रोमि 3
3
परमेस्वर खान्धुरलाएक हि
1आधिमि एसा बुङ दोअ्लि दोखे, “एन्सा जेङनु यहुदि जेङकाता हाइदोङ माजेङहि कुनु? हाइ खाताना पालाउ हाइदोङ लाभ मान्थु कुनु?” 2जातिङकोङ, यहुदि जेङलाउ गोताङ खालको लाभ हि। हाइदोनु झाराङखान्तेङ लाम्फा परमेस्वर ताइको पुनित बचन यहुदिगेलाइहेङ जिमा पिहि। 3एदि एम्बालाइता हासुङ परमेस्वरको बचन मामानिहि पानु हाइ इङको काथाहोइ वाको केरा खारेज पावा रो? 4इन्सिका माज्याको, परमेस्वर सत्ते रो झाराङ द्याङ आसत्ते ठार्हाइन्हाको। धरमकिताबता इस्का लेखिका हि:
“ना ताइको बचनता ठिक ठार्हाइन्हा
रो निया जेङलाउ नाङकोङ जित ज्याको।”#ले ५१:४
5कालाउ आधिमि द्याङगेलाइ एसा बुङ दोअ्तावा, केलाइको पाका मारेम्का कामहोइ परमेस्वर धरमाति हि दोअ्का काथा गिलि द्याङगेलाइहेङ साहेता पाखे पानु हाइ परमेस्वर केलाइदोफा चेरताम्पालि रो दार पिलि रेम्का काथा कालाउ? 6परमेस्वर केलाइहेङ दार पिलि हिदिङ थरिहोइ बुङ बिराम माको। एदि परमेस्वर निया पालि मादोका हिनु हेसापा दुनियाहेङ निया पावा कुनु? 7आधिमि एसा बुङ दोअ्लि दोखे, “एदि काङको आसत्तेहोइ परमेस्वरको सत्तेहेङ बार्हेपातेङ वाको झन मान जेङखे पानु हाइपालि कासेहेङ पापि ठार्हाइलि?” 8कालाउ आधिमि रेम्का काम तिनाको दोअ्तेङ दोङ केलाइ पाप पाइने दोअ्न्हाहि आङ! आधिमि इदोङ दुस केलाइहेङ लागाइखे। इस्का दुस लागाइका द्याङहेङ उचित साजाइ ज्यावा।
धरमाति हासु बुङ मान्थु
9एन्सा जेङनु केलाइ यहुदिगेलाइ हाइ बोजात्यागेलाइ खान्तेङ रेम्का हिन्हाहि कुनु? आहाँ मामा मान्थुन्हाहि। हाइदोनु का लाम्फादोङ दोअ्होइका यहुदि रो बोजात्यागेलाइ झाराङ पापको आधिनता हिन्हाहि। 10धरमकिताबता इस्का लेखिका हि:
“इन्ता धरमाति द्याङ हासु मान्थु।
एअ्मि बुङ मान्थु।#ले १४:१-३; ५३:१-३
11इन्ता हासुङ बुझिका द्याङ मान्थु।
इन्ता परमेस्वरहेङ भोका एअ्मि बुङ मान्थु।
12झाराङ दामा बिराइका हि।
भाराङ काम मालागिका हि।
रेम्का काम पाका हासु बुङ मान्थु।
एअ्मि बुङ मान्थु।”
13“एम्बालाइको काथा ते नुइ हेन्हाका तोमसो ओल्हिका दिगमिगजेङका गान्धा भाइका हि।
एम्बालाइ ताइको देतोङहोइ ढाटाइका काथा खिनिङ पाखे।”
“एम्बालाइको काथा बिखहिका पुह्याँको बिख भाइका हि।”#ले ५:९; १४०:३
14“एम्बालाइको नुइ साराप रो खाका काथाहोइ पोङघाका हि।”#ले १०:७
15“एम्बालाइ दिनाङ बोमिहेङ सेअ्लि हातार पाखे।#यासाइया ५९:७-८
16एम्बालाइ जेता हानिलाउ बुङ मुअ्का रो बिपत चुमाखे।
17एम्बालाइ मिलापता हिलि माभोखे।”
