Populiarios Biblijos eilutės iš Vakolosayi 2

Dalintis

Lino, ngita kye mwamufuuviilwe uKilisiti Yesu ukutigila ye Mutwa, muginage ukwikala mugati umwakwe. Imidela gyenyo giidomekage mugati umwakwe, uwuumi weenyo wudzengwage pakyanya apaakwe, mwisikimikage mu lufuuwo ngita kye mwawulaniidzwe. Kangi muginalidzage ukumuhongedza uNguluvi.

Muvedzage miiho, umuunu ye avedzaga atanage ukuvaheniya ni mbulanidzo dzaahela, ni dza wudesi. Imbulanidzo idzo, dziihuma mu mivedzehedze gya vaanu ni migendzehedze gya lidugulu ili, gisiihuma kwa Kilisiti.

Unyeenye pe musinaa mudzabikwa, mwali múfuwe wiimila wa ndzanangifu dzeenyo, simwali vaanu va Nguluvi wiimila wa wumuunu weenyo uwulovela. Neke kangi uNguluvi avapeeliye uwuumi pamwinga nu Kilisiti, kangi aawodziidze indzanangifu dzeesu dzonda. UYesu pe aatoveleliilwe pa kipindulihidzo, uwusimbe wa nongwa ni milagililwe gyakwe ifyatuhigile, fyatoveleliilwe pamwinga nave apo, kwe kutigila umusika ugo uNguluvi aayadziidze tipu umudzigilo gwesu.

Pakuva uwukwilifu wonda wa Nguluvi, wukwikala mu muvili gwa Kilisiti yumwene. Na yuunye musiikeepa kiinu kikivedzaga wiimila wa wunyalumwinga weenyo mwa Kilisiti, umwene ye muvina ukulutila avatemi nu wutawulilwe wonda.

Neke lino, umuunu atanage ukuvahiga pakuva mwiliya ifyakuliya ni finyuwo fye viitigila mwiko, enewuli pakuva musininiila imivedzehedze gyawo gya fyaka fya ngʼeelanilo, ikyaka kya mwedzi pe gwivalika, enewuli gya kigono ikya Sabato. Dzonda idzo, gwe mwigisila gwa dze vaahuuvilaga aVayahudi ukwadza, indakyene yili mwa Kilisiti.