LEBI GƏ̄ 3
3
Dā̰ kə́ tɔ̄l̄ ba tun̄ kadə̄ Nə́ɓā tām̄ yā kem kógə̄ḿ tə́
1Ré deē kógə̄ḿ gḛ́y ndējə̄ yá̰a̰ kadə̄ tunə̄n̄ tām̄ yā kem kógə̄ḿ tə́ ba i man̄g anī, ādə̄ i man̄g kə́ bəra aláa i kə́ kó̰ó̰ kə́ loon kógə̄ḿ nujə aĺ tá reēń ndējə̄ Kɔ́ɔ̄ɓē tə́. 2Ni a əndā jīn dɔ tə́ pá tá a əja kɔ́ɔn ta kújə kənge naā tə́ ɓáý. Nge tun̄ yá̰a̰ gə̄ ń i ngán Aaro̰ gə̄ ní a sə̄kān̄ mósən kadə̄ gīr̄ gidə loo tun̄ yá̰a̰. 3Ba man̄g ngeé ń noō ní yá̰a̰ gə̄ kə́ yā róō horoó kadə̄ Kɔ́ɔ̄ɓē i yibə̄n kə́ gidə tiīn gə̄ tə́ malang ō, 4mənjon kə́ jōó gə̄ kə yibə̄də́ kə́ gidədə́ tə́ ō, yibə̄n kadə kemən gə̄ tə́ ō, wurən ō. A ɔr̄ wurən i naā tə́ kə mənjon gēé. 5Ba ngé tun̄ yá̰a̰ gə̄ a róōn̄də́ horoó dɔ loo tun̄ yá̰á̰ tə́ naā tə́ kə yá̰a̰ tun̄ kə́ róō horoó kadə̄ Kɔ́ɔ̄ɓē. Nge ń noō i yá̰á̰ kə́ róō horoó kadə̄ Kɔ́ɔ̄ɓē kə́ sēēn nelə̄n.
6Ré yá̰a̰ tun̄ yā de kə́ tām̄ yā kem kógə̄ḿ tə́ i batə̄ aláa i bə̄yā̰ anī, ādə̄ i kə́ bal aláa i kə́ kó̰ó̰ kə́ loon kógə̄ḿ nujə alé. 7Ré i batə̄ anī, a aw̄ń ta kum Kɔ́ɔ̄ɓē tə́. 8A əndā jīn dɔ tə́ tá a əja kɔ́ɔn ta kújə kənge naā tə́ ngé tun̄ yá̰a̰ gə̄ a sə̄kān̄ mósən gīr̄ gidə loo tun̄ yá̰a̰. 9Lon kə́ to yibə̄ gə̄ ń a ɔr̄ yā róō horoó kadə̄ Kɔ́ɔ̄ɓē ní n toó: Kə̄lán kə taá malang ta kə̄ngā dūnə̄n tə́ ō, yibə̄n kə́ gidə tiīn gə̄ tə́ malang ō, 10mənjon kə́ jōó gə̄ kə yibə̄də́ kə́ gidədə́ tə́ ō, yibə̄n kə́ kadə̄ kemən tə́ ō, wurən ō. A ɔr̄ wurən i naā tə́ kə mənjon gēé. 11Ba nge tun̄ yá̰a̰ a róō yá̰a̰ gə̄ ń noō malang dɔ loo tun̄ yá̰á̰ tə́. Nge ń noō i yá̰á̰ kə́ róō horoó kadə̄ Kɔ́ɔ̄ɓē.
12Ré i bə̄yā̰ n deē gḛy ndējə̄ anī, ādə̄ kɔ́ɔ̄ reēń ta kum Kɔ́ɔ̄ɓē tə́. 13A əndā jīn dɔ bə̄yā̰ ní tə́ tá a əja kɔ́ɔn ta kújə kənge naā tə́. Ngé tun̄ yá̰a̰ gə̄ a sə̄kān̄ mósə kadə̄ gīr̄ gidə loo tun̄ yá̰a̰. 14Yá̰a̰n gə̄ kə́ yā róō horoó kadə̄ Kɔ́ɔ̄ɓē i yibə̄n kə́ gidə tiīn gə̄ tə́ malang ō, 15i mənjon kə́ jōó gə̄ kə yibə̄də́ kə́ gidədə́ tə́ ō, yibə̄n kə́ kadə̄ kemən gə̄ tə́ ō, wurən ō. A ɔrə̄n̄ wurən i naā tə́ kə mənjon gēé. 16Nge tun̄ yá̰a̰ a róō yá̰a̰ gə̄ ń noō malang dɔ loo tun̄ yá̰á̰ tə́. Nge ń noō i yá̰á̰ kə́ róō horoó kadə̄ Kɔ́ɔ̄ɓē kə́ sēēn nelə̄n. Loo bə̄yā̰ ní kə́ to yibə̄ gə̄ malang i tām̄ yā Kɔ́ɔ̄ɓē tə́.
17I tām̄ najə̄ ń toō tə́ n loo malang ń ā ī-ndiī tū tə́ ní, ā ə́saī yibə̄ dā̰ aĺ ō, mósə dā̰ aĺ ō ní. I ndū najə̄ kə́ a to ngándáńg tām̄ yāsí tə́ tām̄ yā ngánsí gə̄ tə́ ō, ngán kaasí gə̄ tə́ ō.
Currently Selected:
LEBI GƏ̄ 3: SARDC
Tya elembo
Copy
Kokisana
Kabola
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Bibəl ta Sar̄ © L'Alliance Biblique du Tchad, 2006, 2010.