Populiarios Biblijos eilutės iš Vaefeso 4

Dalintis

Mwisungukilage nu kwilimila amadzwi amanofu. Mwipyanilage ngita uNguluvi kye avapyaniye wugendela mwa Kilisiti.

Mwiyisage, muvedzage valeele mbandu, muvedzage nu wisamutima yuunye mwa yuunye nu kwinyamulila mu wende.

Mutanage ukulonga amadzwi gagavedzaga ga kuliga, nda haamu, amadzwi agiivagila ukuvadzenga avangi kulingʼaana ni ndzala yaakwe, ukuta fivatange avangi aviipulikidza.

Mutanage ukuvedza nu wuvafi, uluviipo, iligooga, ilyowo, uwulonga fivi nu wuhosi wuwuvedzaga.

Pe mwiviipa, mutanage ukulima indzanangifu. Mutanage ukwikala ni ligooga ukufikila pe liisota ilidzuwa, ukuta mutane ukumulekela uSetano avaleme.

Mwawulaniidzwe mugileke imigendele gyenyo gya kataali kwe kutigila, mufuule uwumuunu weenyo wa kataali uwaanangiike mu wudobofu uwiidzanga. Kangi mupituswe kye mukiihoodzaga, amahoodzo geenyo gavedzage mapiya. Mufwalage uwumuunu wupiya, pakuva uNguluvi avagavile ukuta muhwanane mu wugolofu nu wiimike wa ndakyene.

Mugimbage ukuwuloleela uwunyalumwinga uwiihuma mwa Mubepo uMwimike wugendela wa kwikala mu lutengamaso, pakuva ulutengamaso lukuvakamiingʼasa.

Umwene avapeeliye avaanu ifipeelwa ifyo, ukuta valimage amalimo gaakwe, avangi vatume, avangi vavidzi, avangi vadalisi, avangi vadiimi na vawulanidzi. UKilisiti akuvagelanidza aviimike wugendela wa fipeelwa ifyo ukuta, pe vakumulimila amalimo ago, vadzengage ulukombeso lwakwe kwe kutigila, muvili gwakwe. Ulukombeso lwakwe luhadza lwigina ukudzengwa, ukufikila tufikile uwunyalumwinga mu lufuuwo nu wukagudzi weesu wa Muswamuve va Nguluvi, ukufikila tukangale ukufikila ikigelelo kyonda kya wukwilifu wa Kilisiti.

Apo pe peene tutanage ukuvedza vaana mu lufuuwo, ngita ilivelo na mavingo mu nyandza kye fiiyudza uwaato apa na pala. Kangi, tutanage ukuyudzwa ngita waato uwo, pa kufuuwa imbulanidzo idza wudesi idza vaanu avasugu na vadzandzi avakuvaheniya avangi. Nda haamu, tukolaatidzage indakyene wugendela wa wende, ukuta mu dzonda tukule nu kumufikila uKilisiti ye ali mutuwe gwa lukombeso.