Sáni Lúkasï 9
9
Jesusi imeri jurhenkorhirichani axaaspti Diósïri ampe aiankpeni
(Mt 10.5-15; Mk 6.7-13)
1Jesusi imeri témpeni tsimani jurhenkorherichani tánaaspti, ka uinhapekua ka juramukua íntsaspti, eskaksï iámentu járhati nóampakitichani úpirinka juramukuani, ka eskat'uksï úpirinka p'amenchakuechani ampakerpentani. 2Axaaspti Diósïri irechekuani uantant'a'ni ka p'amenchatichani ampakerantaani. 3Arhiaspti: Ásï ampe ma pákorhe je:
–Tenhexkorhekua ásï pa je, ka sutuput'u ásï pa je, ka t'irekuat'u ásï pa je, ka tuminat'u ásï pa je, ka mórhekuat'u ásï pa je. 4Mápurku pakara je k'umanchekuarhu enkats'ï niárka, eskats'ï xáni ióni jima jarhak'a. 5Ekaksïni ma iretarhu no jiókaska, uéakuntsï je ka t'upuri sési uauantuntsï je, eska ísï jámani marhuakuauaka míani jarhani eskaksï aiankukata jarhaspkia.
6Nirasptiksï ka iámentu iretecharhuksï niáraspti, ampakiti aiankperakuani aiankpepani ka ampakerpentapani.
Erodesi no jánhaskaxapti
(Mt 14.1-12; Mk 6.14-29)
7Juramuti Erodesi mítespti ampe enka xáni úkorheni jápka; ka no jánhaskasïrempti antisï ísï úkorheni jápi, jimpokaksï máru uantasïrempka eska Juánu itsï atats'ïkpiri tsíntaspka; 8máteruksï uantasïrempti eska Diósïri uantari Eliasïsï xarhantapka; ka máteruksï uantasïrempti, eska ióntki anapu ma Diósïri uantarisï tsíntapka. 9Ka Erodesi uantaspti:
–Ji juramuspka eskaksï Juánuni kachuch'akupirinka. ¿Anti néski ima enkats'ïni xáni ampe aiankuni jaka?
Jimposï Erodesi jánkorhent'ani jápti Jesusini míteni.
Na enka Jesusi uáni t'irerpepka
(Mt 14.13-21; Mk 6.30-44; Jn 6.1-14)
10Enkaksï jurhenkorhericha k'uanhatsentapka, Jesusinksï aiankunt'aspti ampe enkaksï úpka. Ima támu páaspti iretarhu ma enka Betsaida arhinhak'a. 11K'óru enka mítenhapka, chúxapasptiksï, ka Jesusi sési eroaspti, Diósïri irechekueri ampe uantaxekuaspti ka p'amenchatichani ampakerantaaspti.
12Enka xatinini jápkia, Jesusinksï antarheraspti témpeni tsimani jurhenkorhericha ka arhisptiksï:
–Axap'entsï iretecharhu enkaksï ixu no iauani jaka, mintsikorheni ka t'irekua jirinhani, jimpoka ixuesï nómpema akua jarhaska.
13Jesusi arhiaspti:
–Cháchka t'ireraa je.
Imaksï arhispti:
–Iúmu kurhintak'uchisï kámani jaka ka tsimani kurucha, juchachkani nirania t'irekua p'ikuani.
14Jimpoka iúmu míli (5,000) ísïnhaspka. K'óru Jesusi jurhenkorheri jémpechani arhiaspti:
–Tsimani ekuatse témpenichani isï uaxastpe je.
15Imaksï kurhach'aspti ka iámentuechanksï uaxastaaspti. 16Jimak'u Jesusi iúmu kurhintechani ka tsimani kuruchechani p'íkuaspti, ka auantarhu erancheparini úch'akuraaspti, arhukuaspti ka jurhenkorheri jémpechani íntsaaspti eskaksï etsakupirinka. 17Sési t'irenhaspti uiniarhanhantani, ka pakarataksï témpeni tsimani tsïkiata tánantaspti.
Pédru uantant'a'spti eska Jesusisï Diósïri úch'akurakateka
(Mt 16.13-19; Mk 8.27-29)
18Ma jurhiatekua enka Jesusi uantamukukorheni jápka, enka jurhenkorheri jémpecha jinkuni jámani jápka, kurhamarheaspti:
–¿Néna uantanhaxaki, eskani ji néska?
19Imaksï arhispti:
–Máruksï uantasïnti eskari Juánu itsï atats'ïkpiriska, ka máruksï uantasïnti eskari ióntki anapu Diósïri uantari méska enka tsíntaka.
