प्रेरित.कामी 16
16
पौलुस आउर सिलास तिमुथियुस के साँघे ईइदी
1नोःआँ तयोम पौलुस दिरबे तेकर लुस्तोरा रे होः सेन नेनाय, होनाःड़े तिमुथियुस नुमू रिनी मियांड चेला ताहीनोः केनाय, हुनी आली एंगा जाहुदिनी बिसवासी ताही नेनाय। बकिर हुनी आली आपाते युनानी ताही नेनाय। 2लुस्तोरा तेकर इकुनियुम रिनकु बोकोकु कंहड़ी लअकु ची तिमुथियुस बढ़ियाँ नामी होड़ ताहिनाय 3पौलुस आला बिचार ताहिनेना ची, हुनी के अपन गाती ईइदी नाम केनाय, हिना लःअय हुनी तिमुथियुस आला खतनाः ची लिकुआय, एता लःअय ची होना राईज रे ताहीनोः कु जामे जाहुदीकु पाड़ी केनाकु ची, तिमुथियुस आली आपाते युनानी ताहिनाय। 4हुंकू सहर-सहर सेन यअते, होना कनहुन के जिरोसलेम रिनकु प्रेरितकु तेकर बुजरूग अगुवाकु ठहराव थिलआकु होना कनहुन रअः मोताबिक चलाअ लःअय बिसवासीकु के सिखाव कु केनाकु 5नोःआँ लकान कलीसिया रिनकु बिसवासीकु बिसवास रे मजगुत सेन नेनाकु, आउर गनती रे रोज-दिन बढ़ाव सेन नेनाकु।
तोरोआस रे पौलुस आला दर्सन
6जब पबितर आतमा हुंकू के एसिया रे बचन रआ परचार लःअय बधराव लिकुआय दो, हुंकू फ्रुगिया तेकर गलातिया पहटा रे बोलो यअते सेन नेनाकु। 7हुंकू मुसिया रअः सिमान सोदोर केते, बिथुनिया सेनोः लःअय कुरनीसे केनाकु, बकिर ईसु आला आतमा हुंकू के सेनोः लःअय बधराव लिकुआय। 8हिना लःअय हुंकू मुसिया परोम केते, तोरोआस हीःग नेनाकु। 9होनाःड़े पौलुस निदा दर्सन नेल लःअय, मियांड मकिदुनिया हेरेल, “आम समुदर परोम केते मकिदुनिया एला तेकर आले के मदाईत लेमे,” कंहड़ी केते मियांड हेरेल हुनी मड़ांग रे तिंगुअ नाय आउर गोहराअ तनाय। 10नोःआँ दर्सन तरअः तयोम आले, नोःआँ समझाव केते, ची परमेसर होनाःड़े बेस खभाईर सुसुनाव लःअय, आले के राअः तदलेआय तुरते मकिदुनिया सेनोः चहाव नेनाले।
फिलिप्पी रे लीदिया आला मन रूवाडोः
11हिना लःअय तोरोआस तरअः जहाज रे सोझे समोथ्राके टापु, तेकर दोसरा हिला नियापुलिस रे हीःग नेनाले। 12होनाःड़े तरअः आले फिलिप्पी सोदोर नेनाले, जे मकिदुनिया राईज रअः होना पहटा रेनअः नामी सहर तेकर रोमीकु आला बस्ती हेके, हेतरअ आले होना सहर रे थोड़ेक दिन ताही नेनाले। 13सथाअ हिला नोःआँ समझाव केते ची, होनाःड़े जहान बिनती ओड़ाअ एदनाअ मेन केते, सहर रेनअः बाहरी नाई दौंड़ी रे हीःग नेनाले। आले दुड़ूः नले तेकर होनाःड़े जवार उनकु आउराईतकु लोः बतियाव दाले। 14आ-आयुमकु आउराईतकु मेसे रे मियांड आला नुमू लुदिया ताही नेना, तेकर हुनी थुआतिरा सहर रिनी ताहीनोः वाला ताही नेनाय। हुनी मंहगा मलमल गेन्दरअ आखरिंगे केनाय, तेकर परमेसर रे भरसा दोदोहोई भक्त ताहिनाय, परभु हुनी आला मन के खोलाव लःअय आउर हुनी पौलुस आला बात रे मन लगाव लःअय। 15लुदिया आउर हुनी आलकु घराईता रिनकु बतिस्मा ईदी लअकु, तयोम लुदिया आले लोः गोहराव नेनाय, “जदि आपे ईङ के परभु आली बिसवासी समझाआपे दो हीःग केते आले ओड़ाअ रे ताहिनपे” आउर हुनी आले के मनाव-बुझाव केते ईदी लेलेआय।
