Sáni Lúkasï 7
7
Jesusi p'urhek'uticheri urhets'ïkuri jántspirini ampakerantaspti
(Mt 8.5-13; Jn 4.43-54)
1Enka na Jesusi k'amarapkia uantaxetspeni, Kafarnaumi niraspti. 2P'urhek'uticheri urhets'ïkuri ma jima irekaxapti enka jántspirini ma kámempka enka kánekua xénhchempka, uinhamu p'amenchataxapti ka uarhixaptia. 3Ka enka mítepka eska Jesusi jimesï jámaxapka, judiouecheri achamasïchani máru axaaspti eskaksï kómarhipirinka eska nipirinka jántspiri jémpani ampakerantani. 4Imaksï Jesusini antarheraspti ka kánekuaksï kómarhispti, arhiparini:
–Sési jarhasti eskari inteni p'urhek'uticheri urhets'ïkurini jarhuataaka, 5jimpoka inte juchari iretani xénhchasïnka ka jimpokats'ïni juchari k'umanchekua tánkorhentskuani úcheska.
6Jesusi imecha jinkuni niraxapti, ka enka na k'umanchekuarhu niárani jápkia, p'urhek'uticheri urhets'ïkuri imeri mítekatechani máru axaaspti, eskaksï Jesusini arhipirinka: “Acha, ásï ók'utakorhe, jimpokani ji no nitatarheska eskari t'u jucheni inchaaka; 7ísï jimpokinisï no jamperi tekaaka nitsïkorheni jirinhantani. T'u enkari uantaska, jucheti jántspiri ampakentaati. 8Jimpokats'ïni jíntentu jucheti k'ératicha juramuchesïnka, ka mák'ueni jít'uni káasïnka p'urhek'utichani enkani ji juramukuak'a, Ekani imani ma ísïni, ni jini arhik'a, ima nirasïnti; ka ekani arhiaka máteruni eska juuaka, ima jurhasïnti; ka ekani jucheti jántspirini ampe ma úrak'a, ima úsïnti.”
9Jesusi ísku pakareraspti ísï kurharini, ka imechani erauaparini enkaksï chúxapani jápka, ísï uantaspti:
–Sési jimpo iápuru Israeli nónemani míteska enka xáni jakak'uk'a eska i acheti na jakakuk'a.
10Enkaksï ánchperata úricha niántapka, jántspiri t'uíni ampakentasptia.
Jesusi uarhiti tsînti, uáp'ani tsítant'a'spti
11Tátsekua enka na i ampe úkorhepkia, Jesusi iretarhu ma niraspti enka Naini arhinhak'a. Jurhenkorheri jémpecha jinkuni niraxapti ka uánekuateru ninhaxapti. 12Enka na iretarhu antamukuerani jápka, erankpespti eska uarhiri ma pánhantaxapka jatsinhantani, ka uarhiriri amampa imantku sapini kámasïrempti ka tsîntispti. Uánekua iretarhu anapuechaksï pámpetapaxapti. 13Enka Jesusi exepka, imani uarhitini p'amok'uspti ka arhispti:
–Ásï uera.
14No ióntaspti uarhirini antarherani ka uarhiriri jatantskuani p'árheni, ka ima enkaksï pántani jápka p'ínkukukorhesptiksï. Jesusi uarhirini arhispti:
–Tumpi, t'únkenisï arhik'a: ¡Jauara!
15Ka uarhiri uaxakantaspti ka uénani uantaxent'ani, ka Jesusi amampani íntskuntaspti. 16Ísï exerini, iámentu chérakorhenhaspti ka uénanksï Diósïni k'éri ampe arhini uantaparini:
–K'éri Diósïri uantari ma juchantsïni jinkuni jámaxati.
Ka uantasïremptit'uksï:
–Diósï imeri iretani jurhasti jarhuani.
17Ka imani ampe enka Jesusi úpka iápuru Judea ka iápuru jima uanontani isï mítekorhespti.
