संत.जोहन 9
9
जनम तरअः सुरदास आला बेसोअ
1होरा रे ईसु मियांड होड़ के नेल लियाय जे जनम तरअः अंधरा ताही नेनाय 2हुनी आलकु चेलातय ईसु के कुली लियाकु “हे गुरू ओके पाप थिलाआय, ची नुई जनम तरअः सुरदासाय?” नुई ची नुई आलकु एंगा-आपा? 3ईसु हुंकू के कंहड़ी रूवाड़ोअ लिकुआय “ना दो नुई होड़ पाप लःअय आउर ना नुई आलकु एंगा-आपा। नुई नोःआँ लःअय जनम तरअः सुरदासाय ची परमेसर आला काम हुनी रे दिसतार जुनोः। 4जे ईङ के कुलगोःड तदिंङाय, आबु के हुनी आला जामा काम दिन बिताअः तरअः पहिल रेगी पुपुरा एदनाआ। निदा दराआ जेकर रे ओके होः कामी एरकु दड़ीआ। 5#सं.मत्ती 5:14; सं.जोह 8:12ईङ जब तक दुनिया रे एदानिया तब तक ईङ दुनिया रिनी मरसल हेके।”
6नोःआँ कंहड़ी केते ओत रे बेःग लःअय, आउर होना बेःग दाअः रे हास सुवेःड लःअय, आउर होना हास के हुनी सुरदास आला मेःड रे लगाव केते, 7हुनी के बेता लियाय, “जु सिलोह रअः डोबरा रे आब-आमिनोअमे” (सिलोह रअः माने “कुलगोःड लिनी हेके”) हुनी सेन केते आब-आमीन नेनाय, आउर नेल यअते रूवाड़ हीःग नेनाय।
8तब खुड़-खिरकी रिनकु आउर हुंकू जे हुनी के पहिल भीख कोय नेली केनाकु कंहड़ी लअकु। “नुई हिनी नलागे एतान जे दुड़ूः केते भीख कोय केनाय?”
9थोड़ेक होड़ कंहड़ी लअकु “हाँ नुई हिनी हेके”, थोड़ेक कंहड़ी लअकु। “कोवान नुई हिनी लकान जाहें एटाअ हेके हुई।” बकिर हुनी कंहड़ी लःअय “ईङ हिनी हेके।” 10तब हुंकू हुनी के कुलीअ दियाकु “आम आला मेःड एता लकान उघड़ाव ना?” 11हुनी कंहड़ी रूवाड़ोः लिकुआय, “ईसु नुमू रिनी मियांड होड़ हास सुवेःड लःअय, आउर ईङ आला मेःड रे लगाव केते ईङ के सिलोह रे सेन केते आब-आमिनोअमे,” बेता लिङाय, “ईङ सेन केते आब-आमीन नेनिंग आउर नेल दिंग।” 12हुंकू हुनी के कुली लियाकु “हुनी ओकाःड़े एदानिङा?” हुनी बेता लिकुआय “ईङ काईंग पड़ीआ।”
फरीसीकु आला चंगायोः बारे खोज-पुछाईर
13होड़कु हुनी के जे पहिल सुरदास ताहिनाय, फरीसीकु दुबाःड़े आगु लियाकु 14जे हिला ईसु हास सुवेःड केते हुनी आला मेःड के बेस थिलाआय, होना सथाअ हिला ताहिनेना। 15फरीसीकु होः आम एता लकान नेल दाड़ी लअम मेन केते कुली लियाकु हुनी हुंकू के बेता लिकुआय। “हुनी ईङ आला मेःड रे हास सुवेःड केते लगाव लःअय, तेकर ईङ आब-आमीन नेनिंग आउर नहाअः नेल दाड़ी तानिङ।” 16नोःआँ रे थोड़ेक फरीसीकु कंहड़ीः दाकु “हुनी होड़ परमेसर पखा तरअः कनिङा, एता लःअय ची सथाअ हिला रअः कनहुन के काय मनाआ।” थोड़ेक कंहड़ी लअकु “पापी होड़ नोःआँ लकान चिनहा एतान लकान देखाव सकाव केआय?” नोःआँ लकान हुंकू रे पाटरी का जुमाव नेना। 17हुंकू हुनी अंधरा के फिन बेता लियाकु, “हुनी आम आला मेःड के बेस लःअय हुनी बारे आम एतान कंहड़ीयाम?” हुनी बेता लिकुआय “आगमजानी हेके।” 18जाहुदीकु हुनी अंधरा ताहिनाय आउर नहाअः नेल दाड़ी तनाय सेके बिसवास का आदाकु केना, हिना लःअय हुंकू हुनी आलकिन एंगा-आपा के रा-राअः कुलगोःड लिकुआकु। 19आउर कुली लिकनाकु “नुई आबेन आली होपोन हेके एतान? जेकर बारे रे नुई जनम तरअः अंधरा ताहिनाय कंहड़ीयाबेन? दो नहाअः एता लकान नेल दाड़ीः दाय?” 20हुनी आलकिन एंगा-आपा कंहड़ी रूवाड़ोः लिकुआकिन “आलिंग पाड़ीआलिंग ची नुई आलिंग आली होपोन हेके आउर नुई जनम तरअः अंधरा ताहिनाय, 21बकिर नहाअः एता लकान रे नेल दड़ीआय सेके काले पाड़ीआ, आउर नोःआँ होः काले पाड़ीआ ची नुई आला मेःड के ओके बेस लःअय। नुई जवानाय नीई के कुलीपे। नुई अपन बात अपन-हारते कंहड़ी उदूः केपेआय।” 