Iraétanüxü̃arü muxchiga 4
4
Queáxtanüxü̃arü puracüchiga
1Rü Tupana rü Moichéxü̃ rü Aróü̃xü̃ ñanagürü:
2-3—¡Peyaxugü i Lebítanüxü̃ i Queáxtanüxü̃ i 30 rü ñu̱xmata 50 ya taunecüã̱xgüxü̃ i nagu mexü̃ nax Tupanapatawa napuracüexü̃!
4Rü ngẽma puracü i Queáxtanüxü̃ ügüxü̃ rü wüxi i puracü i üünexü̃ nixĩ. Rü ñaa tá nixĩ i ngẽma puracü:
5Rü ngẽxguma tá inaxĩãchigu i duü̃xü̃gü nax to i nachicawa naxĩxü̃, rü nüma i Aróü̃ rü nanegü tá nixĩ inayauxgüxü̃ i norü tüyepe̱xeruxü̃ i ngẽma naxmachiã i Üünexüchixü̃. Rü ngẽmamaxã tá nanatüétügü i ngẽma baú i Tupanaarü mugü nagu nuxcuxü̃.
6Rü ngẽma baúétügu tá nanacha̱xagü i mexẽchixü̃ i naxcha̱xmüü̃gü. Rü ngẽmaétügu tá nanatümü i wüxitachinü i düxruxü̃ i waxracharaxü̃. Rü ñu̱xũchi tá nanawe̱xcu ya yima naxpaweru ya namaxã yangetaü̃güne.
7Rü ngẽxgumarüxü̃ ta i ngẽma mecha i paũ i üünexü̃ nagu nuxü̃ rü tá naxchiru i waxracharaxü̃maxã nanatütachinügü. Rü ngẽxma tá nananu ya yimá poratugü, rü cuyeragü, rü axepáxü̃gü, rü naxpáü̃gü ya yima ãmaregü ya bínuca̱x ixĩgüxü̃ rü ñu̱xũchi ngẽma paũ i üünexü̃ i wüxichigü i ngunexü̃ ngẽxma nuxü̃.
8Rü ngẽmaétügu tá nanachagü i wüxi i naxchiru i daucharaxü̃. Rü ngẽmaétügu tá nanatügü i naxcha̱xmüü̃gü i mexẽchixü̃. Rü ñu̱xũchi tá nanawe̱xcu ya yima naxpawerugü ya namaxã yangetaü̃güne
9Rü ngẽmawena rü wüxi i naxchirutachinü i waxracharaxü̃maxã tá nanatüétü i ngẽma omüpaweru, rü norü omügü, rü omüarü mexchiraxü̃ruü̃gü, rü ngẽma naxü̃papáxü̃gü, rü ngẽma omüarü chíxü̃páxü̃gü.
10Rü guxü̃ma i ngẽma rü tá naxcha̱xmüü̃gü i mexẽchixü̃maxã tá nananuquegü, rü ñu̱xũchi norü ngetaxü̃ruü̃gu tá nananugü nax ngẽmaãcü yangetaü̃güãxü̃ca̱x.
11Rü ngẽxgumarüxü̃ ta i ngẽma pumarate̱xearü guruxü̃ i úirunaxca̱x rü wüxi i naxchirutachinü i waxracharaxü̃maxã tá nayadüxétügü rü ngẽmawena rü tá naxcha̱xmüü̃gü i mexẽchixü̃gümaxã nayadüxétügü rü ñu̱xũchi tá nanawe̱xcu ya yima naxpawerugü ya namaxã yangetaü̃güne.
12Rü ngẽxgumarüxü̃ tá ta nanade i ngẽma ngẽmaxü̃gü i Tupanapatawa namaxã napuracüexü̃. Rü wüxi i naxchiru i waxracharaxü̃gu tá nananu. Rü ngẽmawena rü tá naxcha̱xmüü̃gü i mexẽchixü̃gümaxã nananuque. Rü ñu̱xũchi norü ngetaxü̃ruü̃gu tá nananugü nax ngẽmaãcü yangetaü̃güãxü̃ca̱x.
13Rü ngẽxgumarüxü̃ ta i ngẽma ãmarearü guruü̃wa rü tá ínanapigü i ngẽma chíxü̃ rü yima tanimaca. Rü ngẽmawena rü wüxi i naxchirutachinü i dauxracharaxü̃maxã tá nanatüétügü.
14Rü ngẽma ãmarearü guruü̃étügu tá nananugü i guxü̃ma i ngẽma inaxwa̱xexü̃ ega Tupanaarü ãmaregü yagugügu. Rü ngẽmagü nixĩ i tanimacapáü̃gü rü choxruü̃gü rü paragü rü tacháũgü rü guxü̃ma i ngẽma togü i norü ngẽmaxü̃gü i ãmarearü guruxü̃. Rü guxü̃ma i ngẽma rü tá naxcha̱xmüü̃gü i mexẽchixü̃maxã nayadüxgü. Rü ngẽmawena rü tá nanawe̱xcu ya yima naxpawerugü ya namaxã yangetaü̃güne.
