22 أيث-كورينث 5
5
أَمْشَان نّغ ذݣ وجنَّا
1شُوْف، نشِّين نسّن مڒَا يرز وقِيضُوْن-أَ يعْنِي دَّات نّغ ن دُّنشْت-أَ، أَتَاف غَارْنغ يجّن ن ثْزدِّيغْث نّغْنِي زِي أَربِّـي. ثَدَّارْث نِّي وَار يبْنِين شَا س يفَاسّن تْدُوْمَا إِ ڒبْدَا. 2ڒخُّو نشِّين نْنهّك ذَايْنغ مزْڒِي أَ نغْمس س دَّات نّغ ن وجنَّا. 3خْمِي غَا نغْمس زَّايس، أَتَاف وَار ذَانغ تِيفن شَا ذ يعَرْيَانن. 4لِأَنَّا خْمِي نتْغمَّاس س دَّات-أَ نّغ، تْبسَّاڒ خَانغ نشِّين عَاذ نْنهّك. إِيوَا وَار نْرزُّو شَا أَ نِيڒِي بْڒَا اَرُّوْض، نْرزُّو أَ نغْمس س دَّات نّغ ن وجنَّا، مَايمِّي؟ بَاش مِين يفنَّان اَث يسغْڒي مِين وَار يتْمتِّين. 5وِي ذَانغ يسْوجْذن إِ مَانَاينِّي؟ نتَّا ذ أَربِّـي، يُوْشَا-ٱنغ-د أَرُّوْح نّس ذ يجّن ن تّسْبِق.
6إِذن عمَّارص أَ نفْشڒ نشِّين. نسّن مڒَا عَاذ اَقَانغ ذِي دَّات-أَ ن دُّنشْت-أَ نْتَاݣّْوَاج زِي سِيذِيثْنغ. 7أَقَا نتْعِيش س لْإِيمَان مَاشِي س مِين نتْوَاڒَا. 8وَار نْتفْشِيڒ شَا، لَّا! مَعْلِيش نشِّين مڒَا نْتَاݣّْوَاج زِي دَّات-أَ ن دُّنشْت-أَ اَتَاف نشِّين نتْعِيش اَك سِيذِيثْنغ. 9خ مَانَاينِّي مِيخف نْرزُّو؟ نْرزُّو اَخَاس نَارْضَا وَاخَّا نْزدّغ ذِي دَّات-أَ ن دُّنشْت-أَ نِغ نْتَاݣّْوَاج زَّايس. 10لِأَنَّا لَابُد أَ نْبدّ مَارَّا إِذْنغ زَّاث إِ لْعَرْش ن لْمَسِيح مَانِي إِي غَا نتْوَاحْكم. كُڒ يجّن اَث يجَازَا خ مِين يسْذَاهدْج عْلَاحْسَاب ثِمسْڒَايِين نِّي إِݣ يݣَّا وَامِي يزْذغ ذِي دَّات، ذ ثِصبْحَانِين نِغ ذ ثِعفَّانِين. 11فَلِهَاذَا وَامِي نسّن أَ نݣّْوذ زِي سِيذِيثْنغ، نْرزُّو يوْذَان اَذ قْتَنْعن.
ڒْعَهذ ن صُّلْح
ئِي مِين نعْنَا نشِّين يسّن-يث أَربِّـي مْلِيح، أُو تْمنِّيغ عَاوذ ضَّمِير نْوم اَذ يسّن مَانَاينِّي. 12مَا نبْذَا أَ نْشكَّر يخف نّغ عَاوذ زَعْمَا؟ لَّا، نْتِيشّ-اَوم مِينْزِي خَانغ غَا تفْتَخَرم. مَايمِّي؟ يعْنِي حمَا اَغَارْوم يِيڒِي مِينْزِي غَا ثَارّم خ يِنِّي يتفْتَخَرن خ مِين د يتْبَانن غَار بَارَّا مَاشِي مِين يدْجَان غَار ذَاخڒ ذݣ وُوْڒ.
13شُوْف، مڒَا يرُوْح-اَنغ ڒَعْقڒ زَعْمَا، مَانَايَا جَارَانغ ذ أَربِّـي. مڒَا غَارْنغ ڒَعْقڒ، أَتَاف مَانَايَا مْلِيح إِ كنِّيو. 14لِأَنَّا ڒمْحِبّث ن لْمَسِيح تْسَيْطَر خَانغ وَامِي نسّن يجّن يمُّوْث عْلَاحْسَاب مَارَّا يوْذَان. فَلِهَاذَا ڒْموْث نّس ذ ڒْموْث ن مَارَّا يوْذَان. 15يمُّوْث نتَّا عْلَاحْسَاب مَارَّا يوْذَان بَاش يِنِّي يدَّرن وَار تدَّرن شَا إِ يِيخف نْسن وَاهَا، أَذ دَّرن إِ ونِّي خَاسن يمُّوْثن ثُمَّا يتْوَاسكَّر-د زِي ڒْموْث.
16خ مَانَاينِّي، زِي سَّا اَڒ ثْسَاونْت نشِّين وَار نْخزَّر شَا ذِي حَدّ عْلَاحْسَاب ڒَعْقڒ ن دُّنشْت-أَ. وَاخَّا نْخزَّر قْبڒ ذِي لْمَسِيح عْلَاحْسَاب ڒَعْقڒ ن دُّنشْت-أَ، ڒخُّو وَار ث نتْوِيڒِي شَا اَمنِّي. 17س مَانَايَا، ونِّي يدْجَان ذِي لْمَسِيح اَقَا يتْوَاخْڒق-د ذ جْذِيذ؛ مِين يدْجَان ذ اَقْذِيم يعْذُو يُوْسَا-د مِين يدْجَان ذ جْذِيذ. 18مَانَايَا مَارَّا زِي أَربِّـي، يسمْصْڒَاح-اَنغ اَكِذس س لْمَسِيح يُوْشَا-ٱنغ-د أَ نْبشَّر س ڒْعَهذ ن صُّلْح. 19يعْنِي أَربِّـي يݣَّا ذِي لْمَسِيح بَاش اَذ يسمْصْڒَاح يوْذَان اَكِذس، وَار خَاسن يحسّب شَا ڒْمُعْصِيَاث نْسن. عَاوذ أَربِّـي يكلّف خَانغ اَوَاڒ-أَ وَانِيتَا ن صُّلْح. 20فَلِهَاذَا نشِّين ذ لْمُبْشِرِين ن لْمَسِيح، أَربِّـي يسّكّ طَّلَاب نّس خ وفُوْس نّغ. نْطَلَاب-يكنِّيو عْلَاحْسَاب لْمَسِيح اَذ تمْصْڒَاحم اَك أَربِّـي. 21تُوْغَا وَانِيتَا وَار غَارس بُو ڒْمُعْصِيّث يَارِّي-ث أَربِّـي ذ ڒْعِيذ نّغ حمَا اَذَانغ يَارّ نِيشَان اَك أَربِّـي.
Currently Selected:
22 أيث-كورينث 5: ريف
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo