ROMA 3
3
Yahudi owe asan akot atakam
1Me Yahudi owe ere, asan akotnak, wanam Yahudi apok owe asan potanak— emes ape? Era Yahudi owe pak tai tamane pitini basakamosom akot ape? 2Yahudi owe, ere asan akotnak. Me wan asan akot pak, ere Allah, aatakam Yahudi owe ataetiitamen. 3Me wan Yahudi owe ere, era atakam, ji bae apok. Erarawa, Allaham ataaji aee atakam jipu baem apokane? Tare emes bimak binip atetaramemakam apaye? 4Emes apok. Allah atakamnak Ipit. Asamot owe takes, ere pote owe. Alkitabam:
“Wore atakam akoretem, owe takes, wore atakamnak aportemanis. Owe, wore dosa apaye, atakam asakamtiitas, are takes, wore dosa apok aportemanis.”
Alkitab emes atakam are.
5Wan oweam, “Dare jaos pak aemtam, owe, Allah aturu pak baso aportemas.” Emes atakam aesimemas. Dare emes atep wama tamen jittam? “Allah dara ajurusumtaro, Are jaos.” Dare emes atakam ape? (Emes atakam ere, asamot owe era akoremas atakam tamen are.) 6Emes bas! Allah emes aemto, Are, asamot owe dosa, atakam basakamtii wama tamenem? 7Era oweam, “Dere asan pota pak aemtey, owe, Allah atakamnak, basonak aportemas. Oweam, Allah akotipitnak pak aportemas.” Emes atakam aesimemas. Me, emes atakam, atakamnak apaye, Allah, dadosa, atakam basakamtii wama tamenem? 8Emesare, era oweam, “Dare, era pota pak aemamo. Era pota pak ere akot pak aemamestem emes atakam aesimemas. Oweam, Paulusam emes atakam akorem.” Emes atakam aesimes. Era owe ere, dere pota atakam akoromenis. Allah era owe ajurusumto, Are adosa jipu ajurusumtem.
Turu owe, ere apoknak atakam
9Wama tamenem? Allah, dare Yahudi owe, akot aporem, wanam Yahudi apok owe, pota aporem, emes apaye? Emes apok! Yahudi oweam, Yahudi apok oweam, dosa owe takes. Denom emes atakam emekoretamey. 10Emesare, Alkitabam:
“Turu owe, ere apoknak.
11Amsamnak oweam apok. Allah bandimarpor oweam apok.
12Owe takes Allah beak sos asotames. Are pota takes. Akot pak baem owe, ere apoknak.
13Aokone, ere, bakapim apok dambir asan awar. (Are pota atakam akoremas.) Are pote atakam akoremas. Are jokoman atakam akoremas. Emesare, are jokoman amber tamen are.
14Are tame atakam daytinak akoremas.
15Are owe batatii jak aseseromemas.
16Era samaniin samaniin aesosemas, are owe ajursumemas.
17Are owe bajamfaimam amsam apok.
18Are Allah ombare amsam apok.”
Alkitab emes atakam akorem. 19Me Musa Basakamtam Atakam takes, era Musa Basakamtam Atakam bajamkai owe aapak. Danom emes damsam. Era Musa Basakamtam Atakam, owe adosa bapatim bakariem pak. Anom, Allah asamot owe adosa takes atakam asakamtiitem, emes aporomtamum. 20Allah era Basakamtam Atakam ji bae owe, turunak owe atakam basakamtii apok. Owe ere, era Basakamtam Atakam jane ajitas, are ajak bomon dosa aportemas.
Allah, asamot owe akipimtaere atakam
21Waa ere, Allah, era turunak owe atakam asakamtiimar, emeporome. Era asakamtame atakam ji bae pak apok. Me Musa aeapome Basakamtam Atakam bukuam, Allah atakam bakoretam owe aeapomes bukuam, emes atakam are. 22Allah ere, Yesus Kristus eemnak bamesemkorom owe takes, turunak owe atakam asakamtiim. Owe takes ere awar. 23Owe takes dosa aemes. Allaham, “Era owe akot,” emes atakam baemekore asan apok. 24Allah ere, owe bafaim Ipit. Are Kristus Yesus era owe dosa asurumtame pak apore. Erarawa Are era owe, turunak owe, emes atakam asakamtiie. Era oweam, Allah abafaim pak, biti baemejie asan apok. Ere bambi pak erare. 25Allah, Yesus, dosa bimak binip bajanimemtam Ipit ataeme. Yesus, aesee atetame, ere Ara bamesem owe adosa bimak binip bajanimemtam esee. Allaham, “Dere turu,” emes baporomtam aememe. Erarawa Are era pak aeme. Bonak ere, Are jak jirao aememaarir. Are, era owe, dosa apok tamen aememaarir. 26Me, waaam Are, “Dere turunak,” emes aporomtamum. Ararawa, waa, owe adosa aporkoromum. Emesare, Are turunak, emes aporomem. Anom Yesus eemnak ambesemkorommas owe, turunak owe atakam asakamtiim, emes aporomem. 27Erarawa, dare damba wama tamen emetemtemtam? Dare damba baemetemtem asan apok. Dare Musa Basakamtam Atakam ji aeom, wanam Allah dare turunak owe atakam asakamtiiero apaye? Emes apok. Dare ere, Yesus eemnak ambesemkoromom, wanam Allah, dare turunak, emes atakam asakamtiiero. 28Allah, Yesus ambesemmas owe, turunak owe atakam asakamtiim. Are era Basakamtam Atakam ji bae owe, turunak owe atakam basakamtii apok. Dare emes apormarom. 29Allah Yahudi owe taka aAllah ape? Are Yahudi apok oweam aAllah ape? Anom aAllah. 30Me Allah owe takes awar aemtamum. Emesare, era Yahudi owe pak tai tamane pitini basakamosom owe, Yesus eemnak ambesemkoromtas, Allah era owe, turunak owe, emes atakam asakamtiim. Me tamane pitini basakamosom apok oweam, Yesus eemnak ambesemkoromtas, Allah era owe, turunak owe, emes atakam asakamtiim. 31Dare Yesus ambesemmarom, ere dare era Basakamtam Atakam ajiiosomemarom apaye? Dare emes apoknak. Dare era Basakamtam Atakam, Basakamtam Atakam anakot, emes atakam akoremarom.
Oyo Eponami Sikoyo:
ROMA 3: LAIASC
Tya elembo
Kopya
Kokisana
Kabola
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo