याकूब 2
2
मिँ रँःद तादोच्यो
1अ ङानैं ङामेंर, ज़गै मगैव गेप्रभु येसु ख्रीसए ओपाँत जेयुँ हुबोर जेतावए जे मिँ रँःद तादोच्यो। 2परमेस्वरए ओपाँत जेदुप्सिक तोबो उकुइत सुने कुइची ल्यो स़ोनो ओक्वार ब बनै चाव चाव ल्यो उहुकिन, फरी तोबो ओक्वार थाकना बुरूमो गरीब उहुकिन, 3जे नो चाव क्वा क्वाइसिद हुवलाई वाज़, “तैंत च़ुसिन्के,” है जेदोकिन, फरी नो माचाव क्वा क्वाइसिद हुवलाई, “नँ नक ज़ च्याँःसिद लिन्के, की जाँ मेकसै लिन्के,” है जेदोकिन, 4जे जेखार्ल निताव मिँ रँःद जेदोज़्यावए, तँनी ज़ जेदोव रैंःके।
5ङायुँलाव ङानैं ङामेंर, आव तामेंःच्यो, परमेस्वरए ते झन मानुवाताव गरीबरालाई ज़ युँ हुप्न्याल धनी थ·रैद यानैव। परमेस्वरए ल्योदा यायुँ जैज़्यावरालाई ओराज्या यान्या य़ाका ओरायो ब नोरालाई ज़। 6है जैद जे निताव गरीबरालाई सोन्या माःक। जे ज़ जेसैंज़्या, जेखिरी पसिद अदालतदा स़ेल्द लाँज़्यावर धनीर ज़ ताज़्यार सानी। 7जे जेक्याँत लिज़्याव ख्रीसए चाव उमिन बले·द ल़॰ज़्यावर ब नोर ज़ ताज़्यार सानी।
परमेस्वरए ओराज्यालाव कानुन सयो·न्या
8जे धर्मसास्त्रलाव प़ाइँरानी ओचाहित ल्यो परमेस्वरए ओराज्यालाव कानुन जेसयो·किन नो ज़्यासो लिज़्या। नो कानुन आव ज़ — जेक्याँलाई किताव जेसमारिज़्या, छुतलाई ब हिताव ज़ समारिउ ताके।#लेबी १९:१८ 9खाली जे आव कानुन मादाद मिँ रँःद जेदोकिन पाप दाद परमेस्वरए ओकानुननी जेखत ल्योर जेथ॰रिज़्या। 10जोए परमेस्वरए ओकानुन भरी माबिरैद ओदोदी ब फरी तोबो ओमासयो·धुकिन नो कानुन भरी ओपो·स ज़ ओमादोव मिताव ज़ थ॰रिके। 11जे ज़ जेसैंज़्या, अर्काए ओज्याए ल्योदा माबान्या कानुन स़ोनो मिँ मासैःन्या कानुन ब तोबोए ओयाःनी ज़ हुके। है जैद जो अर्काए ओज्याए ल्योदा ओमाबादी ब मिँ ओसैःकिन, नो मिँए परमेस्वरए ओकानुन मासयो·द ओगल्ती ल्यो ज़ थ॰रिज़्या।#प्रस २०:१३-१४; ब्य ५:१७-१८ 12जे तछा पापनी पले·ज़्याव परमेस्वरए ओकानुननी जेफाल्सिरिज़्या लिन्या य़ाका दाद दाव ब ताके, पाँव ब ताके। 13छुतलाई उयुँ मानाज़्याव मिँ ओललाई ब परमेस्वरए ओफालो छ्याम उयुँ नान्या माले। फरी छुतलाई उयुँ नाज़्याव मिँ हो छ्याम परमेस्वरए ओसजानी पुलुस्न्या ले।
युँ हुप्न्या स़ोनो य़ेन दान्या