15Rü ngẽxguma Aróü̃ rü nanegü marü nüxü̃́ nagu̱xgu nax yanáixpüü̃güãxü̃ i guxü̃ma i ngẽma Tupanapataarü ngẽmaxü̃gü i üünegüxü̃, rü ngẽxguma marü inaxĩãchichaü̃gu, rü nüma i Queáxtanüxü̃ rü ngéma tá naxĩ nax yanaxãxü̃ca̱x i guxü̃ma i ngẽma ngẽmaxü̃gü. Natürü taxũtáma nüxü̃ ningõgügü i ngẽma ngẽmaxü̃gü i üünegüxü̃ nax tama nayuexü̃ca̱x. Rü guxü̃ma i ngẽma Tupanapataarü ngẽmaxü̃gü rü Queáxtanüxü̃ tá nixĩ i yanaxü̃.
16Rü Ereachá i chacherdóte i Aróü̃ naneme̱xẽwa tá nixĩ i nangẽxmaxü̃ i ngẽma chíxü̃ i omü namaxã inaigüxü̃ rü ngẽma pumarate̱xe i yixixü̃, rü ngẽma ãmaregü i trigugü i guxü̃guma choxna pexãgüxü̃, rü ngẽma chíxü̃ i baeruxü̃ ixĩxü̃. Rü ñu̱xũchi nüma tá nixĩ i nüxna nadauxü̃ ya Tupanapata rü guxü̃ma i norü ngẽmaxü̃gü i üünegüxü̃ i nawa ngẽxmagüxü̃ —ñanagürü ga Tupana.
17Rü nüma ga Tupana rü Moichéxü̃ rü Aróü̃xü̃ ñanagürü:
18—Rü tama chanaxwa̱xe nax naxoxü̃ i ngẽma Queáxtanüxü̃ natanüwa i Lebítanüxü̃.
19Rü ngẽma nax tama yumaxã napoxcuexü̃ca̱x i ngẽma Queáxtanüxü̃ nagagu nax nüxü̃ yangógügüxü̃ca̱x i ngẽma ngẽmaxü̃gü i üünegüxü̃, rü nüma i Aróü̃ rü nanegü rü tá wüxichigü i ngẽma Queáxtanüxü̃xü̃ naxucu̱xẽgü nax nüxü̃ nacua̱xgüxü̃ca̱x nax ta̱xacü tá naxügüxü̃ rü ta̱xacü yixĩxü̃ i yangegüxü̃.
20Rü ngẽmaãcü i nüma i Queáxtanüxü̃ rü taxũtáma nüxü̃ nadaugü i ngẽma ngẽmaxü̃gü i üünegüxü̃ rü ngẽmaãcü taxũtáma nayue —ñanagürü.
Yechóü̃tanüxü̃arü puracü
21Rü Tupana rü Moichéxü̃ ñanagürü:
22-23—¡Rü ngẽxgumarüxü̃ ta yaxugü i ngẽma Guerchóü̃tanüxü̃ i 30 rü ñu̱xmata 50 ya taunecüã̱xgüxü̃ i nagu mexü̃ nax Tupanapatawa napuracüexü̃!
24Rü ñaa tá nixĩ i ngẽma Guerchóü̃tanüxü̃arü puracügü:
25“Rü nümagü rü tá nayangegü ya Tupanapata, rü ngẽma naxchirugü i namaxã ínapoxeguxü̃, rü ngẽma naxcha̱xmüü̃gü i mexẽchixü̃ i namaxã natüétüxü̃, rü ngẽma Tupanapataarü ĩã̱xarü tütaruxü̃.
26Rü ngẽxgumarüxü̃ tá ta nayana i ngẽma naxã̱xtüarü ĩã̱xarü tütaruxü̃ rü ngẽma naxchirutachinügü i namaxã ínapoxeguxü̃ ya naxã̱xtü ya Tupanapata rü ngẽma ãmarearü guruxü̃. Rü ñu̱xũchi tá nayana i ngẽma natü̱xügü i ngẽma poxeguxü̃ rü guxü̃ma i ngẽma ngẽmaxü̃gü i nanaxwa̱xegüxü̃ nax namaxã napuracüexü̃.
27-28Rü nüma i Aróü̃ rü nanegü tá nixĩ i ngẽma Guerchóü̃tanüxü̃maxã nüxü̃ ixugüexü̃ nax ta̱xacü tá yangegüxü̃ rü ta̱xacü tá yixĩxü̃ i norü puracügü i Tupanapatawa. Rü chacherdóte ya Aróü̃ nane ya Itamá tá nixĩ ya yima Guerchóü̃tanüxü̃maxã icuácü.
