Romanos 15
15
1Ec'u ri'oj ri jiquil kac'u'x chwach ri Dios, lic chirajawaxic wi quekato' ri hermanos na lic ta jiquil quic'u'x chwach ri Dios, ri c'amaja' caquimaj usuc' chi utz sa' ri caraj ri Dios chique. Ma na utz taj we xew e caka'an ri cuc'ul kac'u'x ri'oj yey na cojoc ta c'u il che ri cajawax chique rique. 2Chikajujunal ri'oj e ka'ana ri cuc'ul quic'u'x ri jujun chic hermanos we wa' e to'bal re ri quic'aslem chwach ri Dios. 3Ma ri Cristo na xu'an tane ri cuc'ul uc'u'x Rire.#Lc. 22:42 Ri xuc'ulumaj e jela' pacha' ri tz'ibital can chupa Ruch'a'tem ri Dios echiri' ri Cristo jewa' xubi'ij che ri Dios:
Ri c'axlaj ch'a'tem xel lo chiquichi' ri winak chi'ij la, Kakaw,
panuwi' ri'in xtzak wi Sal. 69:9
xcha'. 4Ma ronoje ri xtz'ibax can ojertan chupa Ruch'a'tem ri Dios, xtz'ibaxic re cojupixabaj y cunimarisaj kac'u'x, cha' jela' ruc' unimal kac'u'x cakoy'ej janipa ri bi'tisinic xu'an ri Dios chike chupa Ruch'a'tem. 5Ec'u ri Dios, ri aj ya'l unimal c'u'xaj y ri cunimarisaj kac'u'x, chu'ana che alak xa jun c'u'x alak jela' pacha' ri xuc'ut can ri Kanimajawal Jesucristo. 6Jec'ula', echiri' u'anom chi xa jun c'u'x alak, junam cayac alak uk'ij ri Dios, Rukaw ri Kanimajawal Jesucristo.
Ri Utzilaj Tzij re chinima ronoje
7E uwari'che, hermanos, jela' pacha' ri Cristo xuc'ul alak, jec'ula' c'ulu ib ralak ruc' rutzil c'u'xaj chiwach alak re yacbal uk'ij ri Dios. 8Cambi'ij c'u che alak, e ri Cristo Jesús xolu'ana to'bel ke ri'oj ri kacojom ri retalil re circuncisión#15:8 “Ri kacojom ri retalil re circuncisión”: Wa' e raj judi'ab yey rique e ralc'o'al can ri Israel. cha' colu'c'utu ri K'ijsak re ri Dios chikawach y ruc' wa' xujiquiba' uwach, lic e cu'ana janipa rubi'tisinic ri Dios u'anom chique ri kati'-kamam ojertan. 9Xc'un nenare' cha' tak ri tinamit na e ta aj judi'ab caquiyac uk'ij ri Dios ruma ri rutzil uc'u'x chique rique, jela' pacha' tz'ibital can chupa Ruch'a'tem ri Dios:
Canyac na c'u k'ij la
y cambixoj ri bi' la
chiquixo'l tak ri tinamit na e ta aj judi'ab. 2 S. 22:50; Sal. 18:49
10Y je tanchi wa' xubi'ij:
Ralak ri na alak ta aj judi'ab,
lic qui'cota alak junam cuc' rutinamit ri Dios. Dt. 32:43
11Y jumul chic xubi'ij:
Onoje alak che ruq'uiyal quiwach tak ri ticawex
che ruwachulew,
bixoj alak rubi' ri Dios,
yey lic yacbej alak uk'ij Rire. Sal. 117:1
12Yey jenewa' xubi'ij ri k'alajisanel Isaías:
Cayactaj na lo ri Jun ralc'o'al can ri Isaí,#15:12 Ri Isaí e ukaw ri rey David, yey ri Jesús e ralc'o'al can ri rey David. 1 S. 16:1; Mt. 1:6
ri cac'un lok re catakan paquiwi ruq'uiyal quiwach
tak ri ticawex che ruwachulew.
Yey rique cacubi' quic'u'x ruc' Rire Is. 11:10
xcha'.
13Ri Dios, ri cuya chike cacubi' pan kac'u'x ruc' Rire, chunojisaj ri anima' alak che ronoje qui'cotemal y utzil chomal ruma cubul c'u'x alak ruc' Rire, cha' jela' lic canimar c'u'x alak che ri oye'em alak ruma ruchuk'ab ri Santowilaj Ruxlabixel ri Dios.
