संत.मरकुस 11
11
जिरोसालेम रे ईसु हिजोअः रआ खुसी मनाव
(संत.मत्ती 21:1–11; संत.लुकास 19:28–40; संत.जोहन 12:12–19)
1तेकर हुंकू जिरोसलेम दुबाःड़े जैतुन नुमू रेनअः बुरु रकाःब केते बैतफगे हेतरअ बैथनिया डिही रे सोदोर नेनाकु, हिमीन रे बनहोंड़ चेला ताय के नोकान कंहड़ी कुलगोःड लिकिनाय, 2“निआँ हेनाःड रेनअः डिही रे सेन बेन हेतरअ होंड़े सोदोरोः तोरन गी मियांड गधा छउना रे ओका हिला होअः ओके होअः काकु देःग ताना, हुनी के तोल लिनी नाम कियाबेन, हुनी के राड़ा केते आगुई बेन। 3तेकर जाहें आबेन के ‘एतान लःअय राड़ाः दियाबेन?’ बेता बेनाकु दो, आबेन परभु के नुई आला दरकार एदनाअ बेता कुबेन, होले हुनी के तुरते आगुः चिकेबेनाकु,” बेता लिकिनाय।
4तेकर हुंकिन सेनोः नाकिन, हेतरअ बाहरी रे राच दुवार दुबाःड़े गधा छउना के तोल लिनी नाम लियाकिन। हेतरअ राड़ाई केनाकिन हिमीन रे, 5होनाःड़े तिंगु ऊनकु मेसे मिहोंड़-बनहोंड़, “एतान दाबेन, आबेन गधा छउना के एतान लःअय राड़ाः दियाबेन,” बेताः दिकिनाकु।
6तेकर जे लकान ईसु बेता ताही लिकिनाय, हेंकान हुंकू के कंहड़ीओ लिकुआकिन, होले ईदीः ची लिकिनाकु। 7तेकर हुंकू गधा छउना के ईसु दुबाःड़े आगु केते हुनी तेङ रे अपन गेन्दरअ के बिल लअकु हेतरअ हुनी तेङ रे ईसु दुड़ूः नेनाय। 8हेतरअ ढेर होड़ होरा रे गेन्दरअ ताकु के बिल लअकु, तेकर एटाअ होड़ सिङ रेनअः डाहुड़ा के मांअ आगु केते बिल लअकु। 9#सिरिंग 118:25,26तेकर जे हुनी मड़ांग-मड़ांग सेनोः केनाकु, हेतरअ जे तयोम-तयोम सेनोः केनाकु,
“हुंकू होसन्ना!#11:9 होसन्ना परमेसर आला बड़ाई हुयाआ।,
परभु आला नुमू रे हिजोअः तनाय हुनी धनया एदानिया के परमेसर आसिसीयाय!
10आबु आली आपा दाऊद आला राईज जे हिजोअः ताना होना धनया एदनाअ! के, परमेसर आसिसेआय, सिरमा रे होसन्ना!”
11तेकर हुनी जिरोसलेम सोदोर केते बड़े बिनती ओड़ाअ रे बोलो नेनाय, हेतरअ तमानते जामा जिनीस के नेल केते, बोंगा हासुरोः केना, हिना लःअय बारा चेला ताय लोः बैथनिया सेन नेनाय।
ईसु अंजीर सिङ के सरपाव लःअय
(संत.मत्ती 21:12–22)
12हेतरअ दोसरा हिला हुंकू बैथनिया तरअः उडुंग नेनाकु दो ईसु के रांगेःग आदा लिया। 13हुनी लंका तरअः हरियार अंजीर सिङ के नेल केते, होंड़े तरअः जहान ते ओका भेटाअः ओका होले मेन केते हेनाःड नेनाय, बकिर सेकाम ते तरअः एटाअ एतान होअः का ताहिनेना, एता लःअय ची जोयोः रअः दिन का ताहिना। 14हेतरअ हुनी होना अंजीर सिङ के, “तिहिङ तरअः आम आला जोः के हिरगीस आलकु जोम के, मेन केते कंहड़ी लःअय, तेकर चेला ताय होना के आयुम लअकु।”
आ-आखरिङकु के मंदिर तरअः उडुंग लिकुआय
(संत.लुकास 19:45–48; संत.जोहन 2:13–22)
15तेकर हुंकू जिरोसलेम सोदोर केते हुनी बड़े बिनती ओड़ाअ रआ राच रे बोलो नेनाय, हेतरअ होंड़े जामा किरिङ-आखरिङकु के बाहरी ते उडुंग किद कुआय, तेकर ढिबुवा भांजाव#11:15 ढिबुवा भांजाव रोमी आउर युनानीकु आला ढिबुवा के जाहुदीकु बदली केनाकु गिरजा ओड़ाअ रे दान एमोअ लःअय कु आला पिरहा हेतरअ पेरवाँ आ-आखरिङकु आला पिरहा के उलटाव केदाय। 16हेतरअ बड़े बिनती ओड़ाअ रेनअः राच रे तरअः एतान जिनीस होअः ओके केहोः काय ईदी आगुः चील कुआ। 17#जसा 56:7; जिर 7:11तेकर हुनी उदूः केते, “ईङ आला ओड़ाअ जामे जाईतकु आला बिनती ओड़ाअ कंहड़ी योआ, आपे दो रे-रेःगकु आला मांड़ा पे बनाव केदा, नोकान परमेसर आला पुथी रे लिखा लअः एदनाआ,” बेता लिकुआय।
