If you would like a copy of this version please contact info@davaraudiobibles.org

Lhomi New Testament

हुनी ॱनाङ्‌गी ङीन् दी गालीलागी काना सार्न भालीन् च्‍यीक् यो़प्‍प बेत्। उन येशुगी आम आक् ॱलीत्‍न यो़प्‍प बेत्। ॱनी येशु धङ् खोङ्‌गी ॱलोप्‍टुक् दीब अक् भो़न उन यो़प्‍प बेत्। ॱनी भालीन् दीदु गोङ्‌ज्‍यङ् सेत्‍न खुर्नी, हुनी येशुगी आमे येशुल ह हीन गोङ्‌ज्‍यङ् सेस्‍सोङ्। ह घन्‍ड झ्‍यीक्‍केन्? झ्‍यीब बेत्। ॱनी येशुगी लेम्‍बुल ङे घन्‍ड झ्‍यीत् गोगेन् बेक्‍क हुगो आमरङ्‌गी ङल सीर् मीत् गो़गेन् बेत्। हुन्‍दो ङे धी़जो़त् ॱमत् ॱलीब बेत् झ्‍यीब बेत्। ॱनी येशुगी आमे उन लाज्‍यी़प्‍प घयेत् दील खीत्‍रङ्‌ल येशुगी घन्‍ड सीगुक्‍क हुल नेन् सीन्‍न ॱङाब बेत्। ॱनी उन छ्‌यु ॱलुक्‍स दोल सो़बे धोङ् ढुक् यो़प्‍प बेत्। यहुदी घयेक्‍की टोल हुगी धोङ् दीनी छ्‌यु च्‍यान ठी़ टी़क्‍को़प्‍प बेत्। धोङ् च्‍यीक्‍ल पत्‍ती ङीस्‍स्‍यु ॱसुम्‍ज्‍युजो़त् री डोगो़प्‍प बेत्। ॱनी येशुगी हुगी लाज्‍यी़प्‍प घयेत् दील हीगी धोङ् घयेत् हील छ्‌यु टेक् टेक् केङ्‌ल स्‍योक् सीन्‍न ॱङाब बेत्। हुनी हुबे हुन्‍दुक् दीरङ् झ्‍यीब बेत्। हुनी येशुगी हुब घयेत्‍ल हीगो ह च्‍यान, ॱअय बाबु दील चक्‍की तो़ल्‍लेत् सीन्‍न ॱङाब बेत्। ॱनी हुबे छ्‌यु गोङ्‌ज्‍यङ्‌ल ज्‍युर्नर दी चक्‍की तो़न्‍नी, हुगो स्‍यीम्‍सी छोर बेत्। हुगी छ्‌यु दी घनी युङे छ्‌यु बेक्‍क हुगो लाज्‍यी़प्‍प दीबल मेन्‍द, ॱअय दील ॱस्‍यो़च्‍च्‍ये मीप्‍प हीङ्‌गो़प्‍प बेत्। हुनी ॱअय दीगी मक्‍प दी भो़न, हज्‍यरङ्‌गी टोल गोङ्‌ज्‍यङ् स्‍यीम्‍बा दी एल्‍ला बीन् योङ्। हुनी तीङ्‌ला सीज्‍येम ॱयेङ्‌नी क, मत् स्‍यीम्‍बा दी बीन् योङ्। रङ्‌गी हीगो डस्‍सी मेम्‍ब, स्‍यीम्‍स्‍यो दी क तीङ्‌स्‍युक्‍ल स्‍यक्‍तुक् झ्‍यीब बेत्।
येशुल तो़त्‍वङ् छ्‌यीम्‍मु यो़प्‍प हीम्‍ब दी खोङ्‌गी हीगी ले हीगी तो़म्‍ब बेत्। हुनी क ॱलोप्‍टुक् दीबे एक् खोङ्‌ल छ्‌य स्‍यक्‍प बेत्। गालीलागी कानादु जेप्‍पे येशुगी यीक् छ्‌यीम्‍मी़ लेगी ता हीगो ॱएन्‍स्‍युक्‍म दी बेत्।
भालीन् दी ढुप् छर्नी, हुनी येशु खोङ् रोरङ्‌गी आम, मीङ्‌बु धङ् ॱलोप्‍टुक् दीबदङ् मुज्‍यीक्‍ल कफर्नहुम् सार्ल युङ्‌न हुदु स्‍यक्‍पु ॱसुम्‍जो़त् स्‍यीजो़त् च्‍यीक् देप्‍प बेत्।