पौलुस आउर सिलास जेहेल रे
16जे बेरा आले बि-बिनती ठाँव पखी सेनोः केनाले, हिमीन रे मियांड कम उमाईर रिनी धाँगड़ीन लोः आले आला भेंट हुयाव नेना। हुनी मियांड डलिया नेनेल चिई मुवाँ आतमा रअः कबजा रे ताही नेनाय, तेकर हिजोअ दिन रेनअः बारे उदूः-उदूः गोमके कु लःअय ढेर ढिबुवा कामी केते आगु उकु-केनाय। 17हुनी आले तेकर पौलुस के ओतोङ-ओतोङ छेराव एकान केनाय, “नुकू होड़ परम परधान परमेसर आलकु बंधाउवा हेके, तेकर आपे के उधार रेनअः होरा उदूओपे-आकु।” 18हुनी ढेर दिन जगुत नेकान एकाय केनाय। आखरी रे पौलुस बिखराव नाय तेकर पछली लुड़ीःग चुवेर केते होना आतमा के बेता लियाय, “ईङ आम के ईसु ख्रीस्त आला नुमू रे नुई तरअः उडुंग जुनोःमे मेन केते हुकूम एमाअ दिमीईङ।” आउर हुनी हेने घड़ीक हुनी तरअः उडुंग नाय। 19जब हुनी आलकु गोमके कु नेल लअकु ची, हुंकू आला कमाई रअः आसरा घटाव ना दो, हुंकू पौलुस तेकर सिलास के सःब केते, चौक रे हाकिमकु दुबाःड़े ओर ईदी लिकिनाकु। 20हुंकू पौलुस तेकर सिलास के फ-फैसला कु दुबाःड़े हाजीर लिकिनाकु, “नुकिन होड़ आबु आला सहर रे हेंड़ो-हाँड़ केदाकिन, नुकिन जाहुदी किन हेके। 21तेकर नोकान नेग-दसतुर के परचारे आकिन जेके आ-अपनाव चाहे होना रे चलाअ आबु रोमी रिनकु आला कनहुन रअः मोताबिक उचित कनोआँ, मेन केते कंहड़ी लअकु।” 22तब हुंकिन आला बिरोध रे तुन्दरा होड़ जवार नाकु।
तब फ-फैसलाकु पौलुस आउर सिलास आला गेन्दरअ अड़गुअ ची केते, हुंकिन के कोकोर्ड़ाव लःअय हुकूम एमा लिकुआकु। 23हुंकू पौलुस तेकर सिलास के मुरुक हुमाअ ची लिकुआकु तेकर दरोगा के बड़ा रोकोरोको से हुंकिन आला पहरा एमोअ रेनअः हुकूम एम केते, हुंकिन के जेहेल रे आदेर लिकिनाकु। 24दरोगा नोकान हुकूम आयुम केते, हुंकिन के भीतरी जेहेल ओड़ाअ रे दोहो लिकिनाय, तेकर हुंकिन आला जांगा के काठ रे बेस केन चिमटाव केते रट-रटाउवा तोल केदाकु।
पौलुस आउर सिलास जेहेल तरअः उड़ूंगोः