Juánu Itsï atats'ïkpiriri axakatecha
(Mt 11.2-19)
18Juánu itsï atats'ïkpiri iámentu inteni ampe mítespti, jimpokaksï jurhenkorheri jémpecha aiankuspka. Ka Juánu imani tsimani erakuaspti ka uantap'aani 19ka axaaspti, eskaksï Jesusini kurhamarhepirinka: ¿Imespia sési jimpo enka jupirinka, óksï máteruni erokorhepirinki? 20Juánueri ánchperata úrichaksï antarheraspti Jesusini ka arhinksï:
–Juánu itsï atats'ïkpirits'ïni axasti eskaksïni kurhamarheaka t'úeskia enka juuaka, óchi máteruni erokani jauateru.
21Jesusi uánekua jimak'u ampakerantaaspti ka sési p'ikuastant'a'ani, ka nósesi jásï espirituechani ampe ampakerpentaspti, ka uánekua pátenharhichani eskatarantaaspti. 22Ka ánchperata úrichani arhiantaaspti:
–Ni je ka Juánuni aiankuntsï je ampe enkats'ï exek'a ka kurhani. Aianku je eskaksï pátenharhicha exesïnka, eskaksï chkéch'uecha xánharasïnka, eskaksï xúta jukaricha ampakentasïnka, eskaksï kánticha kurhasïnka, eskaksï uarhiricha tsíntasïnka ka eskaksï nómpema jatsikorhericha ampakiti aiankperakua aiankunhantaxakaia. 23¡Ka tsípe ima enkarini méntku isï mintsikak'a!
24Enkaksï Juánueri ánchperata úricha níntapkia, Jesusi uénaspti Juánueri ampe aiankpent'ani uantaparini: “¿Ampets'ï exeni uéraski jimesï enka nónema irekaka? ¿Sïmpa kórheatakatani ma? 25Ka enka no ísïka ¿Jiántsï ampe uéraski exeni? ¿Nemani ampakiti ampe xukuparhatini? Cháts'ï míteska eska ne enkaksï ampakiti ampe xukuparhak'a ka ampakiti ampeksï jatsikorheni, eskaksï ima irechecho jarhaska. 26Jiáni, ¿Ampets'ï uéraski exeni? ¿Diósïri uantarini ma? Jo, ísïstimentu, ka enka Diósïri uantari ma jinkuni sánteru k'éri ampeka. 27Juánu imesti enka karakatarhu arhik'a:
Exe, jucheti uantakua párinkini urhetatachepaxaka,
enkakini xanharini ampantskachent'aaka.
28Aiankuxakaksïni eska iámentu parhakpeni anapuechani jinkuni, Juánu jinkuni nónema sánteru k'ériska; ka ima enka Diósïri irechekuarhu sánteru sapichueka, Juánu jinkuni sánteru k'éristi.”
29Iámentu imechani enkaksï Juánuni kurhach'aka, imecha jamperi enkaksï Romani tumina tánakuk'a, Juánu itsï atats'ïkuasti, ísï jámanksï ústi jánhaskani eska Diósïri xanhari sési ampeska; 30Enka úka, fariseouecha ka juramukua jurhentpirichaksï no uékasti itsï atats'ïni, ka ísï jámatinksï no jaiapanhentasti imani sési ampe enka Diósï patsakuaatini jápka.
