Sáni Mateo 8
8
IV. AMPE ENKA JESUSI ÚKA
(8.1—9.38)
Jesusi xúta jukarhekorhetini ma ampakerantasti
(Mk 1.40-45; Lk 5.12-16)
1Enka Jesusi juátarhu uératini kétsentapka, uánekuaksï chúxapaxati. 2Ka jima antarheraspti xúta jukari ma ka tinkuixurhikuspti arhiparini:
–Acha, enkari uék'a, úakarini ampakerantani.
3Ka Jesusi p'árheparini arhispti:
–¡Uéksïnka, ampakentsïa!
Ka xúta jimak'u nónespti ka p'amenchati ampakentapaspti. 4Ka Jesusi arhispti:
–Exe, ásï nemani jáma aiankuni, imantkukinisï arhik'a eskari táta jinkuni niuaka ka pa kéts'ïtakua eska Moisesiri juramukua na arhik'a ka ísïksï ima mítetini jauatia.
Jesusi p'urhek'utiri jántspirini ampakerantasti
(Lk 7.1-10; Jn 4.43-54)
5Enka Jesusi Kafarnaumi inchaakupka, p'urhek'uti Róma anapu urhets'ïkuri ma antarheraspti ísï 6kómarhiparini.
–Acha, jucheti jántspiri juchenio apontikusti, ka no úsïnti manakorheni ka kánekua arhiraxati p'amerani.
7Ka Jesusi arhintaspti:
–Ji niuaka ka ampakerantaaka.
8Ka p'urhek'uti urhets'ïkuri arhispti:
–Tata, ji no nitatarheska eskari t'u juchenio inchaaka, mák'u uanta ka jucheti jántspiri ampakentaati. 9Ka nóchkani jít'uni jamperi juramumenhasïni anti, ka jít'uni p'urhek'utichani juramukuasïnka, ekani ima ma ísïni arhiaka: Ni arhini, ima nirasïnti, ka ekani máteruni arhiaka: Ju axu arhini, ima jurhasïnti, ka ekani jucheti jántspirini arhiaka: Arini ampe u, ima úsïnti.
10Jesusi ísï kurharini ísku pakareraspti ka arhiaspti imechani enkaksï chúxapani jápka:
–Sési jimpoksïni arhixaka, eskani nónani Israeli xéska nemani, xáni mintsikani eska i acheti na mintsikak'a. 11Arhixakaksïni eskaksï uánekua juuaka tata jurhiata antarakuarhu uératini ka tata jurhiata inchats'ïkuarhu isï jamperi uératini, ka Abrani, ka Isaaki ka Jakobu jinkunksï, auantarhu anapu irechekuarhu márku uaxakaati t'ireni. 12Ka irechekuarhu anapuechaksï uérakua páp'akantu petanhaati; ka jimaksïsï ueraati ka sïnichanksï kirisïmeantaati. 13Ka Jesusi p'urhek'uti urhets'ïkurini arhispti:
–Níntsa ka úkorhe eskari na mintsikaka. Ka p'urhek'utiri jántspiri ampakentapaspti.
Jesusi Pédrueri tarhampirini ampakerantasti
(Mk 1.29-31; Lk 4.38-39)
14Jesusi Pédruo niraspti ka jima xént'aspti Pédrueri tarhampirini apontikuni jarhani xáni tinharani. 15Ka Jesusi jupik'uspti ka ima tinharakuani jupinaspti ka jauaraspti ka sóntku ampe k'éntaaxaptia.
Jesusi uánekua p'amenchatichani ampakerantaasti
(Mk 1.32-34; Lk 4.40-41)
16Tirimarhantu, Jesusinksï uánekua nósesi jásï incharhetichani pákuaspti ka ima mák'u uantakua jimpo petarheantaaspti, ka iámentu p'amenchatichani ampakerantaaspti, 17ka ísï úkorhenia ima enka Diósïri uantari Isaiasi uantaka;
“Ima p'iuasti juchari p'ikuarherakuechani
ka juchari p'amenchakuechani.”
Máru enkaksï Jesusini chúxapanhchempka
(Lk 9.57-62)
18Enkaksï Jesusini xáni uánekua uirhipkurhatini jápka, Jesusi juramukuaspti jurhenkorheri jémpechani eskaksï japuntarhu parhimepirinka. 19Ka juramukua jurhentpiri ma antarheraspti ka arhispti:
–Jurhentpiri, chúxapaakakini nani uék'i enkari niuaka.
20Ka Jesusi arhispti:
–Jiuatsïchaksï irekorhekua jatsikorhesti ka kuínichaksï xerekua jatsikorheasti, k'óru Acheti Uáp'a no jamperi jatsikorhesti nani mintsikorheni.
21Ka máteru jurhenkorheri jémpa ma arhispti:
–Acha, sésikuarini íntsku nirani jucheti táteni urheta jatsintani.
22Ka Jesusi arhispti:
–Chúxapurini, uarhirichaksï niue uarhirichani jatsikorheantaani.
Jesusi tarhiatani anhaxustasti
(Mk 4.35-41; Lk 8.22-25)
23Jesusi icharhutarhu jataspti ka jurhenkorherichaksï chúnkumaspti. 24Ka japuntarhu kánekua nósesi tarhiaspti, xáni ísï enkaksï jenkuerakuecha icharhutani óch'akurani jápkia. Ka Jesusi k'uípaxapti. 25Jimak'anksï jurhenkorheri jémpecha tsínharhitaspti ka arhinksï:
–¡Acha, p'ímantsïts'ïni, uarhimexakachia!
26Ka ima arhiaspti:
–¿Antits'ïsï chék'i? ¡Nóts'ï mintsikasïnka!
Ísï uantarini, jauaraspti ka xukaspti tarhiatani ka japuntani ka iámentu ampe sési niántaspti. 27Imaksï xáni ísï ampe exerini uantasïrempti:
–¿Néxamue i acheti enka tarhiata ka japunta jamperi kurhach'ak'a?
Gadara anapuecha enka nóampakiti incharheaka
(Mk 5.1-20; Lk 8.26-39)
28Enka Jesusi japuntarhu parhimepka, Gadarecheri echeri jimpoksï tsimani nóampakiti incharheticha kúmaspti, enkaksï uarhiri jántskuarhu uéntikupka. Kánekuaksï ikimenharhispti, xáni ísï enka jamperi no únhempka jimesï isï nitamanhani. 29Ka uinhachaparinksï uantaspti:
–Diósï Uáp'a ¿Amperisï úek'i juchantsïni jinkuni? ¿Urhetkuts'ïni jurhaski nósesi kántani?
30No iauani jarhareatini uánekuaksï kúchicha jámaxapti, 31ka nóampakitichaksï Jesusini kómarhispti, arhiparini:
–Ekats'ïni petarhentaska, sésikuats'ïni íntsku amani kúchichani incharheani.
32Ka Jesusi arhiaspti:
–Ni je.
Imaksï uérhpentatini kúchichanksï incharheantaaspti ka kúchichaksï kétsemani isï uiriaspti ka japuntarhuksï uékameraspti ka jimaksï uarhimespti.
33Ka kúchi erankutichaksï sïpakorhespti ka iretarhuksï iámu ampe uantant'a'spti enkaksï xáni nóampakiti incharheticha úkorhenchapka. 34Jiák'ani iretarhu anapuechaksï niraspti Jesusini kúmani, ka enkaksï exepka kómarhisptiksï eska uéakukuantaapirinka.
Biblia en P´urhépecha, Michoacán, México © Sociedad Bíblica de México, A.C.
