प्रेरित 1
1
परमेश्वरै पवित्र आत्मा बीर्न्हकाले डेम प्रतिज्ञा जाट्च
1प्यारो थियोफिलस, येशूये काम जाट्की र पाहाक्की सुरु जाट्च पट्ट न कुराकुङ बारेयाङ ङै पहिला रीक्च किताबाङ#१:१ पहिला रीक्च किताबाङ डेच चै लूकै रीक्च सेछ समाचार हो। लूका १:१-४ ले। 2लहे भाक्च प्रेरितकोलाक येशूये पवित्र आत्मा लकीङ आज्ञा याम्ह भ्यारखीङ होसको स्वर्गाङ गाराङ्ङ आल्छ दिनसम्म पट्ट न कुरा होसे किताबाङ रीक्ङने। 3लहो दु:ख भोग्डीम भ्यारखीङ वास्टै सत्य प्रमाणको लकीङ येशूये लाहाकी जिउँदै ले डेम टान्हाका। चालीस दिनसम्म होसको घरी-घरी होखुरीकुङ म्याहासाङ डाङा र परमेश्वरौ राज्यौ बारेयाङ होखुरीककी सेटाका।
4येशू होखुरीकखाटा ज्याकी ङुनाङ होसकै होखुरीककी याङ्च आज्ञा याहा, “नाखुरीक यरूशलेमीङ कुलाक र मानुङ्नी तर बोये पवित्र आत्मा बीर्न्हकाले डेयार जाट्च प्रतिज्ञाकी लेन्नी। इसे बारेयाङ ङै पहिला न डेम भ्यामने। 5यूहन्नै च डीये बप्तिस्मा याहा तर अब कालाप दिनाङ पवित्र आत्माङ नाखुरीकुङ बप्तिस्मा छान्ने।”
येशू स्वर्गाङ नुङ्च
6जब प्रेरितको भेला छाना तब होखुरीकै येशूकी गीना, “ए प्रभु, ही नाकै इसे समयाङ न रोमीकुङ शासनीङ इस्राएल राज्यकी मुक्त जाटार फेरि खास्न याल्हे र?” 7तब येशूये होखुरीककी डेया, “बोये मेखोल्हौ अधिकार लकीङ तोक्डीच समयकी वार्छ नाखुरीकुङ काम होइन। 8तर पवित्र आत्मा नाखुरीक लेठाङ राह्रखीङ नाखुरीकै शक्ति डुप्ले। होटै नाखुरीक यरूशलेमाङ, पट्ट यहूदियाङ, सामरीयाङ र पृथ्वीयुङ अन्तिम छेउसम्म ङौ साक्षी छान्ने।”
9येशूये इसे कुरा डेम भ्यारखीङ होखुरीकै ङोस्नाङ-ङोस्नाङ न होसकोकी ढेम्लाक गाराङ्ङ आल्हार डेबुवाङ होसको होखुरीकुङ मीमीकीङ म्हाटा।
10प्रेरितकै होसको नुङ्चै जाट्च सर्घा पट्टी ङोस्न ङुमन्या, होडीक न बेला मोसोमायाङ बोच बढीन बील्छ नीस जना भर्मी होखुरीक छीनी टोङ्हा। 11होखुरीकै डेया, “ए गालीलुङ भर्मीको, नाखुरीक हीजै सर्घालाक ङोस्चै टोङ्ह ङुच? कुटजाट्न चाहाँ येशू नाखुरीकुङ मीघीङ स्वर्गाङ गाराङ्ङ आल्छ डाङा, होटजाट्न न होसको फेरि राल्हे।”
यहूदासौ ठावाङ अर्को चेला चुन्डीच
