1 कोरिन्थि 13
13
प्रेम
1जेसापा का द्याङगेलाइ कालाउ स्वर्गदुतगेलाइको भासाता धुइलाउ बुङ कालाउ का आरुहेङ प्रेम माखापा पानु, काङको दोअ्का काथा आर्था हिन घन्टि कालाउ झ्याइ-झ्याइ पाका झ्यालि खिनिङ जेनाङ। 2का दोफा परमेस्वर पाहासो आगमबानि धुइका बरदान हि, कालाउ गोताङ म्होन्हाका काथा कालाउ ग्यानगेलाइ बुझिखा, कालाउ रागेलाइ तुगिल्लिका गोताङ खाङधुरि काङको दोफा हि, कालाउ का आरुहेङ प्रेम मापाखा पानु काङको हिदोइ बुङ मुल्य मान्थु। 3जेसापा का ताइको गोताङ धन-सम्पति गरिब द्याङगेलाइहेङ बाखाराइपिघा, कालाउ काङको जिउ बुङ ओपालि प्याङका, कालाउ का आरुहेङ प्रेम मापाघा पानु कासेहेङ हाइ दोङ फाइदा मान्थु।
4आरुहेङ प्रेम पाका द्याङ सहनसिल कालाउ दायालु हिखे, इम्बालाइ डाहा कालाउ घमन्ड मापाखे। 5इम्बालाइ आरुको आनादार मापाखे कालाउ इम्बालाइ भलाइ माचाहिखे। इम्बालाइ धेमाङ चेर माताम्पाखे कालाउ इम्बालाइको बिरोधता पाका मारेम्का काम फोम मापाखे। 6हिदोइ बुङ द्याङगेलाइ हासुहेङ बुङ मारेम्का पातेङ खुसि माजेङखे, कालाउ इम्बालाइ सहि कालाउ सत्ये काथाता लेङचाखे। 7इम्बालाइ हेलाउ बुङ माहारिखे कालाउ हेलाउ बुङ खाङधुरि पालि मालाअ्खे, गोताङ काथाता आस ताअ्खे, कालाउ दुख कालाउ कस्टता बुङ धर्य हिखे।
8आगमबानि कालाउ परिपरिको भासागेलाइ धुइका बरदान कालाउ ग्यान माअ्तेङ हानावा। कालाउ प्रेम जेलाउलाउको भाअ्सिङ हितेङ ह्यावा। 9-10केलाइको ग्यान बरदान कालाउ आगमबानि पाका स्यामाता आपुरा हि, कालाउ जेलाउ पुर्नता कालाउ सिद्दता लावा कालाउ जेदोङ आपुर्नता जेङखे इङको को आवस्यक माजेङखे।
11या एमि द्याङ बाराका भाइका हि, जेलाउ का जामाल हिघाखा का जामाल कोनिङ धुइघाखा, कालाउ जामाल कोनिङ बिचार पाघाखा। कालाउ जेलाउ का धाना जेङघा, कालाउ का इङको जामाल कोनिङ चाल लापिघा। 12केलाइ खाङधुरि पाकालाइ दोफा बुङ इन्सिकाङ जेनाङ, हाइपालिपानु केलाइ नाका आइनाता ताइको ह्राइ खाङका द्याङ भाइपा हिनाहि, हाइपालिपानु केलाइ आझाइ गोताङ काथा रेम्फासो मागिनाखे। भबिस्यता खिनिङ गोताङ काथा ग्याङ, हाइपालिपानु केलाइ परमेस्वरहेङ आगा-आगाताङ भेतियाङ। एला काङको ग्यान पुरा मान्थु भबिस्यता खिनिङ का पुर्न रुपता वासेहेङ नालाङका, जेसाङ परमेस्वर कासेहेङ नालावा।
13ओदोङ भाअ्सिङ एला इदोइ सुम्लोङ काथागेलाइ चाहि केलाइ जेलाउ बुङ पालि गोइखे: परमेस्वरता खाङधुरि पाका, परमेस्वरको बाचागेलाइता आस ताअ्का कालाउ झाराङहेङ प्रेम पाका। कालाउ इङको सुम्लोङ मध्ये एनोङ झाराङ खान्तेङ बार्का काथा चाहि झाराङहेङ प्रेम पालि दोङ हि।
Currently Selected:
1 कोरिन्थि 13: DHINT
Tya elembo
Copy
Kokisana
Kabola
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Dhimal New Testament, by The Love Fellowship is licensed under Creative Commons Attribution-ShareAlike 4.0 License.