ROM 3
3
संकटलाद खंडन
1मंग यहुदी उंडीगास येम फायदा? लेकाते सुंता शेशी येम फायदा? 2हुं नक्की उंडाद शेंगेम फायदा उंडाद. येनटीक पहिला यहुदी मंदीके, परमेश्वरदी नियमशास्त्र इच्चेदेंक वच्या.
3पण यहुदी मंदी लोन्केल काही मंदी नियमशास्त्र विश्वास फेट्टालेद आंका येम आय्या? वार अविश्वासी उंटे परमेश्वर अभिवचनलान पुर्ण शेयाक फोई येम? 4अजिबात लेद! परमेश्वर खरेम इंगा प्रत्येक मनशी लबाड ठरायाला. पवित्र शास्त्रला इल्ला राशीनेद उंडाद की,
हे परमेश्वर, नि माटलाला नु नितीमान ठरायाला,
इंगा नीद न्याय आय्येताप्पुड नीद विजयी कावाला.#स्तोत्रसंहिता 51:4; 116:11.
5पण मनाय वाईट फनुल जर परमेश्वरदी नितीमत्व पण स्थापित शेस्ताय तर मनाम येम आनाला? या परमेश्वर मना मिंदा कोफाम शेस्ताड वाड अन्यायी उंडाड येम? (निन मनशी स्वभाव लेका इल्ला माटलाडतुनान.) 6अजिबात लेद! इल्ला आयते तर, परमेश्वर दुन्यामदी न्याय यल्ला शेशी? 7येनटीक की जर ना लबाडीता परमेश्वरदी सत्यता जास्त प्रकट आय्यी वान गौरव की कारण आयते, तर नाद पण पापी आंका न्याय येनटीक कावाला? 8इंगा मनाम शिंगार घडायाला आंका वाईट येनटीक शेयाराद? इल्ला शेंगेम मंदी आंटार पण की मिम इल्ला आंटाम, पण इल्ला आनेतोरकी परमेश्वर नक्की शिक्षा इच्ची.
आंदार पाप शेशीर
9मंग येम? मनाम यहुदी मंदी बाकी यहुदी लेनोर काना शेंगेम शिंगार उंडाम येम? लेद, अजिबात लेद, येनटीक की मिम पहिलाने शप्पीनाम की आंता मंदी यहुदी उंटे का यहुदी लेनोर, पाप शेतल्या उंडाम. 10यल्ला की पवित्र शास्त्रला राशीनेद पण उंडाद,
“परमेश्वर मुंदार यवाडुच मनशी नितीमान लेड,
वगाड पण लेड.#उपदेशक 7:20.
11यवानकी तेलस्ताद की येम शिंगार उंडाद इल्ला यवाडुच लेड,
यवाड मन आंची परमेश्वरनी फुडकुताड इल्ला यवाडुच लेड,
12यवारकीच परमेश्वरनी गुरतु फट्टेद लेद,
आंदार परमेश्वर इचांग येमीच फनीक निलवालेद;
शिंगार फनुल शेशेतोर यवारुच लेर,
वगाड पण लेड.#स्तोत्रसंहिता 14:3; 53:1.
13वारदी नोर वगा तेरशी फेटने कबर लेका उंडाद.
वार स्वता न्यालकाता खोटा माटलाडतार,#स्तोत्रसंहिता 5:9; 140:3.
वारी माटलु फाम जहरलेका उंडाय.
14वारदी नोर श्रापीत इंगा शेद आयनेद उंडाद;#स्तोत्रसंहिता 10:7.
15वार जेम तिस्कुना शेंगेम उतावळा उंडार.
16नाश इंगा दुख वार दावाला उंडाद.
17वारकी यरका लेद की मंदी जताक शांतीता यल्ला निलवाला.#यशया 59:8.
18वार कंडलाला परमेश्वरदी यरपु लेदुच.”#स्तोत्रसंहिता 36:1.
19इप्पुड मनाक इदी यरका उंडाद की नियमशास्त्र येम पण शपताद आदी नियमशास्त्र अधिन उंडेतोरकी शपताद दिनिचांग की प्रत्येक नोर बंद कावाला इंगा आंता दुन्यामलोन मंदी परमेश्वर मुंदार अपराधी ठरायाला. 20येनटीक की नियमशास्त्र पाळाशी यादुच मनशी परमेश्वर मुंदार नितीमान ठरायाक फोई, येनटीक की नियमशास्त्र तीकेल इदी यरका आयताद की मनाम पापी उंडाम.#स्तोत्रसंहिता 143:2.
नितीमत्वद अर्थ, न्यायीपन — 3:21—5:21
ख्रिस्तला विश्वासता नितीमत्व शिक्ताद
21पण इप्पुड नियमशास्त्र पाळायांदे परमेश्वर मनालनी नितीमान ठराय मतताड, यादान बद्दल नियमशास्त्रला इंगा संदेष्ट्याल पुस्तकलाला पहिलाने राशीनेद उंडाद की परमेश्वर मनालनी यल्ला नितीमान ठरायमती, 22आंटे परमेश्वर मना आंदारनी येशु ख्रिस्त मिंदा विश्वास फेट्टीने इचांग नितीमान ठराय मतनाड, येनटीक की वाड यवार संगाच भेदभाव शेयाड. 23येनटीक की आंदार पाप शेशीनार इंगा वार परमेश्वर गौरवकेल धुराम आयनार; 24पण परमेश्वर कृपाता ख्रिस्त येशुड किंमत निंची इच्चीने मुक्ती तीकेल वार फुकट नितीमान ठरास्तार. 25वाड ख्रिस्तन रक्तामता प्रायश्चित आंका वान मुंदारकी फेट्या, याद विश्वासता प्रभावी आयताद, पहिला शेशीने पापला तीकुड परमेश्वर वान सहनशीलता इचांग लक्ष इयालेद; दिनिचांग की वार दिंटल्या वानदी नितीमत्व प्रगट शेयाला; 26वाड इप्पुड इ वेळला स्वताद नितीमत्व प्रकट शेयाला, आंटे वाड नितीमान उंडाला इंगा यवाड येशुन मिंदा विश्वास फेटताड वान नितीमान ठहरामतेतोड कावाला. 27तर घमंड शेशेद यंदु उंडाद? दानकी तर जागाने लेद. या नियम इचांग? कर्मला नियम इचांग येम? लेद, पण विश्वास नियम इचांग. 28दिनिचांग, मनाक इदी यरका उंडाद की मनशी नियमशास्त्रलोन फनुला इचांग लेद तर विश्वासता नितीमान ठरास्ताड. 29परमेश्वर फक्त यहुदी मंदी परमेश्वर उंडाड येम? यहुदी लेनोर मंदी परमेश्वर लेड येम? हुं, यहुदी लेनोर मंदीक पण परमेश्वर उंडाड. 30जर सुंता आयनोरनी विश्वासता इंगा सुंता कालेनोरनी पण विश्वासता यवाड नितीमान ठरायमती वाड वक्काडे परमेश्वर उंडाड.
31तर मंग मनाम विश्वासता नियमशास्त्रन व्यर्थ ठराय मतताम येम? अजिबात लेद. पण मनाम नियमशास्त्रन खरेम सिद्ध शेस्ताम.
