Sáni Lúkasï 6
6
Na enkaksï jurhenkorhiricha sábadu ma jimpo tríju p'ikuntapka
(Mt 12.1-8; Mk 2.23-28)
1Sábadu ma jimpo, Jesusi tríju jatsiatakatarhu parhiakuxapti. Ka jurhenkorheri jémpechaksï tríju kuarhats'ïkuaxapti, piiuk'uasïremptiksï ka arhasïremptiksï. 2Jimak'anksï máru fariseouecha kurhamarheaspti:
–¿Antits'ïsï imani ampe úk'i enka no jiáretperanhak'a sábadu úni?
3Ka Jesusi arhiaspti:
–¿Cha no arhintaskia na enka Dabi jámapka ma xanhari enkaksï imeri pámpetpiricha jinkuni k'arhimani jápka? 4Diósïri k'umanchekuarhu inchaspti ka p'íkuaspti kurhintechani enka Diósï míntakatepka, arhaspti ka pámpetpiri jémpechantu íntsaspti, nák'irukaksï tátechak'u jiáretanhempka imeni jásï kurhinta arhani.
5Ka arhiasptiteru:
–Acheti Uáp'a sábaduechantu juramusïnti.
Na enka Jesusi k'urhuk'urhani ma sábadu ampak'urhatant'a'pka
(Mt 12.9-14; Mk 3.1-6)
6Máteru sábadu, Jesusi k'umanchekua tánkorhentskuarhu inchaspti ka uénaspti jurhentpeni. Acheti ma enka t'irerkantani k'urhuk'upka jima jarhaspti; 7ka juramukua jurhentpiricha ka fariseouecha Jesusinksï erankuxapti ka exenksï eska sábadu ampakerantapirinka, ka ísïksï xékuntani ampe arhinharhikuni. 8Ka Jesusi mítetini ampe enkaksï eratseni jápka, Jesusi acheti k'urhuk'urhani arhispti:
–Jauara ka teruk'ani niára.
Ka ima acheti jauaraspti ka anhaxurhispti, 9ka Jesusi arhiaspti:
–Ampe máksïni kurhamarheaka: ¿Ampe jiáretperanhasïnki sábadu úni: Sési ampe o nósesi ampe? ¿P'ímutant'a'ni nemani o k'amak'uni?
10Tátsekua iámentuechani erateaspti enkaksï uirhintatini jápka, ka achetini arhispti:
–Ióxurhantsï.
Ima acheti ióxurhant'aspti ka ampaxurhantani. 11Ka kánekuaksï ikiaspti, ka uénasptiksï úskuni ka arhip'erani nénaksï Jesusini úpirini ampe ma úkuni.
Jesusi témpeni tsimani uantakua parichani erakuaspti
(Mt 10.1-4; Mk 3.13-19)
12Imani jurhiatekuechani Jesusi juáta ma jimpo niraspti uantamukukorheni, ka erantskutaspti Diósïni kómarhini. 13Ka enka na erantepkia, jurhenkorheri jémpechani ióarhiaspti, ka témpeni tsimani erakuaspti, ka uantakua páni axaaspti. 14Arichani: Simoni, enkat'u Pédru arhimpka; Andresï, Simoniri erachi jémpa ka Santiagu ka Juánu ka Felipe ka Bartolome 15ka Mateo ka Tomasï ka Santiagu Alfeo uáp'a; ka Simoni enka Selotepka; 16ka Júdasï Santiagu uáp'a; ka Júdasï Iskariote, ima enka Jesusini sïpatapka.
Jesusi uánekua jurhentpespti
(Mt 4.23-25)
17Jesusi juátarhu uératini imecha jinkuni kétsemaspti, ka pákua ma jimpoksï pakareraspti. Jimaksï tánkorhespti uánekua enkaksï chúxapempka, Judea anapuecha ka Jerusaleni ka ístu Tíro ka Sidoni anapuecha. 18Jesusinksï kurhach'ani niáraspti, ka eska Jesusi ampakerantaapirinka. Ima enkaksï nósesi jásï espirituechani jimpo nósesi p'ikuarherani jápka, imat'uksï ampakeranhantaspti. 19Ka iámentuechaksï uéksïrempti Jesusini p'árheni, jimpoka uinhapekua uérhexapka enka jimpo ampakerpentani jápka.
