2 Samụẹlị 1
1
Devidi, Sọlụ Fịị Naam
1Sọlụ fịị mẹ ḅọrọ tẹ Devidi Amalẹkị ḅẹ apụ ma ḅaa mẹ ḅụ pịkịma-ḅo tẹso, Devidi maa aḍin kẹ Zikilagị ḅụ simem. 2Tẹrẹị karama ene mẹ ḅụ, gbọrụ owiḅọ nwẹnị Sọlụ ọmụ-ogbo ḅio sime tẹ ḅo, ọ̀ kaan tẹ kapa na ori na; tẹ ọ̀ sịḅị mẹmgba lịka-lịka-lịka. Ò ḅo Devidi la tẹso, ọ̀ nwẹnị ḅịkị kiri-ḅio koro, tẹ kụn kẹ ọ̀ pịrị. 3Devidi nwẹnị ọ̀ ḅẹẹ, “Ị́ tọ-anga ḅụ sime tẹ ḅo?”
Ọ̀ nwẹnị ọ̀ pakịrị, “Izirẹlị ḅẹ ọmụ-ogbo ḅụ à mangị paka-ḅom.”
4Devidi nwẹnị ọ̀ ḅẹẹ, “Ndẹẹ anị sime-ḅara? Ḍuko ị̀ pịrịị.”
Tẹ ọ̀ nwẹnị pakịrị, “Tomi ma owu mẹ tọrọkọ ḅụ ḍumo-mangị kọn tẹ, tẹ tomi ma ḅẹ tọnwa apụ sọ pịkị ḅịkị tẹ fịị tẹẹ, tẹ Sọlụ na, ori owiḅọtụḅọ Jonatanị na sọ fịị tẹ.”
5Anịtẹso Devidi nwẹnị asatụḅọ ḅe tẹ ḍuko ọ̀ pịrị ḅọ ḅe gbela, “ị́ tọ-ḅara kẹ nimi mịnẹ Sọlụ na, ori owiḅọtụḅọ Jonatanị na fịị tẹ?”
6 #
1 Sam 31.1-6; 1 Pkị 10.1-6 Tẹ asatụḅọ ḅe tẹ ḍuko ọ̀ pịrị ḅọ ḅe nwẹnị pakịrị, “À Giliboha Tụndụ ọgọnọ emi, paa ye na, ye na kurama paka ḅara ḅụ, anịjụ anie Sọlụ ọ̀ ḅẹkẹrẹ ọgọnọ ḅụ sịrẹrẹ wararị; anịsakị ḍikii, kirimẹnjị-ọmụarụ ma na, asụ-dọkụ-ọmụapụ ma na ò ḍuka ḅụ ḅo ò kpeki tẹ. 7Ọ̀ tọrụ-pịkị ori ọḅụ ḍiki tẹso, ọ̀ nwẹnị ị̀ ẹrị, tẹ ị̀ sịn. À nwẹnị pakịrị, ‘Mie yẹrịị.’ 8Ọ̀ nwẹnị ì gbela, ‘Ị́yẹrị tụḅọ?’ À nwẹnị ọ̀ pakịrị, ‘Yẹrị Amalẹkị ḅẹ ḅọ.’ 9Anịtẹso ọ̀ nwẹnị ị̀ ḅẹẹ, ‘Ị̀ akaka ḅụ sịẹsime tẹ ị̀ ḅaa; kẹ gotẹ ọkọ ḅẹẹarị, fịị akụ ị̀ ọlọ-sịẹma tẹẹ, tẹ anịsọ ị̀ ịnyọ amụ paa biin-a.’ 10Anieḅụ à nwẹnị mu ori akaka ḅụ sịẹsime tẹ ọ̀ ḅaa, gbala à nimi lama wararị mịnẹ ọ̀ ḅịkị tẹ ḅara mẹ ọ̀ ḅarị inetẹ anịtẹrẹmẹ ḍumo ḅịa; tẹ arị ama-da sun mẹ tẹ ọ̀ sịḅị sime ye mẹ na, ḅarasụaye mẹ tẹ ọ̀ ḅara sime ye mẹ na siin ọkịm, anịsakị mịanga ḅụ àrị arị kẹ ị̀ nyanaḅọ ḅe pịrị ḅẹ ọkị-ḅo tẹ.”
11Anịtẹso Devidi nwẹnị ori akapa ọlọ tẹ arị kan; tẹ owiapụ ma tẹ ori na sime apụ mamgba sọ ọkọ mịẹm; 12tẹ kururu, tẹ tẹmẹ-la ḅara kẹ owu, tẹ ḅuru-ịmọ nwenii ḅoḅiri-so la kẹ Sọlụ na, ori owiḅọtụḅọ Jonatanị na, KỊNỊNYANAḄỌ ḅe atomi ma na, Izirẹlị warị mẹ na pịrịm, gbala ini okologie mẹ ḅụ ḅịkị tẹ ẹrẹsị.
13Tẹ Devidi nwẹnị asatụḅọ ḅe tẹ ye mẹ ḍuko ọ̀ pịrị ḅọ ḅe gbela, “Ị́ tọ-anga ḅụ sime tẹ ḅo?”