ॱनी यहुदी घयेत् छ्‌यीबे धी़रीम् ॱलीच्‍च्‍येम ॱयेङ्‌नी, येशुसो यल्‍ल यरुशलेम्‍ल फीम्‍ब बेत्। ॱनी हुदु हुगी छ्‌यो़गङ्‌गी च्‍यारीगी नङ्‌ल स्‍युन फीन्‍नी, उन ॱलङ्, लुक् धङ् पुक्‍मु घयेत् ॱरोक्‍ल चोङ्‌गेन् धङ् मी यरी पयीसक् ज्‍यीगीन् यो़प्‍पदङ् ठेप्‍प बेत्। हुनी खोङ्‌गी बेन्‍ज्‍येम थक्‍पे डेङ्‌ज्‍यक् च्‍यीक् सो़न हुगी लुक् धङ् ॱलङ्, ॱनी हुब चोङ्‌गेन् दीब अक् कुरीक् दीत्‍न पयीसक् ज्‍यीस्‍से ढज्‍योक् घयेत् दीब दप्‍न पयीसक् दीब ॱनम्‍ल तोर्न दीत् तङ बेत्। पुक्‍मु ॱरोक्‍ल चोङ्‌गेन् दीबल खोङ्‌गी हीब कुरीक् छ्‌यील खुर्ल ज्‍युक्। ङे यप्‍की सीङ्‌गङ् हीगो खीत् घयेक्‍की छोङ्‌गङ् बक् ॱनो़ज्‍युङ? झ्‍यीब बेत्। ॱनी ॱलोप्‍टुक् दीबे हीगो थोङ्‌नी, हीगी ढीक्‍ल ॱसुङ्‌रप्‍ल थो़ङ्‌गेन्
ख्रीष्‍ट्‌की खोङ् रोरङ्‌गी यप्‍की सीङ्‌गङ्‌गी ढीक्‍ल स्‍यीदङ् लङ्‌न म दीरङ् ॱस्‍यीयेत् सीक्‍केन् दी हुबे ढेङ्‌गी ॱसो़ब बेत्।
हुनी यहुदी छ्‌यीया घयेत् दीब युङ्‌न हुबे येशुल खो़त् हीगी दक्‍पु डस्‍सी हीन्‍दुक् झ्‍यीबे ॱवङ् खो़त्‍ल यो़त्‍न, ङीत्‍ल यीक् छ्‌यीम्‍मी़ लेगी ता च्‍यीक् तो़न्‍दे झ्‍यीब बेत्। ॱनी येशुगी हुबल हीगी छ्‌यो़गङ् हीगो खीत्‍रङ्‌गी ॱरुम्‍लोङ्‌दे त। ङे हीगो ङीम ॱसुम्‍ल सो़ तङ्‌गी झ्‍यीब बेत्। ॱनी हुबे लेल्‍ल हीगी छ्‌यो़गङ् हीगो सोवल लोङ स्‍यीप्‍च्‍यु स्‍यरुक् थोबल खोक्‍की घन्‍दुक् झ्‍यीन ङीम ॱसुम्‍ल सोगेन् सीक्‍केन्? झ्‍यीब बेत्। ॱनी येशुगी हीगो म दी छ्‌यो़गङ्‌गी ढीक्‍ल झ्‍यीब मेम्‍ब, रोरङ्‌गी ली़गी ढीक्‍ल झ्‍यीब हीङ्‌गो़प्‍प बेत्। ॱलोप्‍टुक् दीबे एक् त तीङ्‌ला येशु ढोङ्‌नी, यङ् ॱसोम्‍बुल लोङ्‌नी क, येशुगी केच्‍च्‍य हीगो ढेम्‍ब ॱसो़न, हुनी क हस्‍सो़त् ॱसुङ्‌रप्‍ल धङ् खोङ्‌गी ॱसुङे केच्‍च्‍य हुल छ्‌य स्‍यक्‍प बेत्।
ॱनी हुगी धी़रीम्‍गी यङ्‌ल यरुशलेम्‍दु येशुगी यीक् छ्‌यीम्‍मी़ लेगी ता गज्‍येन् झ्‍यीन तो़म्‍ब थोङ्‌नी, मी गज्‍येङ्‌गी खोङ्‌ल छ्‌य स्‍यक्‍प बेत्। ॱनी हीन्‍न अक्, हुब घयेक्‍की ॱसीम्‍ब दी खोङ्‌गी कुरीक् ॱह घोनी, हुबल खोङ् ॱलो ॱमत् खीब बेत्। ॱनी कोलीमीगी ॱसीम्‍ब घन्‍दुक् झ्‍यीब युङ्‌गेन् बेक्‍क हुगो खोङ्‌ल ॱसी़ इक् ॱस्‍यो़त् मीत् गो़ब, कुरीक् ॱह घोगो़प्‍प बेत्।

Klausytis युहन्‍ना 2