मत्ती 2
2
जोतसिऔं को आनो
1ईसु को जलम यहूदिया मुलक के बैतलहम मै राजा हेरोदेस के टैम मै भओ, तौ देखौ पूरब सै कई जोतसी ऐरूसलेम मै आए 2और पूँछल लगे “कै यहूदिऔं को राजा जिसको जलम भओ है, कहाँ है? कैसेकै हमनै पूरब दिसा मै उसको तारो देखो है और बाकै डन्डौत कन्नै आए हैं।” 3जौ सुनकै हेरोदेस राजा और उसके संग सैरो ऐरूसलेम घबरा गओ। 4तब राजा नै सब मुक्ख पुजारिऔं और सास्तरिऔं की सभा बुलाकै उनसै पूँछी कै, “मसी को जलम कहाँ होनो चँईऐ?” 5उनौनै जबाब दओ, “यहूदिया के बैतलहम मै, कैसेकै नबी नै इसके बारे मै जौ लिखो है कै 6‘हे बैतलहम यहूदा की धरती, तू यहूदा के परमुख सैहरौं मै किसी सै कम ना है, कैसेकै तेसै एक सासक पैदा होगो, जो मेरी परजा ईसराइल की रखबारी करैगो।’”
7तब हेरोदेस नै जोतसिऔं कै चुपके सै बुलाकै उनसै पूँछी, कै तारो ठीक किस टैम दिखाई दओ हो। 8फिर बानै उनकै बैतलहम भेजते भए कैई, “जाऔ उस बालक के बारे मै अच्छी तरै सै पतो लगाऔ और जब बौ तुमकै मिल जाय तौ मैंकै खबर दो जिस्सै मैं बी जाकै उसकै डन्डौत कर सकौं।” 9बे राजा की बात सुनकै चल पड़े, और देखौ, जो तारो उनौनै पूरब मै देखो हो, बौ उनके अग्गे-अग्गे चलो और जहाँ बालक हो उस जघै के ऊपर पौंच कै रुक गओ। 10और उस तारे कै देखकै बे भौत खुस भए। 11और उस घर मै पौंच कै बौ बालक उसकी अईया मरियम के संग देखो, और मौह के बल गिरकै बाकै परनाम करो, और अपनो अपनो झोला खोलकै उस्सै सौनो, लोबान और गन्धरस की भेंट चढ़ाई। 12पर, परमेसर नै एक सपने मै बे चौकस कर दए, कै बे बापस हेरोदेस के धौंरे ना जाँय, इसताँई बे दूसरे रस्ता सै अपने देस कै लौहट गए।
ईसु कै लेकै अईया-अब्बा को मिसर मै जानो
13उनके चले जानै के बाद देखौ, परभु के एक सुरगदूत नै सपने मै यूसप कै दिखाई देकै कैई, “उठ, बालक कै और उसकी अईया कै लेकै मिसर देस कै भाज जा, और जब तक मैं तेसै ना कैंऔ तब तक बहीं रैहईए, कैसेकै हेरोदेस इस बालक कै मरवा डान्नै के ताँई ढूंड़ रओ है।” 14यूसप उठो और उसई रात बालक और उसकी अईया कै लेकै मिसर देस चल दओ। 15और हेरोदेस के मरनै तक बहीं रैहओ, इसताँई कै बौ बचन जो परभु नै अपने नबी सै कैहलबाओ हो बौ पूरो हो जाय, “कै मैंनै अपनो लौंड़ा मिसर देस सै बुलाओ।”
बैतलहम के छोटे बालकौ कै मरवानो
16जब हेरोदेस नै जौ देखो कै, जोतसिऔं नै मेरे संग चाल चली है, तब बौ घुस्सा सै भर गओ, और लोगौं कै भेजकै जोतसिऔं सै ठीक-ठीक पूँछे भए टैम के अनुसार बैतलहम और उसके आस पास के सब बालकौ कै जो दो साल के या उस्सै छोटे हे मरवा डारे। 17तब जो बचन यरमिया नबी के दुआरा कैओ गओ हो बौ पूरो भओ,
18“रामाह मै एक दुख भरो सब्द सुनो गओ,
सब्द रोनै को और गैहरे बिलाप को हो,
राहेल अपने बालकौ के ताँई रो रई ही,
और चुप होनो ना चाँहै ही, कैसेकै
उसके तौ सबई बालक मर गए हे।”
ईसु कै लेकै यूसप और मरियम को मिसर सै लौहटनो
19फिर हेरोदेस के मरनै के बाद देखौ, परभु के सुरगदूत नै मिसर मै यूसप कै सपने मै दिखाई देकै कैई, 20“उठ, बालक और उसकी अईया कै लेकै ईसराइल के देस मै चलो जा, कैसेकै जो जा बालक की जान लेनी चाँहै हे, बे मर गए।”
21बौ उठो, बालक और उसकी अईया कै संग लेकै ईसराइल के देस मै आओ। 22पर जौ सुनकै कै अरखिलाउस अपने अब्बा हेरोदेस की जघै यहूदिया मै राज कर रओ है, तब बौ बहाँ जाने सै डरो, और सपने मै चितौनी पाकै गलील देस मै चलो गओ। 23#मरकु 1:24; लूका 2:39; यहून 1:45और नासरत नाम सैहर मै जा बसो, जिस्सै बौ बचन पूरो हो, जो नबी के दुआरा कैओ गओ हो, कै बौ नासरी कैलागो।
Šiuo metu pasirinkta:
मत्ती 2: TKB
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
New Life Compute Institute [NLCI] - CC BY-NC-ND 4.0