'ani ia, “Nahmaza kheramu fafaudu ie jateulanauwa ghoe te nahmagho thaimu ie euwa.”#13:9 Levitikas 19:18. 10Mae ihei te nahmaza kheragna fafaudu ie, magne theome tangomana te eiza kahe puhi te mala choghaza kheragna fafaudu ie. Eume, puhi nahmara kherami fafaudure igne, tufuni leghuza noa vetula God ie.
11Rei lepoghamu ghotolu mala eira puhi te keli re, eigna ghotolu laseza tati gignoa igne la au hui ka naga'e te fua ulu tulao. Gignoa igne la dufiza hui naga'e te mala dofra fakeli tati ka nathuru te eira re. Eigna gignoa igne ie la thata lui te mala mei God te fakahrighita ie, ke ulugnani naga'e teke funu fatutu'ani tati ia. 12Noda naga'e tati ka nauthoglu gne la thatai liu hui, jateula bongi tela thatai liu ari ia euwa. Euwateuwe naga'e mala ke pulo meigna Jisas ie la thata mei hui. Eume, tati mala atha koko puhi te di'are ni tarabana koba mala eira puhi te kohlo te thokagna noa nanoni Jisas Kraes re. 13Tati mala au fatheve ka puhi te kohlo, jateula nanoni te au koba kate bae ia euwa. Theome mala eira ngahngamu te di'a, ba ko'u mala fanoinoli, ba gnognoro, ba leghura keha puhi te di'a, ni theome mala magra ni gogotu. 14Ni ghotolu mala loku famaku lana ka noda Lod Jisas Kraes, euwateuwe tovi ghatho bohera puhi te di'a te ngaguza thono ie.
© 2025 SIL Solomon Islands