14ङानैं ङामेंर, जो मिँए ओयाःए वाज़ ‘परमेस्वरए ओपाँत ङायुँ हुप्ज़्या’ है लिद य़ेन ओमादोकिन, नोए ओपाँ अऩाकलाव ज़ ताके। निताव युँ हुप्न्यानी कै जैद ओबाँचिधुरिज़्याव? 15जेस परमेस्वरए ओपाँत बाज़्याव तोबो मिँ ओक्वार ब माल्यो, ज़्यावए ब माथैंज़्याव उलिकिन, 16जेनी जोए नोलाई ‘चावस बानी, नफू तसी ज़्याद मुइँवल स्याँनी’ लिद ओयाःए वाज़ है दाद चाहिज़्याव भरी काता ज़ ओमाएकिन, नो काता ची तायादा? 17हो मिताव ज़ परमेस्वरए ल्योदा युँ हुप्न्या ब याःए वाज़ ताकिन अऩाकलाव ज़ ताज़्या। साचो युँ हुबो मिँनी ते ओय़ेन ब रैंःज़्या।
18खाली सुवाराए, “परमेस्वरए उमिनतावर ते ख्वार अइज़ यायुँ वाज़ हुप्न्यार याताज़्याव ओल्यो, ख्वार बनै य़ेन दान्यार याताज़्याव ओल्यो,” है लिज़्याखेरहो। ङा नो है लिज़्यावराए जूँनी है ङालिज़्या, “हिताव ताकिन य़ेन मादाद जेयुँ जेसुहुबो ङालाई सतैंद्याँचिके। ङा फरी जेलाई ङाय़ेननी ज़ ङायुँ ङासुहुबो सतैंद ङायाच्या।” 19नँ, “परमेस्वर तोबो वाज़ लिज़्या,” लिन्याक पै नयुँ नसुहुप्ज़्याव ते चाव ज़। खाली नाःपै ते माचाव पुरूसराए ब भुम भुम गूद यायुँ सुहुप्ज़्यार। 20खाली नँ निताव माचाहिउ पाँज़्याव मिँ, य़ेन मादाद युँ सुहुप्न्या भरी अऩाकलाव ज़ लिज़्या लिन्या खर्क नसैंरिज़्याव?
अब्राहामए उयुँ हुबोनी ज़ य़ेन दोक्यो
21गेपुर्खा अब्राहामए परमेस्वरए है ओदोव मिताव ओज़ा इसहाकलाई थानत चरैःन्या उयुँ ओमाकैवए नो ओदोव ओय़ेननी ज़ परमेस्वरए ओङ़ाक धर्मी थ॰रिके।#उत २२:१-१४ 22उयुँ उसुहुबो मिताव ज़ ओय़ेन ब दोक्यो, ओय़ेन ओदोवनी फरी उयुँ उसुहुबो ब सयो·क्यो। 23ननी ज़ धर्मसास्त्रलाव सर्सिउ पाँ यो·के। नलाव सर्सिउ आव ज़, “अब्राहामए परमेस्वरलाई उयुँ उसुहुबोनी ज़ परमेस्वरए नोलाई धर्मी ज़ थ·रैक्यो।”#उत १५:६; २ इति २०:७; यसै ४१:८ है जैद अब्राहामलाई परमेस्वरए ओनैं ज़ है मनी दोकेर। 24ननी ज़ गेसैंज़्या, युँ सुहुप्न्यानी वाज़ माःक, युँ सुहुप्द य़ेन ब दोकिन वाज़ मिँर परमेस्वरए ओङ़ाक उयुँलाव मिताव थ॰रिज़्यार। 25हो मिताव ज़ धर्मसास्त्रलाव राहाब पातर्नी ब नो इस्राएलीराए यारापरींव देस जाँचिना हुवनिलाई चावस समारिद म़ोंद छुत येमनी उनिपरींवए नो मेंमा ब ओदोव य़ेननी ज़ परमेस्वरए ओङ़ाक धर्मी थ॰रिके।#यहो २:१-२१ 26किताव उस॰ माल्यो क्याँ सिउ ताज़्या, हिताव ज़ य़ेन मादाद ओयाःए वाज़ ‘ङायुँ हुप्ज़्या’ है लिज़्याव मिँ ब हिताव ज़ ताज़्या।
Šiuo metu pasirinkta:
याकूब 2: NKham
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2015, Wycliffe Bible Translators, Inc. All rights reserved.