Ester 6
6
Amán yarpashqankuna mana kamakashqan
1Tsay tsakay rey Asuero punuyta mana tarirmi yanapaqninkunata nirqan mandashqan nacioncho ima pasashqantapis qelqarashqan libruta apaykamur liyipänanpaq. 2Tsaychömi qelqararqan palaciu punku täpaq Bigtán y Teres rey Asueruta wanutsinanpaq wilanakushqan. Tsaynöpis qelqaraykarqan tsay wilanakushqanta Mardoqueo wilakushqan. 3Tsayno nishqanta mayarmi rey Asuero liyipaqninkunata kayno tapurqan: <<Mana wanutsimänanpaq tsayno wilamashqanpita ¿ima recompensatataq Mardoqueo chaskishqa?>>
Tsaymi yanapaqninkuna kayno nirqan: <<Manami imatapis chaskishqatsu, tayta>>.
4Tsayno parlaykashqan hörami palaciu patiuman Amán chayarqan. Tsay patiu nawpanpami reypa cuartunkuna karqan. Tsaymanmi Amán aywarqan Mardoqueuta jukla wanurkatsir jawitsishqan qeruman ayanta tuyritsinanpaq órden jorquq.
Tsawraqa rey Asuero yanapaqninkunata kayno nirqan: <<¿Pitaq patiucho puriykan?>>
5<<Amánmi tsaycho puriykan, tayta>> nipäkurqan.
Tsaymi kayno nirqan: <<Nipäkuy kayman yaykamunanpaq>>.
6Tsawraqa Amán yaykuriptinmi rey Asuero kayno tapurqan: <<¿Imatataq rurashun aliman churayta munashqä runata?>>
Tsayno niptin Amán yarpachakurqan kayno nir: <<Noqata aliman mana churamarqa ¿pitataq aliman churanqa?>>
7Tsayno yarparmi kayno nirqan: <<Tsay runapaqqa 8apapäkamutsun juk tünicaykita y muntakushqayki cawalluta. Cawallupa umanman corönata jatipätsun. 9Nirkur aliman churashqayki runataqa mandashqaykicho mas respitashqa kaq runa tünicaykita jatipätsun. Jatiparkurna tsay cawalluman muntarkatsir pläzapa puritsitsun kayno nir: <¡Kaynömi puritsipäkü rey aliman churashqan runata!> >>
10Tsawraqa rey Asuero kayno nirqan Amánta: <<Nishqaykino palaciu punkucho jamaraykaq Mardoqueuta tünicäta jatiparkur y cawallüman muntarkatsir puritsimuy. Nishqaykino mana qonqaypa lapanta jukla ruray>>.
11Tsayno niptinmi aywaykur reypa tünicanta Mardoqueuta jatiparqan. Nirkurnami cawalluman muntarkatsir pläzapa kayno nir Amán puritsirqan: <<¡Kaynömi puritsipäkü rey aliman churashqan runata!>>
12Tsayno purirkatsiptinmi Mardoqueo kutirqan palaciu punkuman. Amánnami pasaypa penqakur jinan höra wayinpa lakishqa aywakurqan. 13Wayinchönami warminta y amïgunkunatapis lapan pasashqankunata wilaparqan. Wilapaptinmi kayno nipäkurqan: <<Israel runa kaptinmi Mardoqueutaqa wanutsiyta mana kamäpakunkitsu. Payta wanutsiyta munaptikiqa kikikitami tikrapäshushpayki wanutsishunkipaq>>.
14Parlayta manaraq ushaptinmi rey Asuerupa ashmayninkuna chayarqan Ester ruratsishqan mikuyta mikuq aywananpaq Amánta qayaq.
© 2003, Wycliffe Bible Translators, Inc. All rights reserved.