18“एम्बालाइ परमेस्वरदोफा माथिखे।”#ले ३६:१
19न्यामको दोअ्का गोताङ काथा न्यामता हिकालाइको भाअ्सिङ दोअ्तेङ केलाइ गिन्हाखे। इदोइभाअ्सिङ झाराङदोफा हाइदोङ बाहाना मान्थु रो गोताङ दुनिया परमेस्वरको नियाता परेका हि। 20न्यामहेङ मानितेङ हासु बुङ परमेस्वरको आगाता धरमाति जेङलि माद्वावा। हाइपानु न्यामहोइ केलाइ पापि हिन्हाहि दोअ्का काथा खिनिङ तिङपाखे।#ले १४३:२; गलाति २:१६
खान्धुरसो धरमाति
21कालाउ एला परमेस्वर द्याङगेलाइहेङ न्याम माकोसिङ हेसापा धरमाति बान्हाइखे दोअ्का काथा तिङपाका हि। इङकोकोङ दासि न्याम रो परमेस्वर पाहासो धुइकालाइसो पिका हि। 22एसापा परमेस्वर इसु ख्रिस्टता खान्धुर पाका झाराङहेङ धरमाति बान्हाइखे। हाइदोनु वा हासुहेङ बुङ माखेङखे।#गलाति २:१६ 23हाइपानु झाराङ पाप पाका हि रो परमेस्वरको पारतापसो दुरे जेङका हि। 24कालाउ परमेस्वरको निगाहाको बरसो ख्रिस्ट इसुता जेङका छुटकारासो एम्बालाइ एन्साङ धरमाति ठार्हाइन्हाका हि। 25परमेस्वर केलाइको पापको भाअ्सिङ भोक जेङलि इसु ख्रिस्टहेङ दिङगिल्हि। कालाउ वाता खान्धुर पाका द्याङगेलाइको पाप वाको हितिसो माअ्पापिहि। परमेस्वर ख्रिस्ट लोकाखान्तेङ लाम्फा ताइको चेर थामेतेङ एम्बालाइको पाका पापको भाअ्सिङ दार मापिहि। वा धरमाति हि दोअ्का तिङपालिकोभाअ्सिङ एसा पाहि। 26परमेस्वर ताइमिङ धरमाति हि रो इसु ख्रिस्टता खान्धुर पाकालाइहेङ वा धरमाति ठार्हाइखे दोअ्का काथाको दासि पिलि वा इदोङ पहरता एसा पाहि।
27इदोइभाअ्सिङ केलाइ ताइकोङ धरमातिता हेअ्लाउ तुजुक पालि माद्वाङ। हाइदोनु केलाइ मोसाको न्याम मानितेङ माको, इसुता खान्धुरपातेङ खिनिङ धरमाति जेङलि द्वाङ। 28एन्साङपातेङ मोसाको न्याम मानितेङ माको, कालाउ ख्रिस्टता खान्धुरपातेङ खिनिङ परमेस्वरको आगाता केलाइ धरमाति जेङलि द्वाङ दोअ्तेङ दोअ्लि द्वाङ। 29हाइ परमेस्वर यहुदिगेलाइको खिनिङ परमेस्वर हि रो? हाइ वा बोजात्यागेलाइको परमेस्वर माको रो? जातिङको वा झाराङको परमेस्वर हि। 30हाइदोनु परमेस्वर एलोङदोङ हि। यहुदि ज्याको माकुनु बोजात्या ज्याको, वा झाराङहेङ एम्बालाइको खान्धुरसो दोङ ताइको आगा धरमाति ठार्हाइयावा।#न्याम ६:४; गलाति ३:२० 31परमेस्वरको आगाता खान्धुरसो उचित ठार्हाइनु हाइ परमेस्वरको न्यामचाहिँ काम मालागिका जेङखे कुनु? आहाँ माको! भुरुङ केलाइ वाको न्यामहेङ जातिङको मानिन्हाखे।
© 2025 by Nepal Bible Society and Wycliffe Bible Translators, Inc.