Matiu 16
16
Mae Farisire ne toreza Jisas kahe falalase funu klia
(Mak 8:11-13; Luk 12:54-56)
1Kahe fata, keha mae Farisi ni keha mae Sadiusi teure ne mei mala saosagroza Jisas. Hatimare toreza magne mala eiza kahe kofunaboboi, mala fatakleza te magne tutu'ani neke funugna ka God teuwe.
2Ni Jisas ne lepo eu'ani ka hatimare, “Kate rafigna naga'e ie, ghotolu lepoza, ‘Uve, nauthu'u ie kaina theome nahani, eigna manga ie ne pasa'ara.’ 3Euwateuwe, ka ga'e fufughogna keha naga'e ie, ghotolu lepoza, ‘Uve, gignoa igne kaina ke nahani, eigna manga ie ne pasa'ara ni gromo bi'o lui.’ Eume, ghotolu kofu falaseza lui gaoghathodi goifata ire kate kofiza manga ie, ni ghotolu theome kofu falaseza lana gaoghathodi hna te eira God gignoa igne re. 4Tholumae! Ghotolu nanoni gignoa igne re tufuni di'a lui puhimire. Ghotolu ngagughamu te kofiza kahe falalase, ni rei kaina theome eiza kahe falalase ka ghotolu. Falalase te kaina tangomana kofiza ghotolu ie, u falalase teke eiza God hariza mae Jona ia lana.” Eune hui, magne ghae ne tei noa.
Nodi isi mae Farisi ni mae Sadiusi
(Mak 8:14-21)
5Kate dufu hatimare ka keha philegna grano ie, mae farogore ghatho iho ne theome atha keha gano baludi. Jisas ne lepo eu'ani ka hatimare, 6“Koikofi fakelighamuni ghotolu ia, ka nodi isi mae Farisi ni mae Sadiusi teure.”
7Mae farogore ne lepo eu'ani farithaidi, “Eigna te theome atha tati kahe bereti ie jau te lepoza magne goeghoze igne.”
8Ni Jisas laseza lana hna te lepoza hatimare ie ne lepo eu'ani, “Nomi fatutu'ani ghotolu ie ichoni lui! Ne fahneuwa ghotolu te fua nanga nomiza lui ne theome atha kahe bereti teugnea? 9Ghotolu theome ghatho deiza aulana? Fahneuwa, ghotolu ghatho ihoza hui ngiha khara'o teke fafofodu ghotolu ke leghugna teke fangamura rei glima thogha mae ka glima bereti lana ia? 10Ba, ghotolu ghatho ihoza hui lana ngiha khara'o teke fafofodu ghotolu ka gano te fusei ka fitu bereti teke phipile rei ni feigedi fati thogha mae teu ia? 11Rei theome lepoza ka ghotolu gna u bereti. Ne fahneuwa te theome laseza ghotolu gnea? U isi nodi mae Farisi ni Sadiusi teu are au te, koikofighamu fakelini ghotolu ia teu rei ia.” 12Agnoni, me laseza na mae farogore te Jisas theome lepoza isi te mala e'ei bereti ia teuwe, ni u nodi fagriu hatimare mae Farisi ni mae Sadiusire na te lepoza magne ie.
Pita ne lepo fatakleza Jisas
(Mak 8:27-30; Luk 9:18-21)
13Kate tei Jisas te dufu ka nohi te au nau bi'o te kiloza Sisaria Filipae ie, magne ne ghuhna eu'ani ka noa mae farogore, “Ne mae hei eughau rei mae teke mei funugu ka God gne nanonire?”
14Mae farogore ne lepo eu'ani ka magne, “Keha nanonire te lepoza ie ne ghoe mae Jon Siublahi, ni kehare ne ghoe mae profet Elaeja, ni kehare ne ghoe mae profet Jeremia, ba kahe mae ka hatimare mae profetdi tifa ra euwa.”
15Ni Jisas ne ghuhna eu'ani ka hatimare, “Ghotolu ba? Ghotolu ne mae hei eughau rei?”