Ọ̀ nwẹnị pakịrị, “Yẹrị Amalẹkị ḅẹ ḅọ, ama mẹ ḅio ḅe igoniḅọ iyi owiḅọtụḅọ.”
14Devidi nwẹnị ọ̀ ḅẹẹ, “Ndẹẹ anị ị́ ḅalafama-a tẹ ị́ ị́ ḅara sụn-pakama tẹ kẹ KỊNỊNYANAḄỌ ḅe pulo kẹ sịḅị ḅụ sara tẹ ḅọ ḅe ḅaa ḅara?” 15Anịtẹso Devidi nwẹnị asawọ ma ḅẹ gbọrụḅọ sịn, tẹ ḅẹẹ, “Muu, ḅịkị ori ọgọnọ koroo.” Ọ̀ nwẹnị ọ̀ fomu, anie mịẹ tẹ ọ̀ nwẹnị fịị. 16Tẹ Devidi nwẹnị ọ̀ ḅẹẹ, “Ị́ ọmbie ị́ sịḅị ọgọnọ simee, kẹ gotẹ ọkọ ḅẹẹarị, ḅarana ị́ ḅịḅị kẹ ḍuko pakama ị́ ḅụụ fịnama tẹ, tẹ ḅẹẹm, ‘À KỊNỊNYANAḄỌ ḅe pulo kẹ sịḅị ḅụ sara tẹ ḅọ ḅe ḅaa tẹ.’ ”
Devidi Kururu Sọlụ Na Jonatanị Na Pịrịm
17Devidi nwẹnị mị owu ḅara mẹ kọn Sọlụ na, ori owiḅọtụḅọ Jonatanị na pịrị, 18#Jọs 10.13tẹ nwẹnị ḅẹẹ, ini anị kẹ Juda ḅẹ atomi ma tolumaa; ḍikii Jasa Ḍiri mẹ ḅio ini anị kẹ kẹẹ wararị.
Ori mẹẹ:
19“Gele ayeyọ ma ḅụ, ini í ebube mẹ ḅaa tẹ, yei Izirẹlị!
Ndẹẹ opu apụ ma mịẹ tẹ ḅịkị ḅara! 20Gati ḅụ anị ḍuko ma,
Asịkẹlọnị ḅẹ opu etela ma ḅụ,
ọmịnị anị kẹ ama oloku ma;
anieofori Filisiteni ḅẹ eremịna-awọmẹ ma ḅofa ḍereku,
anieofori ḅụụ-pẹlẹa ḅẹ apụ ma
eremịna-awọmẹ ma ḅofa ḅioḅẹlẹ lama.
21Ọmịnị Giliboha ḅẹ tụndụ,
yee igirigi, anịanịa eene ḅarị ọmịna ọgọnọ sarama
anịanịa agbamịẹ afịaị pakama aḍụọ!
Kẹ gotẹ ọkọ ḅẹẹarị,
anịjụ mie opuḅọ ḅe ekpeke mẹ pịla ye,
Sọlụ ekpeke mẹ, ịn ḅarị pulo kẹ anị tan-a.
22Ịn ḅaa ḅọ ḅe ọmbie mẹ ḅụ,
opuḅọ ḅe ḅẹlẹkị mẹ ḅụ
Jonatanị iboli mẹ pịkịma-ḅo-a,
anịsakị Sọlụ okologie mẹ ye ofori ḅụ pịkịma-ḅo-a.
23Sọlụ na, Jonatanị na ḍumo-tọrụ ḅụ ḅẹlẹmam,
tẹ ḅẹlẹma ḅara simem,
tẹ fịị ḅụ sọ ịn puua-a!
Ịn ḅụụ-sarasara igo nẹngịm
ịn kụrọ ọkụkụ ma nẹngịm
24Ọmịnị Izirẹlị ḅẹ eremịna-awọmẹ,
ọmịnị owu Sọlụ pịrịị
oriḅe tẹ pọpụlụ nwẹn-sịn tọrụ sụa ḅịtẹ kẹ
ó ḅirima ḅọ ḅe,
oriḅe tẹ golu ḅụụ-ḅirima aị kẹ
ọmịna ḅiriaị ḅụ sụa ḅọ ḅe.
25Ndẹẹ opu apụ ma mịẹ tẹ ḅịkị ḅara owu mẹ ḅẹ ogboku mẹ ḅụ!
Jonatanị fịị-ḅọlọlọ tẹẹ, gele ayọ ma ọgọnọ ḅụ.
26Ì iyimbere Jonatanị, à ḅioḅu ị́ pịrịm;
ị́ ị̀ ḅụụ yela lamam;
ị́ nyana ị̀ pịrị ḅẹlẹma ḅụụ-gbiripumam,
anị eremịna ḅẹlẹma sọ ḅọrọm.
27Ndẹẹ opu apụ ma mịẹ tẹ ḅịkị ḅara,
tẹ ọmụgbin ọmụ-aị ma gulugulu ḅara!”
(C) The Bible Society of Nigeria