रोमि 12
12
सिन्हुका बलि
1ओदोङ भाअ्सिङ खान्धुराइ ओनेगेलाइ, परमेस्वरको माहान दायाको कारन का नेलाइहेङ आनुरोध पाखा, कि ता-ताइको जिउहेङ पबित्तरो कालाउ परमेस्वरहेङ ग्रहन योग्य जेङलि ताइको जिबनहेङ सिन्हु पाङ भोगको रुपता आर्पन पाअ्सु। नेलाइ पालि गोइका सत्ये आराधाना इदोइ दोङ हि। 2इदोइ सुमिङको द्याङगेलाइ भाइपा माजेङसु, कालाउ परमेस्वर नाङको स्वभाबहेङ परिबर्तन पातेङ नेलाइको बिचारहेङ नावा बानाइलि द्वाङ। कालाउ परमेस्वरको आसल ग्रहन योग्य कालाउ सिद्द इच्छा हाइ हि, इङको नेलाइ गिलि दोसु।
3परमेस्वर कासेहेङ पिका आनुग्रह पाहासो नेलाइ मध्ये झाराङहेङ का आग्राह पाखा, कि ताइमि जिसिका हिनाहि इङको खान्तेङ हेन्जा ताइमिहेङ मासम्झ्याको। कालाउ परमेस्वर झाराङहेङ पिका खाङधुरिको जोखेकाहोइ ताइमि जिसिका हि, इन्सिकाङ थानियाको। 4जेसाङ केलाइ झाराङको एनोङ दोङ जिउता हेन्जा आङगगेलाइ हिखे, कालाउ गोताङ आङगगेलाइको एनोङ दोङ काम मान्थुखे। 5एन्साङ पातेङ, केलाइ ख्रिस्टता खाङधुरि पाकालाइ, केलाइ झाराङ ख्रिस्टको आङगको सदस्यगेलाइ दोङ हिनाहि, कालाउ केलाइ झाराङ एमिसो-भेनेङको हिनाहि। 6केलाइ झाराङहेङ परमेस्वर ताइको आनुग्रह आन्सार भेनेङ-भेनेङ बरदानगेलाइ पिका हि। जाइहेङ आगमबानिको बरदान मिलिका हि, वा परमेस्वरको दोअ्का काथा खाङधुरिसोङ धुइयाको। 7सेवाको बरदान हि पानु, वा आरुको सेवा पाको, सिक्स्याको बरदान हि पानु सिक्स्या प्याको। 8हाउसाइ पिकालाइ हाउसाइ प्याको, दान पिका बरदान हि पानु उद्दार मनसो दान प्याको, आगुवाइ पाकालाइ रेम्फासो आगुवाइ पाको, कालाउ दायाकालाइ खुसिसो दाया पाको।
प्रेमको बारेता
9नेलाइको प्रेम तिङपाका खिनिङ माको भरु जातिङको ह्याको। जेदोङ काथा खाराब हि इङकोहेङ बाथालाइगिल, कालाउ जेदोङ काथा एल्का हि इङको काम लागातार पातेङ हि। 10ताइको जाहान भाइपाङ एमिसो-भेनेङहेङ मायारु पासु। कालाउ नाअ् ताइमिहेङ खान्तेङ हेन्जा बो गेलाइहेङ आदार पाअ्। 11थाङका परिस्रोम पासु कालाउ लेद्रा माजेङसु, कालाउ नाङको गोताङ ह्रदयहोइ प्रभुको सेवा पाअ्। 12नेलाइको निङका आसता आनान्द पासु, कस्टगेलाइता धर्य पासु कालाउ लागातार प्रार्थाना पातेङ हिसु। 13परमेस्वरको जनगेलाइहेङ खाचोता साघाइसु, कालाउ साअ्ता लोका बान्सालाइहेङ रेम्फा चापासु-आम्पासु।
14कालाउ नेलाइहेङ साताइकालाइहेङ स्राप माको, भरु आसिरबाद पि। 15आनान्द पाकालाइ दोफा आनान्द पासु कालाउ खारकालाइ दोफा खारसु। 16झाराङ दोफा सान्तिसो मिलितेङ हिसु, कालाउ आभिमानि माजेङसु, कालाउ मोनोइहोइ द्याङगेलाइ दोफा सङगत पाअ्सु, कालाउ ताइमिङ हेन्जा गिका माथेनेसु।
17हासु बुङ नासेहेङ मारेम्का पाहि पानु वासेहेङ मारेम्का मापा। जेदोङ काथा झाराङ द्याङगेलाइको नजरता रेम्का हि इङकोङ काथागेलाइहेङ पालि कोसिस पासु। 18जेङलि दोनु, झाराङ दोफा मिलितेङ हिसु। 19ओइ काङको आनाउगेलाइ, ताइमि दोङ हेलाउ बुङ बदला माह्रुसु, भरु परमेस्वर दोङ वासेहेङ साजाइ प्याको। हाइपालिपानु धर्मसास्तरता लेखेका हि,
“बदला ह्रुका काम काङको दोङ हि,
का दोङ बदला ह्रुकाङका” प्रभु दोअ्खे।
20कालाउ नेलाइ धर्मसास्तरता लेखेका कोनिङ पासु, “भरु नाङको सतरु जेसापा म्हितुका हि पानु वासेहेङ चापा,
जेसापा चि आम्लि किका हि पानु वासेहेङ चि आम्लि पि।
एन्सा पाहे पानु नाअ् इङको द्याङगेलाइहेङ लेदर पालि द्वाना।”
21खाराबिसो माहारे, भरु खाराबिहेङ भलाइसो जितिसु।
Currently Selected:
रोमि 12: DHINT
Tya elembo
Copy
Kokisana
Kabola
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Dhimal New Testament, by The Love Fellowship is licensed under Creative Commons Attribution-ShareAlike 4.0 License.