16Agnoni, mae Saemon Pita ne lepo eu'ani, “Ghoe mae Kraes, Thugna God te kahra tifa e tifa.”
17Jisas ne lepo eu'ani ka Saemon, “Saemon thugna Jona, ghoe tufuni hneahnegha nou lui, eigna hna te lepoza ghoe eigu rei ae theome nanoni te fatakle ari ka ghoe ie, ni mae Magu te au klia te falase ari tamu ie. 18Eume, te lepoza rei ka ghoe ie, ghoe mae Pita ni ghoe jateula kahe thina euwa. Ni ke kliagna thina teugne rei kaina fakegra nogu khilo'au ie tagna. Ni noa noilaghi gleme ie kaina theome tangomana te re'oza nogu khilo'au rei ie. 19Rei kaina gu'ari ka ghoe khi gna Nauthoglu klia ie. Eume, hna te bobotho ghoe ani pari ie, God kaina bobotho lanauwa klia, ni hna te sakreza ghoe ka nauthoglu pari igne, God kaina sakreza lanauwa klia.” 20Ke leghugna igne, Jisas ne lepo faheta ka noa mae farogore mala tovi thuturiza ka iheina, te magne lana mae Kraes ie teuwe.
Jisas ne lepoza glemegna thaigna ie
(Mak 8:31-34; Luk 9:22)
21Funu ka naga'e teugne, Jisas ne funu lepo fakohlo eu'ani ka noa mae farogore, “Rei na tei Jerusalem. Hatimare mae bi'odi mae Jiure, ni hatimare mae pirisi ulu, ni hatimare mae velepuhigna noa vetula Moses teure kaina ie paraghau rei, ni falemeghau eu rei. Ni ka fatolu naga'e ie, God nake fakahri fapuloghau rei ka u gleme.”
22Mae Pita ne udi famaghaniza Jisas ne lepo faheta eu'ani ka magne, “Lod, tovi lepoza teuwae sonighoe! God theome sakreza teuwae ka ghoe!”
23Euwateuwe, Jisas ne figrilao ka mae Pita ne lepo eu'ani, “Ghoe Satan, tei nou! Rei kilogho ghoe Satan, eigna ghoe ngagugho fanotoghau rei mala eiza hna te ngaguza God ie. Hna te lepoza ghoe gne theome mei funugna ka God, ni noa gaoghatho nanoni.”
Ihei te ngaguza leghuza Jisas ie, sakreza thaigna mala leme
(Mak 8:34–9:1; Luk 9:23-27)
24Ke leghugna igne, Jisas ne lepo eu'ani ka noa mae farogore, “Mae ihei te ngaguza mei leghughau rei ie, magne theome mala ghathoza lana nakahragna thaigna ie, ni sasa'a mala pala noa gazu fafata ie ni leghughau rei. 25Eigna ihei te ngaguza kalitiza nakahragna thaigna ie, kaina theome athaza tufuni nakahragna ie. Euwateuwe, ihei te sakreza nakahragna ie malagu rei teuwe, magne na loku famaku tufuni nakahragna ie. 26Jame kahe mae khotodi goifata fate'o ka nauthoglu gne, ni jame lisa laoza magne tufuni nakahragna ie, ihna goifata fate'o ire kaina toghoza magne? The'o lui! Ni hna gne nate gulao magne teke mala atha fapuloza nakahragna ie? Tufuni the'o lui! 27Tutua'ni lui, rei mae teke mei funugu ka God gne, nake pulo mei ka nauthoglu gne balugna noa noilaghi bi'o mae Magu, ni noa thotoghei engjelre. Ka naga'e teuwae, rei kaina tabara nanoni fate'o re leghura hna gloku teke eira hatimare re.
28“Tutu'ani lui, hna te lepoza rei ka ghotolu ie. Keha mae ka ghotolu te au gignoa igne re, ame lemena ghotolu teuwe, ghotolu kaina kofighau rei mae teke mei funugu ka God ie kaina mei mala funei frunira nogu nanonire.”
© 2025 SIL Solomon Islands