29-30¡Rü ngẽxgumarüxü̃ ta yaxugü i ngẽma Merarítanüxü̃ i 30 rü ñu̱xmata 50 ya taunecüã̱xgüxü̃ i nagu mexü̃ nax Tupanapatawa napuracüexü̃!
31Rü ngẽma Merarítanüxü̃arü puracü tá nixĩ nax yangegüãxü̃ i ngẽma Tupanapataarü mürapewagü, rü naachina̱xãgü, rü naparagü rü bróũchepütagü i naparagü nawa ngucuxü̃.
32Rü tá nayana ya yima Tupanapataa̱xtüarü poxeguxü̃paragü, rü nachipatagü, rü natü̱xügü, rü natü̱xügüarü tairuü̃gü, rü guxü̃ma i ngẽma ngẽmaxü̃gü i nanaxwa̱xegüxü̃ nax namaxã napuracüexü̃. Rü cuma tá nixĩ i namaxã nüxü̃ quixuxü̃ nax ta̱xacü tá yangegüxü̃ i wüxichigü.
33Rü ngẽma tá nixĩ i norü puracügü i ngẽma Merarítanüxü̃. Rü chacherdóte ya Aróü̃ nane ya Itamá tá nixĩ ya yima Merarítanüxü̃maxã icuácü” —ñanagürü ga Tupana.
34-35Rü yemaacü ga Moiché rü Aróü̃ rü yema Iraétanüxü̃arü ãẽ̱xgacügümaxã nayaxugü rü nayawǘgü ga yema Queáxtanüxü̃ ga 30 rü ñu̱xmata 50 ga taunecüã̱xgüxü̃ ga nagu mexü̃ nax Tupanapatawa napuracüexü̃. Rü natücumümaxãchigü rü natanüxü̃maxãchigü nayaxugü rü nayawǘgü.
36Rü yema yatügü ga yawǘgüxü̃ rü 2,750 nixĩ ga norü mu.
37Rü yexguma Moiché rü Aróü̃ yaxugügu ga Queáxtanüxü̃, yema Cori ya Tupana Moichémaxã nüxü̃ ixuxü̃ãcü, rü yema nixĩ ga norü mu ga nagu mexü̃ nax Tupanapatawa napuracüexü̃.
38-39Rü natücumümaxãchigü rü natanüxü̃maxãchigü nayawǘgü ga yema Guerchóü̃tanüxü̃ ga 30 rü ñu̱xmata 50 ga taunecüã̱xgüxü̃ ga nagu mexü̃ nax Tupanapatawa napuracüexü̃.
40Rü yema yatügü ga natücumümaxãchigü rü natanüxü̃maxãchigü yawǘgüxü̃ rü 2,630 nixĩ ga norü mu.
41Rü yexguma Moiché rü Aróü̃ yaxugügu ga Guerchóü̃tanüxü̃, yema Cori ya Tupana Moichémaxã nüxü̃ ixuxü̃ãcü, rü yema nixĩ ga norü mu ga nagu mexü̃ nax Tupanapatawa napuracüexü̃.
42-43Rü natücumümaxãchigü rü natanüxü̃maxãchigü nayawǘgü ga yema Merarítanüxü̃ ga 30 rü ñu̱xmata 50 ga taunecüã̱xgüxü̃ ga nagu mexü̃ nax Tupanapatawa napuracüexü̃.
44Rü yema yatügü ga natanüxü̃maxãchigü yaxugüxü̃ rü 3,200 nixĩ ga norü mu.
45Rü yexguma Moiché rü Aróü̃ yaxugügu ga Merarítanüxü̃, yema Cori ya Tupana Moichémaxã nüxü̃ ixuxü̃ãcü, rü yema nixĩ ga norü mu ga nagu mexü̃ nax Tupanapatawa napuracüexü̃.
46-48Rü natücumümaxãchigü rü natanüxü̃maxãchigü nayaxugü rü nayawǘgü ga yema Lebítanüxü̃. Rü yexguma Moiché rü Aróü̃ rü yema Iraétanüxü̃arü ãẽ̱xgacügümaxã yaxugüãgu rü yawǘgüãgu ga yema 30 rü ñu̱xmata 50 ga taunecüã̱xgüxü̃ ga nagu mexü̃ nax Tupanapatawa napuracüexü̃, rü 8,580 nixĩ ga norü mu.
49Rü yemaacü nixugü ga yema Lebítanüxü̃ yema Cori ya Tupana Moichémaxã nüxü̃ ixuxü̃ãcü. Rü wüxichigümaxã nüxü̃ nixu i ta̱xacü tá nixĩ i norü puracü rü ta̱xacü tá nixĩ i yangexü̃, yema Cori ya Tupana Moichémaxã nüxü̃ ixuxü̃ãcü.
Šiuo metu pasirinkta:
Iraétanüxü̃arü muxchiga 4: tcaP
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2022, Wycliffe Bible Translators, Inc. All rights reserved.