Sáni Mateo 7
7
Ásï jáma arhinhchpeni
(Lk 6.37-38,41-42)
1“Ásï jáma je arhinhchpeni ka chát'uts'ï no arhinhchanhantaaka, 2jimpoka ampe enkats'ï cha arhinhchpeaka, mák'uentsï arhinhchanhantaaka ka ampe enkari útspeaka méntkuenti k'uanhaskumenhantaaka. 3¿Nénari chéti erachini tekaasïni jarhuatani enka echenharhitini jaka, ka t'úri no exekorheni kostiasïni enkari jukanharhitini jaka? 4¿Nénari jimposï tekaak'i chéti erachini arhini? ‘Jurak'ukini p'ínharhikuntani ampe enkakini echenharhitaka’ ka jiniri t'u kostiasïni jukanharhitini jarhani. 5¡Ískuri ísï uantasïnka! Kostiasïni urheta p'ínharhikorhentsï ka jiák'aniri sési éskaaka ka úakari chéti erachini p'ikunharhikuntani ampe enka echenharhitaka.”
6“Ásï jáma je pímpinhasï ampe uíchuechani íntsaani o tsakapu mereari jukaparharini kúchichani k'uanitskakuaani, ásïksï inte t'auach'akue ka ásïksïni uíchuecha k'uanhap'atse katsarheni.”
Jurhenkorhe kurhak'orheni
(Lk 11.9-13; 6.31)
7“Kurhak'orhe ka intsïnhaakari, jirinhantsï ka xéntaakari, uámuta ka mítamenhaakari, 8jimpoka ne enka kurhak'orhek'a intsïnhasïnti, ka ne nema enka jirinhantak'a xéntasïnti ka ne nema enka uámutatspek'a mítamenhasïnti.”
9“¿Jaki cha ma ísï ixu, enkaksïni chári uátsïti ma kurhinta ma kurhacheaka ka t'u tsakapu ma íntskuni? 10¿O ekakini kurucha ma kurhacheaka ka t'u akuitse ma p'akarhkurhatani? 11Ekachkats'ï cha nóampakeparini, jurhenaka chári uátsïtichani ampakiti ampe íntsaani, ¡Náxanteru ampakiti ampe íntsaua chári Táte enka auantarhu jaka imechani enkaksï kurhakuaka!”
12“Ísï jimpo néna enkats'ï uék'a eskats'ï kánhaaka, ísï kámpe je, jimpoka ísïska juramukuani kurhach'ani ka Diósïri uantarichani kurhach'aani.”
No kómukurhasti
(Lk 13.24)
13“Jimesï incha enka no kómukurhaka, jimpoka uanhenhaska enkaksï jimesï inchak'a enka kómukuarhaka, ka enkaksï ima xanhari kóstini jatak'a enka tsînchetpek'a; 14k'óru no kómukurhasti ka no kórurhasti ima xanhari enka tsípekuarhu pérpek'a ka namuntkuksïsï xéntat'i.”
Jánkua jimpots'ï mítpeaka
(Lk 6.43-44)
15“Jinkuntku jáma je diósïri uantari eratakorherichani jinkuni, enkaksïni karichini járhantatini janochek'a ka k'óruksï incharini jiuatsïni apep'entspitini. 16Imecheri jánkua jimpots'ï míteantaauaka. ¿Anti tsïtunirhu úba p'ikunhantasïnki o tsurhumurhu jígusï p'ikunhantasïnki? 17Ísï jimpo, jarhasti ampakiti anhatapu enka ampakiti amanhech'akua jukak'a, ka ístu jarhasti anhatapu enka no ampakiti amanhech'akua jukak'a. 18No úati anhatapu ampakiti no ampakiti amanhech'akua jukani, ka nót'u úati no ampakiti anhatapu ampakiti amanhech'akua jukani. 19Náki uék'i anhatapu ma enka no áspiti amanhech'akua jukak'a, ch'apanhasïnti ka kurhinhantani. 20Ísï jimpots'ïsï imecheri jánkua jimpo míteantauaka.”
Diósïri irechekuarhu no iámentu inchanhaati
(Lk 13.25-27)
21“Nóksï iámentu ima enkats'ïni ‘¡Acha, Acha arhik'a!’ Inchaati auantarhu anapu irechekuarhu, imak'uksïsï inchaati enkaksï ísï jámka eska jucheti Táte enka auantarhu jaka na uék'a. 22Uánekuats'ïni imani jurhiatekua arhiati: ‘Acha, Acha, ¿Anti nóchi chéti jakankurhikua jimpo arhits'ïkpeski, ka chéti jakankurhikua jimpochi nóampakitichani petarhpeantaani ka uánekua milagruechanchi úani?’ 23Ka jiák'ani ji arhiauaka: ‘Nóksïni míteska ¡Kéntikuchets'ïni nósesi ampe úricha!’”
K'umanchekua sési úkata
(Mk 1.22; Lk 6.47-49)
24“Ima enkarini kurhak'a ka jucheti uantakuechani marhuataani, acheti míakua jukari ma jinkuni terukutant'a'sïnka enka k'umanchekua úni jámani tsakapurhu karhakua píts'ïtaka. 25Ka janispti, ka iurhentpeni ka kánekua tarhiani, ka méntku k'umanchekuani nósesi kántani, ka k'umanchekua no xerekorhent'aspti jimpoka tsakapu pítsetixapka. 26K'óru ima enkarini íni uantakuechani kurhach'ani jaka ka no marhuataani, acheti no míakua jukari ma jinkuni terukutant'a'sïnka enka k'umanchekuani kutsarintu úpka. 27Janispti ka iurhentpeni ka kánekua tarhiani, ka méntku k'umanchekuani nósesi kántani, ka kuáskuspti ka xerenturhikorhent'aspti.”
28Enka Jesusi k'amarapka uantani, ísku pakareranhatixapti imeri arhits'ïkperakuani kurharini, 29jimpoka jarhamekua jinkuni jurhentpesïrempka ka no ísï eskaksï juramukua jurhentpiricha na jurhentpek'a.
Biblia en P´urhépecha, Michoacán, México © Sociedad Bíblica de México, A.C.
