2 Tesalonicenses 1

Nixje̱he̱ Pablo ti sin Tesalónica

1 # Hch. 17:1. *Janhan Pablo, Silvano la ko Timoteo mé ikjian ti xroon i, chrꞌa̱ha̱n ni̱nko itjen Tesalónica kixin nkoko̱a tinkáchónkini Itꞌéni Díos la ko Ìnchéni Jesucristo. 2Itꞌéni Díos la ko Ìnchéni Jesucristo sintañaora kixin kjuaxróxin tsꞌejora kixin tjua̱hára chꞌan.

Díos sinchekito̱exín ijie̱ ti ó tsokjan Cristo

3Kíchóni, nkochríxín chjéheni Díos kjuasáya kixin ti jahara. La ticháxi̱n xi̱kaha chrókjuíchꞌeni kixin tinkákꞌánkí ti tinkachónkira Ìnchéni Jesús la ko tinkákꞌánkí ti tjue̱héra kichuara. 4Ndá chéhe̱ni chenkani ti sin kíchóni kaín ti ni̱nkué Díos kixin, kjónté siín chojni nínkakohanra tjinkaon chrókꞌoñára, la ko kjónté tjejó tꞌatsínkara itsjé kjuaxróxinhña, la na̱xa̱ ti̱toéhyara tjáko̱xinra kixin tinkachónkira Ìnchéni. 5Tíha mé tja̱ko̱xi̱n kixin Díos la jína la ko tjinkaon chꞌan kixin chaxín jína tsꞌixe̱hénra ti tꞌe̱tua̱nxín chꞌan; mé xi̱kaha tjejotjasótiara ijie kixin titekáonra chꞌan. 6Díos la imá jína tjenka̱yáxin la chrꞌéxi̱n sinchekjasóte chꞌan ti sin tjejónchekjasóte ti jahara ijie. 7Ndá tsjajon chꞌan kjuachaxin kjuaxróxin tsꞌejora kixin ó kjuixin kjuasótiara, la ko kja̱xin jeheni kjuaxróxin tsꞌejóni ti ña̱o itsi Ìnchéni Jesús tsꞌinkaji̱xi̱n chꞌan nka̱jní la ko kaín ti sin ángel kuènté chꞌan chónta nchónhña kjuachaxin itsi chrꞌikjan xrohi. 8Mé xi̱kaha itsi Ìnchéni kixin sinchekjasóte chꞌan ti sin kuitekakuenhña Díos la ko kuítekakonhña ti itan jína chrónka Ìnchéni Jesucristo chrókuaáxin sin. 9#Is. 2:10.*Méxra̱ ti sin kuítekakonhña mé tsjasóte sin, tsꞌitjáña sin nkochríxín la tsꞌítuehen sin sátsji sin ikjín ti kohya Ìnchéni, la í tsꞌikonhña sin ti kjuachaxin kuènté chꞌan. 10Mé xi̱kaha tso̱hen ti ña̱o itsi Ìnchéni la kaín ti sin kjuínchetjóá Ìnchéni la tsjikosáyehe sin chꞌan, la ko kaín ti sin kuitekaon tsꞌikon sin ti kjuachaxin ijié kuènté chꞌan. Mé xi̱kaha kja̱xinra tsꞌikonra kixin ó kuitekáonra ti nkehe kjuakoni.

11Mé xi̱kaha nkochríxín tjancheheni Díos kixin jína chrókꞌuejora éxi tjinkaon chꞌan chrókꞌuejó ti sin kjueyá chꞌan, la ko tjancheheni chꞌan kixin chrótjáhara chꞌan ti kjuachaxin kuènté chꞌan kixin chrókjuachara chrókjui̱chꞌera kaín ti ixra̱ jína tjinkáonra si̱chꞌera kixin tinkachónkira Ìnchéni. 12Mé xi̱kaha kaínra tsjíkosáyehéra ti ihni̱é Ìnchéni Jesucristo la ko jehe chꞌan tsjikosáyahara chꞌan kixin tinkachónkira chꞌan la ko tjua̱hára chꞌan la ko Ìnchéni Jesucristo.

Currently Selected:

2 Tesalonicenses 1: poeNTplus

Tya elembo

Kabola

Copy

Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo

Yekola Koleka na Ntina ya El Nuevo Testamento, Salmos y Proverbios

2 Tesalonicenses 1

Baverset oyo Eyebani Mpenza ewuti na
2 Tesalonicenses 1

Yoka 2 Tesalonicenses 1

Biblia:

San Juan Atzingo Popoloca

Libongoli: El Nuevo Testamento, Salmos y Proverbios - poeNTplus