31“¿Iásï anapuechani ampe jinkuni terukutpea? ¿Ampeni jáxenhaski? 32Xárhanhasti eska sapicha enkaksï kópekuarhu niárak'a ch'anani ka uinhachatsperanksï: ‘Kústacheskaksïni ka cháts'ï no uarhaska; ka nóts'ï ueraska enkaksïni kómu járhati pirecheaka’ 33Jimpoka Juánu itsï atats'ïkpiri jurhaska enka no arhak'a kurhinta ka enka nót'u kauik'a, ka cháts'ï uantasïnka: ‘Nóampakitini ma kámasïnti.’ 34Jimak'u acheti Uáp'a jurhasti, enka t'irek'a ka kauikua itsïmantani, ka cháts'ï arhisïnka: ‘Exe je, jukari t'iresïnti ka kauini, ka nósesi úrichani jinkuni sési arhip'erasïnti enkaksï Roma axakua tumina tának'a.’ 35Enka úka, Diósïri mímixekua jánkuarhu xarhatanhasïnti.”
Jesusi fariseouecha jinkuni t'irespti
36Fariseo ma Jesusini t'ireni p'imarhespti, ka Jesusi imeri k'umanchekuarhu niraspti. Uaxantetixapti t'ireni, 37enka imani iretarhu anapu ma uarhiti ísku jánti ma niárapka, ka enka mítepka eska Jesusi niraspka imani fariseouo t'ireni, ampakiti p'untsumekua sési jásï ma tsúntsu mímukukata uiniratini páspti. 38Ueparini, Jesusini antantukueraspti ka uekua jimpo úntaspti kuakanturhatani, tátsekua jauiri jimpo kutsuntukuntaspti, ka no jurak'unt'aspti putintukuni ka p'untsumekua atantukuni. 39Ima fariseo enka Jesusini p'imarhepka, ísï exeparini eratsespti: “Enka i tata sési jimpo Diósïri uantaripirinka, mítepirintia eska ísku jánti ma uarhitisï p'árheni jaka.” 40Jimak'ani Jesusi fariseoni arhispti:
–Simoni, ma ampe kámaxaka ka arhiakakini.
Fariseo arhispti:
–Jurhentpiri, arhirini.
41Jesusi arhispti:
–Tsimanksï acheticha kuánetpirini ma kánkuxapti. Ima ma ísï, ma irepeta ka iúmu ekuatse (500) tumina kánkuxapti, ka máteru tsimani ekuatse ka témpeni kánkuxapti; (50) 42ka jimpokaksï no úni jápka íntskuntani, kuánetkorheri kántsperata tsimarheni jurak'ukuaspti. Iásïrini arhiia, ¿Nénti arhik'i eska sánteru xénhchaaka kuánetpirini?
43Simoni arhispti:
–Ji arhik'a eska ima acheti enka sánteru kánkuni jápka.
Ka Jesusi arhispti:
–Ísïsti eskari na uantak'a.
44Ka uarhitini erateparini, Jesusi Simonini arhispti:
–Íni uarhitiniri exeskia; ji chéti k'umanchekuarhu janoska, ka nórini sáni íntskuska itsï enkani jupantutarapirinka; ka inte uarhitirini interi uekua jimpo jupantukusti, ka interi jauiri jimporini kutsuntukuntasti, 45ka t'úrini janorintku, no putinharhikuska, ka inte uarhitirini no jurak'unt'axati xáni putintukuni. 46Nórini sáni atats'ïkuska tamari ampe ka inte uarhiti k'órurini p'untsumekua atantukusti. 47Inteni ampe jimpokinisï arhik'a eska k'amanharhintskuechani púamenhantaskia, jimpokarini kánekua xénhchaska; ka ne enka sáni ampek'u púamenhantak'a, sántkurini xénhchasïnti.
48Tátsekua uarhitini arhispti:
–T'úri k'amanharhintskuechani púamenhantaskia.
49Máteruecha enkaksï uantap'anhantapka ka enkaksï jima jápka kurhamarhperanksï uénaspti:
–¿Néski i, enka k'amanharhintskuechani jamperi púatspeantak'a?
50Ka Jesusi uarhitini arhisptiteru:
–P'ímutanhantaskaria jimpokarini mintsikaska; sési p'ikuarherapantsï.
Biblia en P´urhépecha, Michoacán, México © Sociedad Bíblica de México, A.C.
