Populiarios Biblijos eilutės iš Abharuumi 12

Ku bhuyö, motakeegha seteemo isya abhantö abha ko-kebhara kono. Mutighe Waryobha abhasyöri senkoro isyënyu, okore mobhe na amaitegherro amahya. Hayö ho moreeghe, momanye keno Waryobha akobhatonera. Keno akobhatonera, na-mangʼana amaiya ghano ghahekerana, agha ökömötëghërya.

Bhoono abhakumya bharikyëtö, ko bhoora igha Waryobha abhaayë na amaabhë na bhëëtö, ndabhasaasaama bhököngʼu igha, mwiruusi mobhe kya itugho ëhörëëru iya ikimwenso, eno ikushomera Waryobha. Okokora igho, nko enshera inshiiya iya okosengerra Waryobha.

Amangʼana amaiya ghaara Waryobha yaabharaghaini igha arebhakorra, ghakore mushomerwenga. Möghömërri hano mwanyoora inyanko, kora möghëndërringa okosaasaama Waryobha.

Otakaakerwa na amangʼana amaghogho, kasi ni-igha oghabhaahe ko okokora amangʼana amaiya.

Mohanshane bhëënyu abheene ko bheene kya abhahiiri. Kera ömöntö, akore omotono ughwa okosooka murikyaye.

Mobhe na righonshe irya heene ko-bharikyënyu. Ensonga iyaamo ni-igha, mutighe okokora amangʼana amaghogho, kasi mokorenga amangʼana amaiya senkaagha syonswe igho.

Mokore omotono ughwa okobha na omorembe na abhantö bhonswe igho.

Abhaghonshe abhaane, motakaahaka ikisiiyomba, moteghere Waryobha umwene ahake. Nkoghamba ndë igho, ko bhoora Omonene Waryobha yaaghambirë mo-Maandeko Amahörëëru igha, “Nö-öni nkohaka ikisiiyomba.”

Mobhe na omotono ughwa okokora emeremo ighya Waryobha, Umwika Ömöhörëëru abhatöörri, möghëndërri okokora emeremo ghiyö bhuuya, mokorre Omonene Yëësu Kiristo emeremo.

Ko bhoora Yëësu Kiristo angʼaayë örööbhö igha mbe omotomwa uwaaye, ku bhuyö nkobhatëëbhya ndë igha, kera ömöntö mö-bhëënyu muyö, atakaimaaha igha, naingʼarëëyë okokera bhuyö arë, kasi abhe na obhongʼaini. Kera ömöntö yaahaanwa na Waryobha ekerengere ikyaye ikya umukumo.

Hano abhantö bhaabhakorra obhoghogho, motakaahaka ikisiiyomba. Kasi mwitegherrenga bhuuya, okore mokorre abhantö amangʼana ghano ghakomaahekana ko-bhantö bhonswe igho igha m-maiya.

Mobhe ikiina ëkëmwë. Motakaabha na ikiheemere, kasi mwisuuhi mobhe na öbhömwë na abhantö bhano bhakoserwa. Motakaimaaha igha, m-bangʼaini mörë bhököngʼu.

Ghwiki Amaandeko Amahörëëru gharaghamba igha, “Hano umubhisa uwaaho asëngëëyë, mohaane ibhyakorya. Na hano aana inyonta, mohaane amanshë. Ko bhoora hano oraakore igho, noraabhe kya ono okomaini amakara agha omorro ukurwa ko-motwe ughwaye.”

Abhantö bhano bhakobhateesa bhëënyu mobhasabherenga obhongʼoore, motakaabhasabheranga amaihiimo. Mushomerwenga na bhano bhakushomerwa, bhano bhakukuura, bhonswe mukuurenga nabho.

Mötöörringa abhantö abha Waryobha bhano bhaana obhohabhë. Mokore omotono ughwa ökösërëënia abhaghëni.

Mmomanyirë bhuuya igha, nokaanyoora ömöbhërë n-gömwë, kasi ngoona imyaho imyaru, na kera umwaho ngoona emeremo ighyako. Ömöbhërë ughwa Kiristo ghonswe ni-igho ghörë. Bhëëtö ntonga kya imyaho imyaru ighya ömöbhërë ughwa Kiristo. Kera ömöntö nu-mwaho ughwa murikyaye kö-möbhërë kuyö.