Ampe enka Diósïni japarini marhuak'a
(Mt 5.1-12)
20Jesusi jurhenkorheri jémpechani erateaspti ka arhiani:
“Cha k'ória enkats'ï no jatsikorherika, jimpoka cháriska Diósïri irechekua.”
21“Cha k'ória enkats'ï k'arhimani jaka, jimpokats'ï niáchatanhantaaka.”
“Cha k'ória enkats'ï uerak'a, jimpokats'ï tátsekua tsípeaka.”
22“Cha k'ória enkats'ï ikiamenhak'a, enkats'ï petaatanhak'a, enkats'ï útamenhak'a, ka enkats'ï Acheti Uáp'ani jimpo no xénhchanhak'a.”
23“Kánekua tsípe je ima jurhiatekua, tsankuarantsï je tsípeni, jimpokats'ï cha auantarhu k'éri ma intsïmperata intsïnhaaka; jimpokaksï ióntki anapu Diósïri uantarichantu mák'ueni nósesi káaspka.”
24K'óru, “¡Jarhonheni cha jatsikorhericha, jimpokats'ï intsïnhaskia sési p'ikuarherakuani!”
25“¡Jarhonheni cha enkats'ï iásï uinirini jaka jimpokats'ï k'arhimaaka!”
“¡Jarhonheni cha enkats'ï iásï tsípeni jaka jimpokats'ï ueraska xáni mískorheni!”
26“¡Jarhonheni cha enkaksïni iámentuecha k'éri ampe arhik'a! Jimpokaksï ióntki anapuecha ísï káasïrempka imechani enkaksï Diósïri uantari eratakorhempka.”
Kurhunhpirichani uétarhesïnti xénhchkaani
(Mt 5.38-48; 7.12)
27“K'óru chánksïni enkats'ïni kurhach'ani jaka arhixakaksïni: Xénhchaa je imechani enkaksïni no xénhchak'a, jarhuataa je imechani enkaksïni no xénhchak'a, 28sési arhia je imechani enkaksïni nósesi arhik'a, ka kómarhip'ekua je imechani enkaksïni útachek'a. 29Enkakini nema mápuru páksanharhikuk'a, jurak'ukini tsimapuru atani; ka ekakini nema sununta euakorheaka, jurak'ue chéti xukuparhakuat'u páni. 30Ne uék'ikini kurhacheni ampe ma, íntsku, ka imani enkakini chéti ampe euakorheaka, ásï arhi euantani. 31Ísï kámpe je eskats'ï na uék'a eskats'ï cha kánhaaka.
32Ekats'ï cha imechanku xénhchkaaska enkaksïni chánksïni xénhchkak'a, ¿Ampets'ï sáni sési úxaki? K'amanharhintsticha jamperiksï ísï jámsïnti. 33Ka ekats'ï imechantku sési ampe úkuak'a ekaksïni chánksïni sési ampe úchek'a, ¿Ampe sáni sésiski? K'amanharhintstichat'uksï ísï jámasïnti. 34Ka ekats'ï imechantku kuánetaak'a enkats'ï ampe ma erarhukukuani jarhak'a, ¿Ampets'ï sáni sési úxaki? K'amanharhintstichat'uksï kuánetperasïnti maiamperakua erokorhent'aparini. 35Cha xénhchaa je imechani enkaksïni chánksïni no xénhchak'a, ka sési ampe úni, ka kuánetkorheni nómpema erokorhent'aparini. Ísï jámantsï kánekua kúntamenhantaaka, ka cháts'ï k'éri Diósï uáp'euaka, enka uarhisechani ka nósesi kámpitichantu p'amok'uak'a.”