18नोःआँ बात के आयुम केते बड़े पुरोहितकु हेतरअ धरम पुथी सि-सिखावकु, हुनी के गो गोएःग लःअय मोका कु नामे केना, हेतरअ हुनी आला उउदूः रे जामा होड़ छकित जुनोः केनाकु, हेतरअ हुंकू हुनी के बोरोई केनाकु।
19तेकर हुंकू आयुःब नेना हिमीन रे सहर तरअः उडुंग नेनाकु।
अंजीर सिङ तरअः सिख
(संत.मत्ती 21:20–22)
20दोसरा हिला निदवा बेरा हुंकू हिना अंजीर सिङ पखा तरअः परोमोः केनाकु, हिमीन रे होना अंजीर सिङ के जाईर तरअः रोहोड़ ओना नेल लअकु। 21हेतरअ पतरस होना बात के उईहार नाम केते “ए गुरू, नेलेमे तो आम सरपाव ताही लआम होना अंजीर सिङ रोहोड़ ना,” बेता लियाय।
22ईसु, हुंकू के परमेसर रे बिसवासेपे, मेन केते कंहड़ी रूवाड़ लःअय। 23#सं.मत्ती 17:20; 1 कुरि 13:2ईङ सचेगी कंहड़ीः दिपीईङ, जाहें होअः नोःआँ बुरु के, रचाअ बिरिःड केते डाहा रे ऊयुअ जुनोः मे, मेन गेआय, हेतरअ अपन मन रे काय सकेआ, बकिर जे ईङ कंहड़ी तानिङ हेंकानोआँ गी, मेन केते बिसवासेआय, होले हुनी लःअय हेंकान कोआ गी। 24हिना लःअय कंहड़ीः दिपीईङ, आपे जे बिनती रे कोयापे, होना जामा के आबु नाम केदाबु मेन केते बिसवासेआपे, होले आपे नाम केआपे।
25 #
सं.मत्ती 6:14,15 हेतरअ बि-बिनती लःअय आपे तिंगु नापे तेकर आपे आला मन रे एटाअ होड़ आला जेतना खीस एदनाअ होले, होना के छमा यापे, होले आपे आली सिरमा रिनी बाबा होअः आपे आला गुनाह के छमा केआय। 26[बकिर आपे कापे छमाया रेदो आपे आली सिरमा रिनी बाबा आपे आला होअः एरे छमाया।]#11:26 आधा पुथी रे नोःआँ पद का भेटाअः।
ईसु के अधिकार बारे कुली लियाकु
(संत.मत्ती 21:23–27; संत.लुकास 20:1–8)
27तेकर हुंकू जिरोसलेम रूवाड़ हीःग नेनाकु हेतरअ ईसु बड़े बिनती ओड़ाअ रेनअः राच रे दंड़ान केनाय हिमीन रे बड़े पुरोहितकु हेतरअ धरम पुथी सि-सिखावकु पुरखाकु, हुनी दुबाःड़े हीःग नेनाकु। 28हेतरअ हुंकू “आम एतान हक रे नोःआँ कामीयाम, चाहे नोःआँ कामी मे, मेन केते ओके आचु ताद मेआय?,” मेन केते कुली लियाकु।
29तेकर ईसु, ईङ होअः आपे के मियांड बात कुलीः दिपीईङ, होना के ऊदुगिङा पे होले ईङ होअः ओके आला हक रे नोकान कामी ईङ के उदूः पेईङ, मेन केते कंहड़ी रूवाड़ोः लिकुआय। 30“जोहन आला बतिस्मा सिरमा पखा तरअः ताहीना ची होड़कु पखा तरअः ताहिना?,” ईङ के उदूः गेपे, बेता लिकुआय।
31तेकर हुंकू आकु-आकु रे कंहड़ीयोः तानाकु “आबु सिरमा पखा तरअः मेन गेआबु होले दो, एतान लःअय हुनी आला कापे बिसवास लआ, बेता किबुआय। 32तेकर आबु होड़कु पखी तरअः बेताईयाबु होले दो,” हुंकू होड़ के बोर केनाकु “एतान लःअय ची जामा होड़ जोहन के साथेगी आगमजानी ताहिनाय के पाड़ी केनाकु” 33हिना लःअय हुंकू ईसु के, “आले काले पाड़ीआ बेता लियाकु,” तेकर ईसु होअः हुंकू के “ईङ होअः आपे के इरिंग उदूः पेआ, नोःआँ एतान हक रे कामी ईङ के, बेता लिकुआय।”
Oyo Eponami Sikoyo:
संत.मरकुस 11: ASR
Tya elembo
Kopya
Kokisana
Kabola
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2023 NLCI CC BY-NC-ND 4.0