Populiarios Biblijos eilutės iš रोमी 1

Dalintis

केच्‍च्‍य ॱनेम्‍बु ॱस्‍यो़प्‍पे ढीक्‍ल ङ ङु ॱमीत् छय यो़त्। घन्‍ड हीन् सीन्‍न हीगो को़न्‍ज्‍योक्‍की ॱस्‍यीक् च्‍येम्‍मे केच्‍च्‍य बेत्। हीगी लम्‍नी क ॱअल गोम यहुदी, हुनी ज्‍यी़त् ॱयोङ्‌गी मी ॱसु हीन्‍न अक्, छ्‌य स्‍योक्‍केन् दी छी थर्वल थो़ङ्‌गेन् बेत्।

ॱनम्‍बर् धक्‍पल छ्‌य स्‍यक्‍पे लम्‍नी को़न्‍ज्‍योक्‍की तो़ङ्‌गेन् सीक्‍केन् हुगो केच्‍च्‍य ॱनेम्‍बी़ ॱस्‍यो़क्‍केन् बेत्। हीगी ढीक्‍ल ॱसुङ्‌रप्‍ल छ्‌य स्‍यक्‍पे लम्‍नी ॱनम्‍बर् धक्‍पल थो़म्‍बे मी दी क ॱसोम्‍बु हीम्‍ब युङ्‌गेन् बेत् सीर यो़क्‍केन् बेत्।

को़न्‍ज्‍योक्‍की ॱस धङ् ॱनम् छ्‌यादु ची़प्‍पनी झ्‍यीनी, खोङ्‌गी घङ् जेप्‍पे ले घयेत्‍ल तेन क, हस्‍सो़त् हुनी खोङ् को़न्‍ज्‍योक् ॱङो़न्‍ने यो़प्‍प धङ् खोङ्‌ल म दीरङ् धी़ ज्‍यी़न्‍दु ॱवङ् छ्‌यीम्‍मु यो़प्‍प दी ॱमीक्‍की ॱमीत् थोङ्‌गो़त्‍न आक्, ॱसीम् दीगी ॱह घो छुगेन् बेत्। हीगो झ्‍यीनी हुबे को़न्‍ज्‍योक्‍की खोङ्‌डोक् हुगो फी़ ॱमीत् छुगेन् बेत्।

हुबल को़न्‍ज्‍योक् यो़प्‍प ॱस्‍यो़च्‍च्‍ये यो़त्‍न अक्, को़न्‍ज्‍योक्‍ल पु ओ़बे तो़प्‍प धङ् यस्‍सो ॱमत् पुब, हुबे ॱसीम्‍बे ॱनोक्‍सम् दीरङ् ङीन घो ॱमीत् छ्‌यो़त्‍ल ॱसोङ्‌न, घुर्तीङ् डस्‍सी मेन्‍नक्‍ल दो़क्‍केन् बेत्।

को़न्‍ज्‍योक् ङो़गी दीम्‍ब दी फङ्‌न स्‍यक्‍नी हुबे ॱएलम तीन्‍न छङ्‌म थम्‍ज्‍येत् सोगेल्‍ल मेम्‍ब, सो़ तङ घयेत्‍ल तो़त्‍न छ्‌यक् छ्‌यो़प्‍प पुगेन् बेत्। स्‍येन् को़न्‍ज्‍योक्‍ल क धी़ ज्‍यी़न्‍दु तो़त् ओ़ब दी यो़क्‍केन् बेत्। आमेन्।

को़न्‍ज्‍योक् ॱमीत् ॱसम्‍गेङ्‌गी मी घयेक्‍की झ्‍यीबे ले ढङ्‌ज्‍ये मीप्‍प घयेत् दीगी दीम्‍ब क च्‍येत्‍न यो़क्‍केन् बेत्। हुन्‍दुक् झ्‍यीब घयेत्‍ल तेङ् यी़नी मल्‍ल को़न्‍ज्‍योक्‍की खोङ्‌डोक्‍की छ्‌येप्‍प फोक्‍केन् बेत्।

हुन्‍दुक् झ्‍यीब झ्‍यीनी हुब रोरङ्‌सो़ धेत्‍मो़ आक्‍पा ॱमम्‍बीगी लेगी ॱवङ् दीलरङ् को़न्‍ज्‍योक्‍की स्‍यक् तङ बेत्। ॱनी भुमु घयेक्‍की यङ् छ्‌योगोदङ् युङे लेमु दी स्‍यक्‍नी भुमु रोरङ्‌सो ॱनम्‍बु फीलोक्‍पे लेमु झ्‍यीक्‍केन् बेत्। ॱनी हुगो डस्‍सी छ्‌योगो घयेक्‍की इक् भुमुदङ् युङे लेमु दी स्‍यक्‍नी, छ्‌येलङ्‌गी छ्‌योगो रोरङ्‌सो ॱनम्‍बु फीलोक्‍पे लेमु झ्‍यीक्‍केन् बेत्। ॱनी हीन्‍दुक् झ्‍यीबे ङीब अयेक्‍प ॱमम्‍बीगी ले झ्‍यीबल ओ़बे कज्‍येत् को़न्‍ज्‍योक्‍की हुबल तङ बेत्। हुबे को़न्‍ज्‍योक् ॱसम्‍न खोङ् ङु ॱस्‍यीब युङे लेमु दी हुबे गज्‍ये ॱमत् छोर, फङ्‌न स्‍यक्‍न झ्‍यीच्‍च्‍ये मीत् युङ्‌गेङ्‌गी लेमु झ्‍यीन युङ्‌नी, हुबे ङेम्‍बे ॱसीम् दी को़न्‍ज्‍योक्‍की हुन्‍दुक् दीरङ् स्‍यक् तङ बेत्।

हुबे रोरङ्‌सो च्‍यङ्‌सी हीन् सीक्‍केन्, ॱनी म दी घुर्च्‍यक् यो़क्‍केन् बेत्। नम्‍ल अक् मीत् ढोङ्‌गेङ्‌गी को़न्‍ज्‍योक्‍ल तो़च्‍च्‍ये स्‍यक्‍नी, ॱस्‍यी डोगेङ्‌गी ढङ्, मी, झ्‍यज्‍युङ्‌म, रीगे ॱसीम्‍ज्‍येन् धङ् ॱसल ढी़त्‍न डोगेङ्‌गी ॱसीम्‍ज्‍येन् घयेक्‍की डवुल ॱसम्‍न हुल तो़प्‍प पुगेन् बेत्।