Sáni Lúkasï 10
10
Na enka Jesusi máteru jurhenkorherichani axaapka
1Tátsekua enka na i ampe úkorhepkia, Acha máteru tanimu ekuatse témpeni tsimani erakuaspti, (72) ka tsimantani axaaspti urhetatapaani iámentu iretecharhu enka ima niárapirinka.
2Arhiaspti: “Sési jimpo p'ikuntskua kánesti, ka p'ikuntstichaksï sántkuesti. Jimpo, arhi je cha Achani enka p'ikuntskua jatsika eska axauaka p'ikuntstichani p'ikuntani. 3Cha ni je; exe je eskaksïni karichi sapirhati, jiuatsïchani inchachataani isï axaxaka. 4Tumina ásï pa je ka akuat'u ásï pa je, ka kuarhachit'u ásï pa je; ka ásï nemani jimpo p'ínkukorhema je uantap'eni. 5Ekats'ï inchak'a nemo, urheta uantap'e je, arhiparini: ‘Ixu sési jánhe,’ 6Ka enka jima sési janhaka, chári sési jakua imechani antarheraati; ka eka no ísïka cháts'ï nómpema tsîtaaka. 7Imani k'umanchekuarhu pakara je ka a je ka itsïma je ampe enkats'ï intsïmpenhak'a, jimpoka uétarhesïnka eska ánchekorheri maiamunhaaka. Ásï axu ka axu inchapu je. 8Enkats'ï ma iretarhu niáratini jiónhaaka, a je ampe enkaksïni jatsiracheaka; 9iámentu p'amenchatichani ampakerantaa je, ka arhia je: ‘Diósïri irechekuaksïni antarheraxatiia.’ 10Ka enkaksïni mápuru iretarhu no jiókaska, xanharu jimpo ni je uantaparini: 11‘¡Chári ireteri t'upuri jamperichi uauantuntaxaka chánksïni nósesi xécheni! K'óru míte je eskaksïni Diósïri irechekua antarheraxakaia.’ 12Arhixakaksïni eska Sodoma no xáni nósesi kánhaska eska inte ireta na kánhaaka.”
Na enkaksï ireta no jakak'uticha arhinharhikunhaaka
(Mt 11.20-24)
13“¡Áke t'u Korasini! ¡Áke t'u Betsaida! Jimpoka eka Tiro ka Sidoni únhapirinka milagru enka ixu úkorheka, ióntkiksïsï ch'ech'erasï ampe jukarini ka t'upuri japu atats'ïparini Diósïni antarhentapirinka. 14K'óruts'ï cha imani jurhiatekua arhinharhikperakuarhu sánteru nósesi kánhaaka, eskaksï ima enkaksï Tiro ka Sidoni anapueka. 15Ka t'u, Kafarnaumi, ¿Tsípestakorhexakiri eskari auantarhu jamperi karhatanhaaka? ¡Sánteruri uarhicho jamperisï antanheraaka!”
16“Ima enkaksïni kurhach'ak'a chánksïni, jíntenisï kurhach'at'i; ka ima enkaksïni no jiókak'a, jíntenisï no jiókat'i; ka ne enkarini jínteni no jiókak'a, imanisï no jiókorhet'i enkarini axaka.”
Na enkaksï jurhenkorhiricha k'uanhatsentapka
17Ima tanimu ekuatse témpeni tsimanksï kánekua tsípeparini k'uanhatsentaspti, uantaparinksï:
–¡Acha, chéti jakankurhikuani jimpots'ïni nóampakiticha jamperi kurhach'asïnti!
18Ka Jesusi uantaspti:
–Ísïsti, jimpokani ji exespka enka Nóampakiti auantarhu uératini piritakueni uekorheka. 19Jíksïni íntskuska uinhapekua chánksïni eskats'ï úaka akuitsechani ka k'uarapuechani jatantuani, ka eskats'ï antaaka iámentu uinhapekua ménterueni eratseticheri, ka nóts'ï ampe ma úkorhenchani. 20K'óru ásï tsípe je enkaksïni espirituecha kurhantirachek'a, sánteru imani jimpots'ïsï tsípeaka enka chári jakankurhikua auantarhu pakaratini jakaia.
Tátjempani Uáp'ak'usï míteti
(Mt 11.25-27; 13.16-17)
21Enka na ísï arhiapkia, Jesusi Espiritu Sántuni iámu incharhekorhetini uantaspti: “K'éri ampeskari, Táte, auanta ka parhakpeniri Acha, jimpokari exeraaska sapirhatichani imani ampe enkari jískakuaka kánekua jurhentichani ka kurhankutichani. Jo Táte jimpokari ísï uékaska.”