Ásï jáma máteruni arhinhchani
(Mt 7.1-5)
36“Cha sési kámpe je, ísï eska chári Táte na sési kámpek'a. 37Ásï arhinhchpe je, ka nóts'ï arhinhchanhaaka. Ásï uantatspe je ka nóts'ï uantatsenhaaka. Púatspentsï je ka púamenhantaakats'ï. 38Íntsïmpe je ka íntsïmpenhaakats'ï. Sésiksïni jatsirachent'aati, katsikatsinhachent'aatiksïni, taianhantskata ka churhuntsïti jamperiksïni jatsirachent'aati. Jimpoka mák'ueni eska cha xáni íntspeaka, xántsï intsïnhantaaka.”
39Jesusi íni terukutantskua arhiaspti: “¿Anti pátenharhi ma marhuakusïni máteru pátenharhini urhekupani? ¿Nóksï tsimarheni uekanhea? 40Nóma jurhenkorheri jurhentpiri jémpa jinkuni sánteru ampesïnti: Eka na jurhenkorhekuani k'amaraakia, jurhentpiri jémpa jinkuni méntkueniuati.”
41“¿Antirisï chéti erachini uék'i jarhuatani enka echenharhitini jarhak'a, ka nóri eratekorheni kostiasïni enkari t'u eskuarhu kámani jaka? 42Ka ekari no exekorhek'a kostiasïni enkari chéti eskuarhu kámani jaka, ¿Nénari tekaasïni chéti erachini arhini: ‘Erachi, jurak'ukini echenharhikua p'ínharhikuntani?’ ¡K'éri chkuántira! T'u uéna kostiasïni p'ínharhint'ani, ka ísïri sési exeaka, ka úakari chéti erachini echenharhikua p'ínharhikuntani.”
Ampakiti anhatapu, ampakiti ampe jukasïnti
(Mt 7.17-20; 12.34-35)
43“Nóma ampakiti anhatapu úsïnti no áspiti amanhech'akua jukani, nít'u úk'i ísku jásï anhatapu áspiti amanhech'akua jukani. 44Táchani anhatapu mítenhantasïnti imani jimpo ampe enka jukak'a: Karhasïrhu no jígusï p'ikunhantasïnti, nít'u tsïtunirhu uba p'ikunhantak'i. 45Nema enka sési arhip'etiuaka, sési jásï ampe uantasïnti, jimpoka sési jásï ampe mintsitarhu jatanhetixaka, ka nema enka nósesi arhip'etika, nósesi uantasïnti, jimpoka nósesi jásï ampe mintsitarhu jatanhetixaka. Jimpoka ampe enka xáni mintsitarhu jatanhetini jaka imani ampe uantasïnka.”
K'umanchikueri pítsekua
(Mt 7.24-27)
46“¿Antits'ïnisï cha arhik'i ‘Jucheti Acha, jucheti Acha’ arhini, ka nóts'ï úsïnka enkaksïni ji arhik'a? 47Arhiakaksïni ne enkeni jáxeka ima enkarini jurhak'a antarherani ka kurhani, ka úni ampe enkani ji arhiaka: 48Méntkueni jáxesti nema jinkuni enka k'umanchekua úni jámani urheta kánekua jarhakupka ka enka pítsekua tsakapurhu kúts'ïtapka. Enka iurhentpepka ka uinhamu k'umanchekuani antarherapka ka nósani manatani jimpoka sési úkata jarhaspka. 49Ka ima enkarini kurhak'a ka no ísï úni eskani ji na arhik'a, méntkueni jáxesti ima jinkuni enka k'umanchekuani no pítsekua jinkuni echerintu úpka ka enka iurhentpepka ka enka k'umanchekuani uinhamu antarherapka, xerenturhintaspti, ka iámu purunturhintani.”
Biblia en P´urhépecha, Michoacán, México © Sociedad Bíblica de México, A.C.
