ROM 13
13
अधिकारीला आज्ञा पाळाशे बद्दल शिक्षण
1प्रत्येक मनशी वान मुख्य अधिकारी अधिन उंडाला, येनटीक की आन्नी अधिकारलु परमेश्वर तीकेल उंडाय; इंगा अधिकारीलान परमेश्वरे निवडाशीनाड. 2दिनिचांग यवाड पण अधिकारीन आज्ञाक विरोध शेस्ताड वाड परमेश्वर नियमकी विरोध शेस्ताड इंगा यवाड नियमकी विरोध शेस्ताड वाड स्वता मिंदा दोष फिल्चकुंटाड. 3येनटीक की शिंगार फनुलाला अधिकारीलाद यरपु लेद पण वाईट फनुलाला उंटाद; जर निक अधिकारी मंदीद यरपु लेवाराद इल्ला नीद इच्छा उंटे तर येम शिंगार उंडाद आदी शेय आंटे निक वार तीकेल आदर शिक्की. 4येनटीक की शिंगार इचांग वाड परमेश्वर सेवक उंडाड; पण नु जर वाईट शेस्तुंटे तर येरपु फेट, येनटीक की वान देगार निक शिक्षा इच्चेद अधिकार उंडाद इंगा वाड वाईट शेशेतोरकी शिक्षा इच्चेदेंक परमेश्वर सेवक उंडाड. 5दिनिचांग मिक वार अधिन निलवाबेक, फक्त शिक्षा कावाराद आंका लेद, तर वगाट शुद्ध विवेक फेट्टेदेंक. 6इद्दे कारण इचांग मीर अधिकारीलाक कर पण इस्तार, येनटीक की शासन शेशेतोर परमेश्वर सेवक उंडार, इंगा वार वारदी कर्तव्य पुर्ण शेशेदेंक समर्पित उंडार. 7दिनिचांग यवानकी येम इच्चेद उंडाद आदी वानकी इंडा; यवानकी कर बेक वानकी कर इंडा, यवानकी जकात वानकी जकात इंडा, यवानकी आदर बेक वानकी आदर इंगा यवानकी सन्मान वानकी सन्मान इंडा.
शेजाऱ्यान मिंदा प्रेम शेयना
8मीर वगामेगार मिंदा प्रेम शेयना, प्रेमनी इडशी इंगा यादुच माटाला कर्जदार काकुंडा येनटीक की यवाड इंगोगोर मिंदा प्रेम शेस्ताड वाड नियमशास्त्र पुर्ण शेशीनाड. 9येनटीक की नियमशास्त्रला राशीनेद उंडाद की,
'व्यभिचार शेयाक,
खुन शेयाक,
दोंगा शेयाक,
लालच शेयाक'#निर्गम 20:13-16; लेवी 19:18; अनुवाद 5:17-19,21.
इंगा दिन इडशी इंगोगोट याद पण आज्ञा उंटे तर आन्नी इटलाद सारांश इ माटाला शिक्ताद की
'नु यल्ला नी मिंदा आल्ले नी शेजारोन मिंदा प्रेम शेय.'
10प्रेम मना शेजारोरदी येमीच वाईट शेय्याद; आंका जर मनाम प्रेम शेस्ताम तर नियमशास्त्र पुर्ण शेस्ताम.
मेल्का उंडना
11दिनिचांग वेळ ओळखाशी इल्ले शेयना, येनटीक की इप्पुड मिद निद्दार लोन्केल लेशेद वेळ वच्चीनाद, येनटीक की मनाम ख्रिस्त मिंदा विश्वास फेटतीम आप्पुड काना इप्पुड मनाद तारण इंगा देगार वच्चीनाद. 12इल्ला समजायना मोब्बु संपास्केन वच्चीनाद, फद्दु फुट्टेदेंक वच्चीनाद. दिनिचांग मनाम आय आन्नी वाईट माटलु इडस्काडाला याय अंधकारी उंडाय इंगा यलगुय शस्त्रल वगा सैनिक लेका कटकुनाला. 13फगुल की शोभाशी इल्ला मनाम नडवाला. दंगलीला इंगा नशाला, व्यभिचारला इंगा कामातुरपनाला, जगडालला इंगा इर्ष्यामला निलवाराद. 14तर मीर प्रभु येशु ख्रिस्तन फेटकोंडा इंगा देहवासनाल पुर्ण शेशेद इच्छा शेयाकुंडा.