20Ka kurhamarheaspti:
–¿Ka cháia, nénats'ï uantasïnki, eskani ji néska?
Ka Pédru arhispti:
–T'úrisï Diósïri úch'akurakateka.
21Ka Jesusi uinhamu arhiaspti eskaksï nónemani aiankupirinka. 22Ka tátsekua Jesusi arhiaspti:
–Acheti Uáp'a jatsisti kánekua kómu nitamani, ka achamasïcha ka tátecheri urhets'ïkuricha ka juramukua jurhentpirichaksï no xénhchaati. Uántikuatiksï, k'óru tanimu jurhia jimpo tsíntaati.
23Tátsekua iámentuechani arhiaspti:
–Enka nema uék'a jucheti jurhenkorherini, ikimchakorhe, mántani pauani krúsini ichantikorhe ka chúxapuerini. 24Jimpoka ne enka uékak'a tsípekuani patsapatsantakorheni, tsîtakorheati; k'óru ne enka tsípekuani jínteni jimpo tsîtakorheska, patsakorheati. 25Jimpokachka, ¿Ampe antanhaa iámu i parhakpenini antakorhenhatini enka jantiok'u k'amak'ukorhenhaaka o tsînchekorhenhani? 26Jimpoka ne enkarini jínteni ka jucheti uantakuani k'uratsenharhiska, acheti Uáp'at'u k'uratsenharhiati enka imeri t'íntskua jinkuni junkuaaka ka tátjemperi t'íntskua jinkuni ka ánjeli pímpinhaxeticheri t'íntskua jinkuni. 27Sési jimpoksïnisï arhik'a eskaksï máru enkats'ï ixu jaka, nótkits'ï uarhini jauaka ka t'uínits'ï exeakia Diósïri irechekuani.
Na enka Jesusi ménterueni jáxent'apka
(Mt 17.1-8; Mk 9.2-8)
28Iúmu tanimu jurhia ísï tátsekua enka íni ampe uantaxepka, Jesusi, Pédru, Santiagu ka Juánuni jinkuni juátarhu máksï karhamaspti uantamukukorheni. 29Ka enka na uantamukukorheni jápka Jesusi ménterueni jánharhint'aspti, ka imeri xukuparhakua kánekua urapentaspti ka mereani; 30ka tsimani achetichaksï xarharaspti ima jinkunksï uantaxeni jarhani. Moisesispti ka Eliasï, 31sésiksï jásï ma t'íntskua uirhipantakorhetixapti ka Jesusiri níntskueri ampeksï uantaxexapti, eska Jerusaleni úkorhepirinka. 32Náuek'iksï Pédru ka imeri pámpiricha kánekua k'uínchani jápka, ísïksï jarhaspti tsínharhitini, ka exesptiksï Jesusiri t'íntskuani ka tsimani achetichani enkaksï ima jinkuni jápka. 33Enkaksï ima acheticha na Jesusini jarharent'ani jápkia, Pédru arhispti:
–Jurhentpiri, ¡Sési úska jucha ixu jarhani! Tanimu uapats'ïtakuachi úaka: Ma chéti, máteru Moisesiri ka máteru Eliasïri.
K'óru Pédru no mítespti ampesï uantani jápi. 34Enka uantani jápka, janikua ma karhakua niarakuaspti, ka enkaksï xúmurhu jápkia chésptiksï. 35Jimak'ani xúmurhu uantakua ma kurhakorhespti, enka arhipka: “I jucheti Uátsïtisti, jucheti Erakukata: Kurhach'a je.”
36Enka na pínantepkia, Jesusi jantiok'u pakaraspti. Ka imaksï míani pakaraspti inteni ampe ka jiák'ani ísïksï nónemani aiankuspti.
Na enka Jesusi tumpini ma ampakerantapka
(Mt 17.14-21; Mk 9.14-29)
37Pauantekuarhu enkaksï na juátarhu kétsentapkia, uánekua ninhaspti Jesusini kúntani. 38Ka acheti ma teruakuni isï uératini uinhachakuarhu arhispti:
–Jurhentpiri, jimpoatakua sáni, tataka sapichunirini exeche jimpokani íntkusïni kámka; 39nósesi jásï ma jupintasïnti, ka uinhachatarasïnti ka p'íntatarasïnti ka k'uruata uéchatarasïnti. Nósesi kámasïnti ka no uéksïnti jurak'uni. 40Kómarhiaskia chéti jurhenkorherichani eskaksï imani espirituni petarhetant'a'aka, ka nóksï ústi.
41Jesusi arhispti imechani enkaksï chúxapani jápka:
–¡Áke cha enkats'ï ísï no jakak'uk'a ka nóts'ï amparhani! ¿Na jatini jamperi chánksïni jinkuni jaua ka tekaachent'anksïni jarhani? Juácherini axu chéti sapini.
