Populiarios Biblijos eilutės iš Matthew 7

Dalintis

တောဂေ့ပါ။ တောရယ်ဆိုဝါ နန်းနို့ရလိမယ်။ ရှာဂေ့ပါ။ ရှာရယ်ဆိုဝါ နန်းနို့တွီ့လိမယ်။ ခေါ့ပေါ့ဝို ခေါ့ဂေ့ပါ။ ခေါ့ပေါ့ခေါ့ရယ်ဆိုဝါဝို ခေါ့ပေါ့ဖွမ့်ပေးလိမယ်။

ဟဲဖြစ်ရိနူးဆိုဝါ တောဒဲ့လူဒိုင်း ရဂေ့လိမယ်။ ရှာဒဲ့လူဒိုင်း တွီ့ဂေ့လိမယ်။ ခေါ့ပေါ့ခေါ့ဝိုလူဒိုင်းဝိုလဲ ခေါ့ပေါ့ဖွမ့်ပေးလိမယ်ဖြစ်ရယ်။

 အဲဂျော့ ငါ့ဂါးဝိုနားထော်ပြီး လိုက်နာကျင့်ကြံသူဒိုင်းဟ ကလော့ပေါ်မှာအီဆော့ဝို ပညာရှေ့နတူလေရယ်။

အဲဂျော့ရိ နန်းနို့ပေါ်ဝို သူများဟ ပြုမူဆစ်ဆံစေလိုဝိုမျိုး နန်းနို့ဟလဲ သူများဝို ပြုမူဆစ်ဆံဂေ့ပါ။ အယ်မိုဇာဟ ပညတ်ရားတော်ကျမ်းန ပရောဖက်ဒွေ ရေးရစ်ဝိုကျမ်းစာဒွေရဲ့ နှစ်ချုပ်ဘဲ့ဖြစ်ရယ်။

သက်ရှင်ဇာဝို ရနိုင်ဝိုလမ်းဝိုဦးတည်ဝို ဝမ်ပေါ့ဟ ကျဉ်းမြောပြီး ဝမ်ရော့ဝို့ ခက်ခဲရိတွက်ဂျော့ အဲမိုဝမ်ပေါ့ဟနေ ဝမ်ဝိုလူဒွေဟ နဲပါးရယ်။

ကျဉ်းမြောဝို ဝမ်ပေါ့ဟနေ ဝမ်ဂေ့ပါ။ ဟဲဖြစ်ရိနူးဆိုဝါ ကျယ်ဝန်းဝို ဝမ်ပေါ့ဟ ဝမ်ရလွယ်ကူပြီး ပျစ်ဆီးခြင်းဝိုဘဲ့ ဦးတည်နေဇာဖြစ်ပီး အဲမိုဝမ်ပေါ့ဟ ဝမ်သူဒွေဟလဲ ရားဒိုင်းများလေရယ်။

နန်းနို့ဟ ပြစ်ဒုဇရိုက်သားဒွေဖြစ်ပါလျှက် နန်းနို့သားမီးဒွေဝို ကောဝိုရာဒွေဝိုဘဲ့ ပေးတတ်မယ်ဆိုဝါ ရွှေဗြို့တော်မှာရှေ့ဝို နန်းနို့ရဲ့အဖဘုရားဟ သူ့ဝိုတောဝိုလူဒွေဝို ကောမွန်ဇာဒွေ ဟယ်မျှလော့ပေးလိမယ်နူး။

ကိုယ့်ဝိုဝီဖန်ပြစ်တံဇာ ခံနိုဘဲနေရယ်ဆိုဝါ သူများဝိုလဲ ဝီဖန်ပြစ်တံဇာလုပ်ဂေ့န။ ဟဲဖြစ်ရိနူးဆိုဝါ နန်းနို့ သူများဝို ဝီဖန်ပြစ်တံဒိုင်း နန်းနို့လဲ ဝီဖန်ပြစ်တံဇာခံရမှာဖြစ်ပြီး နန်းနို့ သူများဝို တိုင်းတာဝိုစံနှုန်းတိုင်း နန်းနို့ဟလဲ တိုင်းတာခံရလိမှာဖြစ်ရိတွက်ဂျော့ဖြစ်ရယ်။

အယ်ဘေမဲ့ ငါဂါးဝိုနားထော်ပြီး လိုက်နာကျင့်ကြံဇာမှေ့ဘဲဝိုသူဒွေဟ သဲပေါ်မှာ အီဆော့ဝို မိုက်မဲဝိုသူဒွေန တူလေရယ်။

နန်ဟ နန့်မျစ်လုံးထဲဟ သစ်တုံးဝိုဗြင်ဘဲန နန့်ညီကိုမျစ်လုံးထဲဟ သစ်မှုန်စရားဝို ဟဲဂျော့ဗြင်နေဂေ့နူး။ နန့်မျစ်လုံးထဲမှာ သစ်တုံးကီးရှေ့နေရိသားန နန့်ညီကိုဝို 'နန့်မျစ်လုံးထဲဟ သစ်မှုန်စရားဝို ငါထုပေးမယ်။' ဆိုပီးဟဲမျိုးလုပ်ပီးပြောနိုင်မယ်နူး။

ပရောဖက်တုယော်ဒွေဝို ဒိထားဂေ့လော့။ သူ့နို့ဟသိုးရေ ခြုံထားဝို ရစ်စစ်ကြမ်းကြုတ်ဝို ဝံပုလွေဒွေမျိုး နန်းနို့ဆီလာဂေ့လိမယ်ဖြစ်ရယ်။  နန်းနို့ဟ အဲမိုလူဒွေဝို သူ့နို့ရဲ့လုပ်ရစ်ဒွေဝို ကေ့ပီးသိဂေ့လိမယ်။ ဆူးခြုံပံဟ ဗျစ်သီးဖြစ်ဖြစ် သဖန်းသီးဖြစ်ဖြစ် ဆွတ်ခူးရလေ့ရှေ့ရိလော။

အဲမိုမျိုးဘဲ့ ကောဝိုပံဒိုင်းဟ ကောဝိုသီးဝို သီးဘေမဲ့ မကောဘဲဝိုပံဟ မကောဘဲဝိုသီးဝိုသီးရယ်။

ကောဝိုပံဟ မကောဘဲဝိုသီးဝို သီးနိုင်ဘဲမျိုး မကောဘဲဝိုပံဟလဲ ကောဝိုသီးဝိုသီးနိုင်ရ။

ကောဝိုသီးဝိုမသီးဘဲဝိုပံဒိုင်းဟ ခုလှဲဇာခံရပြီး မီးထဲဝိုပစ်ခလဇာ ခံရမှာဖြစ်ရယ်။