22हुनी आलकिन एंगा-आपा जाहुदी नेताकु के बोर केनाकिन, हिना लःअय हुंकिन कंहड़ी लअकिन एता लःअय ची जाहुदीकु, जदि जाहें ईसु के ख्रीस्त कंहड़ीयाकु, दो बिनती ओड़ाअ तरअः उडुंग गोअ ताकु मेन केते मिजुट हुयाव चुकाव थिनाकु। 23नोःआँ चलते हुनी आलकिन एंगा-आपा कंहड़ी लअकिन “हुनी जवानाय हिनी के कुलीपे।”
24तब हुंकू, हुनी के जे अंधरा ताहिनाय, आउर मिसा राअः केते, बेता लियाकु “परमेसर आला बड़ाई में! आले दो हुनी होड़ पापीआय सेके पड़ीआले।”
25हुनी कंहड़ी रूवाड़ोः लिकुआय “ईङ काईंग पाड़ीआ ची हुनी पापीआय ची कोवान, ईङ मियांड बात पड़ीईंग ची ईङ अंधरा ताहिनिंग आउर नहाअः दो नेलेईंङ।”
26हुंकू, हुनी के फिन बेता लियाकु “हुनी आम लोः एतान लःअय? आउर एता लकान आम आला मेःड के बेस लःअय?”
27हुनी हुंकू के बेता लिकुआय “ईङ दो आपे के कंहड़ी चुकाव तानिङ आउर आपे कापे आयुम लअः, नहाअः दो आउर मिखेप एता लःअय आअयुम नाम तनापे? आपे होः हुनी आलकु चेला पड़ीयोअ नाम तनापे एतान?” 28तब हुंकू, हुनी के उलटा-सीधा कंहड़ी केते बेता लियाकु “आम गी हुनी आली चेला हेके, आले दो मुसा आलकु चेला हेके। 29आले पाड़ी आले ची परमेसर मुसा लोः बात लःअय, बकिर नुई होड़ के काले पाड़ीआ ची ओका रिनी हेके।” 30हुनी हुंकू के बेता लिकुआय “नोःआँ दो अचरज रेनअः बात हेके हुनी ईङ आला मेःड के उघड़ाव लःअय आउर आपे नोःआँ होः कापे पाड़ीआ ची हुनी ओका रिनी हेके। 31आबु पड़ीआबु ची परमेसर पापीकु आला के काय आयुमेआ, बकिर हुनी हुंकू आला के आयुमेआय जे परमेसर आलकु धरमी होड़ हेके आउर हुनी आला मरजी मोताबिक चलाअकु। 32जुग-जुग तरअः नोःआँ आअयुम रे का हीःग नेना ची जाहें जनम तरअः अंधरा के बेस तदियाकु। 33जदि नुई होड़ परमेसर पखा तरअः एरे ताहिकोआ दो एतान होः ए-एतान एरे दड़ीआ।”
34हुंकू हुनी के बेता लियाकु “आम दो एकदम पाप तरअः गी जनमाव तनाम, आम आले के सि-सिखाव चलाव नाम?” आउर हुंकू हुनी के बाहरी उडुंग किदयाकु।
35ईसु आयुम लःअय ची हुनी के बाहरी उडुंग किदयाकु, हिना लःअय भेंट नेनाय दो हुनी के बेता लियाय, “आम मनवा होपोन रे बिसवासे-आम एतान?”
36हुनी कंहड़ी रूवाड़ोः लियाय “हे परभु हुनी ओके हेके जे ईङ बिसवासे ईङ?”
37ईसु हुनी के बेता लियाय “आम हुनी के नेल तदियाम आउर जे आम लोः बात दाय हिनी हेके।”
38हुनी दंडवात केते बेता लियाय, “हे परभु ईङ बिसवासे ईङ।” 39तब ईसु बेता लियाय “ईङ नोःआँ दुनिया रे नेनेयाय लःअय हीःग तानिङ, जेकर से ची जे काकु नेलेआ हुंकू नेलेकु, आउर जे नेलेआकु हुंकू अंधरा जुनोअकु।” 40जे फरीसी हुनी लोः ताहिनाकु, हुंकू नोःआँ बात के आयुम केते हुनी के बेता लियाकु, “एतान आले होः अंधरा-आले?” 41ईसु हुंकू के बेता लिकुआय “जदि आपे अंधरा ताहिकोआपे दो पापी एरपे ठहराव कोआ, बकिर नहाअः कंहड़ीआपे ची आले नेलेआले हिना लःअय आपे आला पाप बनाल ताहिनोआ।”
Oyo Eponami Sikoyo:
संत.जोहन 9: ASR
Tya elembo
Kopya
Kokisana
Kabola
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2023 NLCI CC BY-NC-ND 4.0