22“Jucheti Táterini iámu ampe íntskusti. Nónema mítesti nésï uáp'e, Tátek'u; ka nónema mítesti nésï Táte, Uáp'ak'u ka imak'u enka Uáp'a uékaaka mítetarani.”
23Jurhenkorherichani antarhentaatini imechanku arhiaspti: “Imaksï k'ória enkaksï exeaka imani ampe enka cha exeni jaka; 24jimpokaksïni aiankuxaka eskaksï uánekua Diósïri uantaricha ka irechecha uékaska exeni íni ampe enka cha exeni jaka, ka nóksï exesti; uékastiksï kurhani íni ampe enka cha kurhani jaka ka nóksï kurhasti.”
Samaria anapueri uantantskua
25Juramukua jurhentpiri ma niraspti Jesusini uantaxekuni, ka ts'ék'uni uékani kurhamarhespti:
–Jurhentpiri, ¿Ji néna jámaa eskani úaka méntku isï anapu tsípekua p'irani?
26Ka Jesusi arhispti:
–¿Anti juramukuarhu néna karakata jarhaski? ¿O t'u ampe arhintasïnki?
27Ka ima juramukua jurhentpiri arhispti:
Chéti Acha Diósïni iámu chéti mintsita jinkuni íntskukorhentsï ka iámu chéti álma jinkuni ka iámu chéti uinhapekua jinkuni ka iámu chéti kurhankukua jinkuni; ka máteru nemani xáni xénhcha eskari t'u xáni xénhchakorhek'a.
28Ka Jesusi arhispti:
–Sésiri arhiska. Ekari ísï jámaaka tsípekuari jatsiaka.
29K'óru juramukua jurhentpiri, óch'akurani uékani imani enka kurhankorhepka, arhispti Jesusini:
–¿Ka nésï máteru nemeia?
30Jimak'ani Jesusi arhispti:
–Acheti ma xanhari jimpo niraxapti enka Jerusaleni uératini Jeriko niárak'a, ka kuárhukpiticha máruksï kuárhukuspti ka takusï jamperiksï euakorhespti; atasptiksï ka níntanksï, uántikuxaptiksïa. 31Táta ma jimesï nitamaxapti; ka enka exepka, ísku uanontaspti ka terutsemani nirani. 32Tiósïo jánti mát'u jimesï niraxapti, enka na exepka, imat'u ísku uanontaspti ka terutsemani nirani. 33Samaria anapu ma k'óru enka jimesï nitamatipka, ísï exerini p'amok'uspti. 34Antarheraspti ka sïpiati atamakuspti ka jomakuni. Ka jimak'u ch'anchakirhu jatsiraspti ka ják'orhekuarhu páspti ka sési kámaxapti. 35Pauantekuarhu, ima Samaria anapu p'íarhaspti tsimani jurhia antakata ka ják'orhekua jatsirini íntskuspti ka arhini: Exe je íni achetini, ka enkats'ï sánteru úraska, jíksïni maiamumunkuaka. 36Ka ia, ¿Ima tanimueri, néniri xésïnki eska sési kámaska imani enkaksï kuárhukupka?
37Ka ima juramukua jurhentpiri arhispti:
–Ima enka p'amok'upka.
Jesusi arhispti:
–Ka níchka, ka t'út'u méntkueni jáma.
Jesusi Mártao ka Mariao niraspti
38Jesusi xanharasptiteru ka ireta sapichurhu ma niáraspti, jima iretarhu enka nanaka ma Márta arhikorhe pápka mintsikorhetarani. 39Márta jinkunekuani ma kámasïrempti enka Maria arhinhempka, ima uaxantentaspti Jesusini kurhach'ani. 40Ka Márta, enka xáni uánekua ampe úkua jimpo jatach'akukorheni jápkia, antarheraspti Jesusini ka arhini:
–Acha, ¿Nóri ampe ma sáni uantasïnki enkarini jucheti jinkunekua jantiok'u jurarkucheka iámentu úkua? Arhi eskarini jarhuataaka.
41Ka Jesusi arhispti:
–¡Mártata! Uánekua ampe jimpori uantanheaxaka ka uánekua ampe jimpori no antak'orhexaka, 42ka ma ampek'usï uétarhet'i. Maria imani erakusti enka sánteru ampakiti ampeka, ka nónema euantaati.
Biblia en P´urhépecha, Michoacán, México © Sociedad Bíblica de México, A.C.
