Populiarios Biblijos eilutės iš 1 Peˍtruˆ li‸ 2

Dalintis

Nawˬ hui lehˬ, Gʼuiˬsha leuˆ yuˬ ve chaw ceuˬ hpeh‸ ve yoˬ. Jawˇmawˇ Gʼuiˬsha ve paw hkuˇka‸ nawˬ hui hpeh‸ ve yoˬ. Nawˬ hui da‸ kehˬ ve mvuhˇmiˬ yaˇ hpeh‸ leh, Gʼuiˬsha ve awˬ yaˇ awˬ duˬ awˬ tehˬ awˬ na hpeh‸ ve yoˬ. Yawˇ ve da‸ jaˇ ve awˬ gʼeuˆ awˬ hkʼaw lo lo‸ la tuˬ, naˆ ho‸ ve awˬ hkʼaw lo yawˇ nawˬ hui hta‸ kuˬ tawˆ la peuˬ. Hkʼe te leh, yawˇ ve da‸ jaˇ ve awˬ lawn shu hta‸ kʼaoˍ maˍ piˇ-oˆ.

Suhˆ hkuiˉ daw hkʼoˆ yawˇ gʼa hkanˍ suh htaˇ, yawˇ awˬ to awˬ hkʼaw lo ngaˬ hui ve venˇbaˆ hta‸ yawˇ pfuhˇ taˍ ve yoˬ. Ngaˬ hui a shu yawˇ ve venˇbaˆ hta‸ suh baˬ taˉ leh, hteˇ ve cawˇ ve awˬ hkʼaw lo gʼa te‸ chehˇ tuˬ, yawˇ hkanˍ suh ve yoˬ. Yawˇ ve naˬ kuiˬ hta‸ pa taw nawˬ hui na-e la peuˬ. Nawˬ hui lehˬ, awˉ lawˉ htaˇ ya‸ kʼaw ya‸ leh mehˉ kʼai ve yawˬ hkʼe hpeh‸ ve yoˬ. Ya‸ hkʼaˇ, chi beu‸ lehˬ nawˬ hui ve co ha hta‸ nyi ha‸ shaˉ shehˍ hpaˇ Yawˬ hawˉ paˍ geh nawˬ hui kʼaw‸ la peuˬ.

Awˉ lawˉ htaˇ, nawˬ hui lehˬ awˬ meh maˇ cawˬ ve chaw ceuˬ hpeh‸ ve yoˬ. Ya‸ hkʼaˇ chi beu‸ lehˬ, nawˬ hui Gʼuiˬsha ve chaw ceuˬ hpeh‸ la peuˬ. Awˉ lawˉ htaˇ nawˬ hui lehˬ, ha kʼaˉ ve awˬ bon hta‸ maˇ gʼa. Ya‸ hkʼaˇ chi beu‸ ha kʼaˉ ve awˬ bon hta‸ nawˬ hui gʼa peuˬ.

Paw la gehˇ sheˍ ve yaˇ ehˉ hkʼa shuˍ shuˍ, co ha hpawˇ da‸ jaˇ ve cuˉ gʼuiˬ hta‸ sheˉ lai-o. Co ha hpawˇ ve cuˉ gʼuiˬ hta‸ nawˬ hui dawˬ ve pa taw, htaiˍ hkʼaw‸ ve awˬ hkʼaw lo nawˬ hui uiˍ la tuˬ yoˬ.

Ha‸ ve chaw teˇ hpaˍ-oˬ, shu mvuhˇmiˬ awˬ hkʼaw lo nawˬ hui hkehˉ chaw hpeh‸ chehˇ ve yoˬ. Hkʼe te leh, co ha hta‸ bawˆ da‸ chehˇ ve, awˬ suhˍ awˬ shaˍ a loˍ hta‸ jaw kʼai tuˬ, ngaˬ nawˬ hui hta‸ lawˬ hkawˉ ve yoˬ. Buiˇ shaˆ aˉ naˆ chaw teˇ hpaˍ mehˆ gʼuˇ suhˍ nawˬ hui da‸ ve awˬ liˇ awˬ hkʼaˇ hta‸ ceh tiˉ te-o. Yawˇ hui nawˬ hui hta‸ hkʼaiˉ leh venˇbaˆ taˍ ve htawˇ, nawˬ hui ve da‸ ve kanˉ hta‸ gʼa mawˬ ve pa taw, suhˉ jehˬ ve awˬ nyi gaˬ la htaˇ, yawˇ hui Gʼuiˬsha hta‸ chiˇ uiˍ chiˇ mvuh tuˬ yoˬ.

Nawˬ hui htawˇ te‸ chehˇ ve haˉ pui shiˍ teˇ hpaˍ hkʼa shuˍ shuˍ, Gʼuiˬsha nawˬ hui hta‸ yuˬ leh co ha hpawˇ ve yehˬ te hpeh‸ tuˬ, a shu yawˇ awˬ to Gʼuiˬsha hta‸ chiˇ a‸ piˇ-oˆ. Co ha hpawˇ ve tanˇ tuˬ teˇ hpaˍ hta‸ nawˬ hui gʼa tanˇ tuˬ, nawˬ hui da‸ kehˬ ve paw hkuˇ teˇ hpaˍ hpeh‸ la peuˬ. Nawˬ hui Yeˍsuˆ Hkri‸ hta‸ cuˇ leh tanˇ ve teˇ yanˇ, tanˇ tuˬ oˇ ve teˇ hpaˍ hta‸ Gʼuiˬsha ha‸ yuˬ tuˬ yoˬ.

Hkʼe te leh, shu hta‸ naˬ tuˬ te ve, shu hta‸ heˍ ve, maˇ heˆ ve awˬ ceuˬ hta‸ ka‸ yoˬ ve hkʼe te ve, hkawehˉ ve leh hkʼaiˉ ve, chi teˇ hpaˍ hkʼa peu-eˬ hta‸ baˬ taˉ-oˆ.

Jawˇmawˇ oˇ ve geh laˬ-o‸. Yawˇ lehˬ te‸ chehˇ ve haˉ pui shiˍ hpeh‸ ve yoˬ. Chaw yaˇ yawˇ hta‸ chiˇ baˬ ve htawˇ, Gʼuiˬsha yawˇ hta‸ leuˆ yuˬ leh, awˬ hpfuhˇ hkʼaˆ jaˇ ve teh‸ shawˍ taˍ ve yoˬ.

Nawˬ hui ponˬ peuˬ ve chaw hpeh‸ ve yoˬ. Ya‸ hkʼaˇ nawˬ hui ponˬ ve lehˬ, haiˬ ve hta‸ te tuˬ awˬ pon maˇ heˆ. Gʼuiˬ sha ve awˬ ceˬ te tuˬ awˬ pon hpeh‸ ve yoˬ.

Awˬ lawn kʼo, nawˬ hui da‸ ve hteˇ ve hta‸ te tuˬ Gʼuiˬsha nyi ma cawˇ ve yoˬ. Chi hkʼe te ve pa taw, maˇ shiˍ puiˉ maˇ dawˇ nyi puiˉ ve chaw teˇ hpaˍ lehˬ, te‸ chiˉ ca kʼoˆ maˇ hpeh‸ leh, ta‸ iˉ chehˇ tuˬ yoˬ.