Isaías 2
2
Jerusalénman Diosta adoraq aywapäkunanpaq nishqan
Miqueas 4.1-3
1Kaychömi qelqaraykan Amóspa tsurin Isaíasta Tayta Dios revelashqan. Tsay revelacionchömi rikatsirqan shamuq watakuna Judá nacionta y Jerusalén markata ima pasananpaq kashqantapis.
2Shamuq watakunachömi Tayta Diospa wayin kaykashqan jirkanqa wakin jirkankunapita mas respitashqa kanqapaq.
Tsaymanmi maytsay nacionpitapis runakuna aywapäkunqa Tayta Diosta adorapäkunanpaq.
3Tsaynölami Sión jirkanpita Tayta Diospa yachatsikuyninta maytsaymanpis apapäkunqapaq.
Jerusalénpita patsami palabranta wilakärinqapaq.
Maytsay nacionpitami runakuna Jerusalénman aywaykur kayno nipäkunqapaq:
<<Lapanintsi witsäshun Tayta Dios akrashqan jirkanman.
Jacobpita miraq runakuna yärakushqan Tayta Diospa templunman yaykushun.
Tsaychömi kikin yachatsimäshun mandamientunkunata imano cumplinantsipaq kashqantapis.
Tsaynöpami pay munashqanno lapantsi kawashunpaq>>.#Isa. 56.6-7; Zac. 8.20-22.
4Atska nación runakuna chikinakäriptinpis Tayta Diosmi arreglanqapaq.
Tsay nacionkuna jatun kaptinpis paymi juzganqapaq.
Juk markawan juk marka guërrata manami ruranqanatsu.
Guërracho pelyananpaqpis manami kamarikunqanatsu.
Maytsaychöpis runakuna espädanpita rëjantanami ruratsipäkunqa.
Lanzanpitanami ösita ruratsipäkunqa.#Ose. 2.18.
5Jacobpita miraq runakuna, shapäkamuy.
Tayta Dios nimashqantsita cäsukur kawashun.
Mana cäsukuqkunata castigananpaq nishqan
6Tayta Dios, kuyashqayki runakunami inti jeqamunan läducho taq runakunano rikakuq kayta yachakärishqa.
Tsaynöpis filisteo runakunanömi brüju kayta yachakärishqa.
Jäpa runakunawan amistäta rurarmi paykunano lutanta rurar kawarkaykan.
Tsayno kaptinmi Jacobpita miraq kuyashqayki runakunata kacharishqanki.
7Judá nacioncho runakunapa qorin, qellaynin y imayka riquëzankunapis atskami kaykan.
Cawallunkunapis y guërra carrëtankunapis yupayta mana atipaypaqmi kaykan.#2.7 Mandaq rey atska cawalluta mana shuntananpaqmi niykan Deut. 17.16. Judá nacioncho tsay witsan runakuna Diosman yärakunanpa trukan yarparqan atska qorinpis, qellayninpis, cawallunkunapis y guërra carrëtankunapis kaptin tsaykunawan imapitapis salvakunanpaq kashqantami.
8Tsaynöpis maytsaychömi ïdulunkunata rurapäkushqa.
Kikinkuna rurashqan ïdulutami qonqurpaykur adorarkaykan.
9Tsayno rurarmi penqaytukushqa uysurpaykan.
Paykunata ama perdonaytsu, Tayta.
10¡Qaqa uchkukunaman y alpa rurinman pakakäriy!
¡Mantsakuypaq, chipchipyaykaq y munayniyuq Tayta Diospita pakakäriy!#Apoc. 6.15.
11Runa tukuqkunatapis penqaymanmi churanqa.
Yachaq tukuqkunatapis ruwakatsinqami.
Tsay junaqqa Tayta Dioslatami pïmaypis alabanqa.
12Lapanta mandaq Tayta Dios castiganan junaqmi orgullösukunata, mana cäsukuqkunata y runa tukuqkunatapis qonqurpakatsinqa.
13Líbanucho jatunkaray cedru yörakunatapis y Basáncho encina yörakunatapis Tayta Dios ushakätsinqami.
14Altu jirkakunatapis jatun puytukshukunatapis ushakätsinqami.#2.13-14 Kay versïculukunacho runa tukuqkunata tinkutsin cedru yörakunaman, encina yörakunaman, altu jirkakunaman y jatun puytukshukunamanpis.
15Pakakunanpaq ruratsishqan jatun törrikunatapis ushakätsinqami.
Marka tsaparaq murällakunatapis ushakätsinqami.
16Tarsispita shamuq kuyaylapaq büquikunatapis ushakätsinqami.
17Tsaynöpami runa tukuqkunata penqakuyman churanqapaq.
Yachaq tukuqkunatapis ruwakatsinqami.
Tsay junaqqa Tayta Dioslatami pïmaypis alabanqa.
18Tsay witsanqa runakuna adorashqan lapan ïdulukunatapis elqätsinqami.
19Mantsakuypaq, chipchipyaykaq y munayniyuq Tayta Diosmi runakunata castigananpaq kay patsaman shamunqa.
Tsayta rikarmi pasaypa mantsakushpan machaykunaman y patsapa shiminkunaman pakakärinqa.
20Tsay junaqqa qoripita y qellaypita rurashqan ïdulunkunata manana adorarmi ukushkuna y chikchikuna tänan uchkukunaman jitaykärinqa.
21Nirkurmi pasaypa mantsakur qaqakunaman y machaykunamanpis pakakärinqa.
Tsayno pakakärinqa chipchipyaykar munayniyuq Tayta Dios castigananpaq shamuqta rikarmi.
22Runakunamanqa amana yärakäriytsu.
Runakunaqa jämayno ushakaqlami kaykan.
© 2003, Wycliffe Bible Translators, Inc. All rights reserved.