25आधा निदा पौलुस तेकर सिलास बिनती यआते, परमेसर आला स्तुति सिरिंग-सिरींगे केनाकिन, तेकर एटाअ कैदी कु होना के आयुमे केनाकु 26दो हिमीन रे अचाका नोकान जोर भुईंडोल हुयाव नेना ची, जेहेल ओड़ाअ रअः नेव हिलाव ना आउर तुरते जामा दुवार उघड़ाव ना तेकर जामे कैदी कु आला हाथकड़ी रड़ाअ ना। 27दारोगा बिरिःड नाय तेकर जेहेल ओड़ाअ रेनअः दुवार उघड़ाव नेल केते, कैदी नीर नाकु समझाव केते हुनी तलवाईर ओर केते, अपने के गोगोएःग नाम केनाय। 28बकिर पौलुस, “अपने के एतान होः हानी आलुम सोदोर के, एता लःअय ची आले जामे निआँड़े एदान लेआ,” मेन केते जोड़ से गुल केते कंहड़ी लःअय।
29तेकर दारोगा ढिबरी आगुः ची केते, जल्दी भीतरी सेन नेनाय तेकर पौलुस हेतरअ सिलास रअः मड़ांग बोर ते थरथराव यआते जांगा तकिन रे नुर नाय। 30तेकर हुंकिन के बाहरी आगु केते “हुजूर उधार नानाम लःअय ईङ एता नीईङ?” बेता लिकिनाय।
31“परभु ईसु ख्रीस्त रे बिसवासेमे दो, आम आउर आम आलकु घराईता उधार नाम केआकु,” मेन केते हुंकिन कंहड़ी रूवाडोः लियाकिन। 32तेकर हुनी दारोगा तेकर हुनी आलकु गोटा ओड़ाअ रिनकु के, परभु आला बचन के सुनावऊ लिकुआकिन। 33हुनी निदा गी हेने घड़ीक हुंकिन के ईदी केते, हुंकिन आला घाव के धोवाव लःअय तेकर हुनी अपन ओड़ाअ रिनकु जामे लोः तुरते बतिस्मा ईदी लःअय। 34तब हुनी हुंकिन के अपन ओड़ाअ ईदी केते, हुंकिन के घोटो खियाव लिकिनाय। तेकर गोटा ओड़ाअ रिनकु परमेसर रे बिसवास केते, खुसी मनाव लअकु।
35निदवाः ना दो फ-फैसला कु सिपाहीकु एड़े, “हुंकू होड़ के बाई गुल ताकुपे,” मेन केते कंहड़ी कुलगोःड लअकु।
36“फ-फैसला कु आबेन के बाबाई लःअय कंहड़ी कुलगोःड तदाकु। हिना लःअय नहाअः दो उडुंग केते सानती से सेनोः जुनोः बेन,” मेन केते दारोगा नोःआँ बात के पौलुस तरअः कंहड़ी लःअय।
37बकिर “पौलुस आलिंग के जे रोमी रिनकिन होड़ हेके सेके बेगार दोसी ठहरावते, होड़कु मड़ांग रे हुमाअ ची लिलङाय तेकर जेहेल रे आदेर ची लिलङाय, नहाअः आलिंग के सिड़िःग-सिड़िःग उडुंग दिलङाय एतान? नोकान एरे हुयाअः बकिर फ-फैसला कु अपन-हारते हीःग केते, आलिंग के बाहरी उडुंग ईदी लिङाकु” मेन केते पौलुस सिपाहीकु के बेता लिकुआय।
38सिपाहीकु नोःआँ बात फ-फैसला कु के कंहड़ी सुनावओ लिकुआकु, तेकर हुंकिन रोमी रिनकिन हेके, नोःआँ आयुम केते बोरोः नाकु। 39तेकर हीःग केते उडुंग लिकिनाकु, तेकर हुंकिन के बाहरी ईदीः तु केते सहर तरअः सेनोः जुनोः बेन मेन केते गोहराव नेनाकु। 40पौलुस तेकर सिलास जेहेल ओड़ाअ तरअः उडुंग केते, लुदिया आला ओड़ाअ रे सेन नेनाकिन। हुंकिन बोकोकु लोः भेंट कोअते, संतवाना एमा केते होनाःड़े तरअः सेनोः नाकिन।
Oyo Eponami Sikoyo:
प्रेरित.कामी 16: ASR
Tya elembo
Kopya
Kokisana
Kabola
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2023 NLCI CC BY-NC-ND 4.0