Ri Pablo ya'tal che cutzijoj ri Utzilaj Tzij chiquixo'l ri na e ta aj Israel
14Alak nu hermanos, ri'in lic weta'am chi utz e lic c'o rutzil c'u'x y na'oj alak y ruma c'u wa' utz capixabaj ib alak chiwach alak. 15Na ruc' ta c'u ri', na canxi'ij ta wib quintz'iban pan che alak, ma c'o ri cuaj cancuxtaj che alak. Can'an c'u wa' ruma ri unimal rutzil uc'u'x ri Dios ya'tal chwe 16cha' ri'in quinu'ana raj chac ri Kanimajawal Jesucristo chiquixo'l ruq'uiyal quiwach tak ri ticawex che ruwachulew. Ec'u ri nuchac e cantzijoj ri Utzilaj Tzij re ri Dios chique rique, cha' jela' quebenuya chwach ri Dios pacha' e jun kasa'n lic cuc'ul uc'u'x, 'anom chi chom che ruma ri Santowilaj Ruxlabixel.
17Ec'u lic quinqui'cot che ri nuchac can'an chwach ri Dios ruma ruto'bal ri Kanimajawal Jesucristo. 18Ma na quinch'a't tane puwi ri can'an ri'in, xew e quinch'a't chwi ri u'anom ri Cristo wuma ri'in; ma ruma ri nutzijom y nu'anom chiquiwach ruq'uiyal quiwach tak ri ticawex, rique quebu'ana e aj cojol tzij chwach ri Dios. 19Yey ruc' nimak tak c'utubal y ruc' nimak tak chac xintzijoj ri Utzilaj Tzij re ri Cristo; y ri nu'anom e ruma ruchuk'ab ri Ruxlabixel ri Dios. Xinjek c'u lo wa' Jerusalem, xinic'ow lo pa tak jujun chic tinamit y xinopon c'a Ilírico. Jec'ula' wuma ri'in xe'ec utzijoxic ri Utzilaj Tzij che ronoje tak wa' wa luwar. 20Ec'u lic xinya wib che utzijoxic ri Utzilaj Tzij pa tak luwar pa na tzijom ta rubi' ri Cristo, cha' jela' na xi'ntica tubi ri nuchac puwi uchac junok chic, 21jela' pacha' ri tz'ibital can chupa Ruch'a'tem ri Dios:
Ec'u ri ticawex na jinta c'o xtzijox chique puwi Rire,
caqueta'maj na china Rire;
yey ri na quitom ta c'ana puwi Rire,
caquimaj na usuc' ri catzijox chique Is. 52:15
cacha'.
Ri Pablo caraj que'ec Roma
22E uwari'che, uq'uiyal laj xuaj qui'nwila alak, pero wa nuchac inuk'atem; 23no'j wo'ora xinq'uis u'anic wa' chupa tak wa luwar. Yey uq'uiyal tan junab lic nurayim qui'nwila alak; 24ruma c'u ri', lic nuch'obom chic, echiri' canmaj bi nube quin'ec España, quinic'ow uc' alak y jela' ajilam k'ij quinc'oji' pa qui'cotemal uc' alak. Ec'uchiri' wilom chi wach alak, utz quinto' bi alak che ri nubenam c'a España. 25Pero wo'ora quin'ec Jerusalem re qui'njacha jun kasa'n to'bal que ri hermanos e c'o chila'; 26ma ri hermanos e aj Macedonia, junam cuc' ri hermanos e aj Acaya, xquimol wa kasa'n que tak ri hermanos e niba'ib e c'o Jerusalem. 27Ri na e ta aj judi'ab lic pa canima' xalax wi xqui'an wa'. Yey c'o ne quic'as caraj utzelexic cuc' ri hermanos e aj judi'ab e c'o chila', ma rique e xetzijon ri Utzilaj Tzij re ri Dios chiquiwach. Ruma c'u la' lic ube quequito' ruc' tak ri cajawax chique. 28We xinutzin can ruc' wa' y nuya'om chi can wa kasa'n paquik'ab ri hermanos e c'o Jerusalem, c'a ec'uchiri' canmaj bi nube quin'ec España y quinic'ow c'u uc' alak. 29Weta'am c'u chi utz, we xinopon uc' alak, na xa ta jubik' ri canc'ul ri'in junam uc' alak che ri rutzil uc'u'x ri Cristo pakawi'.
30Hermanos, ri Ruxlabixel ri Dios uya'om ri rutzil uc'u'x chike cha' c'ax cakana' kib. Cantz'onoj c'u che alak chupa rubi' ri Kanimajawal Jesucristo quinto' alak, e 'ana alak orar panuwi' chwach ri Dios. 31'Ana c'u alak orar cha' na quintzak ta paquik'ab ri winak e c'o Judea, ri eyacatajinak chirij ri K'ijsak; y 'ana alak orar cha' ri hermanos e c'o Jerusalem caquic'ul chi utz wa kasa'n. 32'Ana co alak orar panuwi' cha' e chirij ri caraj ri Dios quinopon na uc' alak, y jec'ula' ruc' qui'cotemal quine'uxlan chila' uc' alak. 33Ec'u ri Dios, ri aj ya'l utzil chomal, c'ola uc' onoje alak. Amén.
© 2009, Wycliffe Bible Translators, Inc. All rights reserved.