42Enka tataka sapichu antarherani jápka, nóampakiti tataka sapichuni k'uanintskaraspti ka ménteru p'íntatarani; ka Jesusi nósesi jásïni xukaspti, tataka sapichuni ampakerantaspti ka tátjempani íntskuntani. 43Ka iámentuechaksï Diósïri k'érikuani exerini ísku pakaraspti.
Jesusi ménteru uantanukorhexapti
(Mt 17.22-23; Mk 9.30-32)
Enka jamperi ísku pakareranhatini janhapka xénhani ima ampe enka Jesusi úempka, Jesusi jurhenkorheri jémpechani arhiaspti: 44–Sési kurha je íni ka ásï mirikurhi je: Acheti Uáp'a parhakpeni anapuechani intsïnharhitanhaati.
45K'óruksï ima no kurhankusïrempti ima ampesï arhiani jápi, jimpokaksï kurhankukua nótki mítamenhasïrempka enkaksï jimpo jánhaskatarapirinka; támtuksï chésïrempti arhini Jesusini eska jánhaskataraapirinka.
Nésï sánteru ampe
(Mt 18.1-5; Mk 9.33-37)
46Jiák'ani isïksï jurhenkorhericha uénaspti arhip'erani ne imecheri sánteru k'éri ampepirini. 47Jesusi mítetini ampe eskaksï eratseni jápka, tataka sapichuni ma antsïtaspti, ima jinkuni péraspti, 48ka arhiaspti:
–Ima enka íni tataka sapichuni jucheti jakankurhikua jimpo sési kámka, jíntentini sési jiókaxati, ka ne enkarini jínteni sési erokak'a, imantu sési jiókasïnti enkarini axaka. Ísï jimpo, ima enka sánteru nómpemeka cha iámentuecheri, imasï sánteru ampeti.
Ima enkats'ïni no ók'utak'a, jucha jinkunistiksï
(Mk 9.38-40)
49Juánu arhispti:
–Jurhentpiri, exeskachi ma enka chéti jakankurhikua jimpo nóampakitichani pétarhpeantaani jápka; nóchi jiaretaska, jimpoka no jucha jinkuniska.
50Jesusi arhispti:
–Ásï no jiáreta je, jimpoka ne enkats'ïni no ók'utak'a, imaksï jucha jinkunistiksï.
IV. ERUSALENI NIKUA
(9.51—19.27)
Jesusi Santiaguni ka Juánuni xukaaspti
51Enka na niárani jápkia jurhiata enka Jesusi auantarhu kénchent'apirinka, uinhauinhats'ïparini uéraspti Jerusaleni nirani. 52Uantakua párichani urhetatapaaspti, ka imaksï niraspti Samaria isï, ireta sapichurhu ma, Jesusini ják'orhekua jirinhakuni; 53ka Samaria anapuechaksï no jiókaspti, jimpokaksï mítetixapka eska Jerusaleni niraxamempka. 54Enkaksï jurhenkorheri jémpecha Santiagu ka Juánu ísï exepka, arhisptiksï:
–Acha, ¿Uéksïnti eskachi juramuaka eska auantarhu uératini chpíri kétseaka, ka eska intechani k'amak'uauaka?
55Ka Jesusi p'irhipakorhespti ka xukaani. 56Tátsekuaksï máteru ireta jimpo niraspti.
Enkaksï Jesusini chúxapani uékempka
(Mt 8.19-22)
57Xanhari jimpo, acheti ma Jesusini arhispti:
–Acha, uéksïnkakini chúxapani nani uék'iri nirani.
58Jesusi arhispti:
–Jiuatsïchaksï irekua jatsikorhesti ka káratichaksï xerekua jatsikorhesti; ka acheti Uáp'a no jatsisti nani uirhunteni.
59Jesusi máteruni arhispti:
–Chúxapurini.
Ka ima arhini:
–Acha, jurak'uni urheta nirani táteni jatsintani.
60Jesusi arhispti:
–Jurak'uksï uarhiricha imecheri uarhirichani jatsikorheantaani; t'u jáma Diósïri irechekuani uantant'a'ni.
61Máteru uantaspti:
–Acha, jíkini uéksïnka chúxapani, k'óru erokarini, jurak'uni urheta nirani juchenio uantanukorheni.
62Ka Jesusi arhispti:
–Ima enka jupikak'a tarherakuani ka útasï eraparhani jarhani, Diósïri irechekuarhu no marhuasïnti.
Biblia en P´urhépecha, Michoacán, México © Sociedad Bíblica de México, A.C.