12होटै प्रेरितको जैतून डाँडा डासार यरूशलेमाङ ल्हेसा। यरूशलेम लकीङ इसे डाँडा ओलमाओल काट किलोमिटर टडीक लोस पर्ले। 13अनि होखुरीक यरूशलेम टाह्रखीङ लाहा ङुचै जाट्च इमौ ढेम्च तलौ कोठाङ पर्या। होखुरीक पत्रुस, यूहन्ना, याकूब, अन्द्रियास, फिलिप र थोमा, बारथोलोमाइ र मत्ती, अल्फयासौ मीजा याकूब र देशभक्त दलुङ सिमोन र याकूबौ मीजा यहूदा लेया। 14कुडीक जना मास्टो भर्मीको र येशूओ मोइ मरियम र होसकुङ भाइकोखाटा इखुरीक पट्ट न काट मीमनौ छानार सधैँ प्रार्थना जाट्नन्या।
15होस बेला विश्वास जाट्चकुङ मीघ्याङ पत्रुस टोङ्हा (होला भर्मीकुङ संख्या ओलमाओल काट सय बीस जना लेया) र डेया, 16“ए भाइको, धर्मशास्त्रओ वचन ओल्खी पर्च लेया। कुसे वचन येशूकी घोचकुङ अगुवा यहूदासौ बारेयाङ दाऊदौ मेङ्गेरीङ अगाडि लकीङ न पवित्र आत्मै ङाक्ङन्या। 17यहूदास र कानखाटा न हील्नन्या र इसे सेवाङ होचे र भाग डुप्मन्या।”
18होसे भर्मीये येशूकी धोका याहार कमडीच पैसै काट बारी लोवा। अनि होसे होला न टुरुङ्क्याक छानार कुरुह्वार सीया। होच्यो मीटुक भाटार पट्ट न मेखे ख्योहा। 19इसे कुरा यरूशलेमुङ भर्मीकोलाक पट्टकी थाहा छाना। होटै होसे बारीयो म्यार्मीन होखुरीकै लहो भाषाङ “आखेल्दामा” डा, होच्यो अर्थ हो ह्युओ बारी।
20अनि पत्रुसै डेया, “हीजैडेनाङ भजनसंग्रहौ किताबाङ याङ्च रीक्ने,
‘होच्यो इम उजाडीस्ख्यो,
होला बास ङुच सुर माछान्ख्यो।’#भजनसंग्रह ६९:२५
“होला याङ्च र रीक्ने,
‘र होचे जाट्च कामौ जिम्मा अरुकै न लाख्यो।’#भजनसंग्रह १०९:८
21-22“होटबाटै कानखाटा लेच भर्मीको मध्याङ कानै याङ्च काट जनाकी चुन्डीकी पर्ले। होसे भर्मी प्रभु येशू कानुङ मीघ्याङ ह्वानाङ ङुनाङ सधैँ कानखाटा लेया, र होसे भर्मी यूहन्नै बप्तिस्मा याछ समय लकीङ लार येशू कानुङ मीघीङ स्वर्गाङ गाराङ्ङ आल्छ दिनसम्म कानखाटा लेया, होसे भर्मी न होसकुङ साक्षी छान्की पर्ले।”
23होटबाटै होखुरीकै नीस जनाकी भर्मीकुङ म्याहासाङ राका। काट जना चहिँ बारसाबास डेच योसेफ लेया, होसकी युस्तस डेमन्या र अर्को चहिँ मतियास लेया। 24अनि होखुरीकै इट डेयार प्रार्थना जाटा, “पट्ट भर्मीकुङ मीमनुङ कुरा वार्छ प्रभु, इसे नीस जना मध्याङ प्रेरित छानार सेवा जाट्की नाकै सुकी चुन्डीमे होसे कुरा कानकी टान्हाक्ङ यान्ही, 25र होसे चहिँ यहूदासौ ठावाङ राखी ह्योख्यो, कुसे सेवा लकीङ यहूदास भड्कडीसार नुङा र मेन न ठावाङ सीया।” 26होटै होखुरीकै होसे नीस जनौ म्यार्मीनाङ िचठ्ठा का। होसे िचठ्ठा मतियासौ म्यार्मीनाङ पर्या र एघार जना प्रेरितकोखाटा होसकी हीला।
© 2025 by Mother Tongue Translators Society and Wycliffe Bible Translators, Inc.